Direct Funding Chochah – A phana nata eima thohkheina awpa

Direct Funding Chochah – A phana nata eima thohkheina awpa

~ By: A. Zawngia

Maraland.net nata Mawrah thatihbuzy tawhta Central Team Mawrah la a khy ei ta, Decentralization Policy hmapa ta Local Government Body – Village Council zy thapatlo awpa abyuhna ama vaw reipa he eima rah chata a peimawh kawpa a cha. He liana heta Autonomous District Council zy chhao pahly awpa lyu ta. He policy heta hmahsiena lathloh a vaw pahy via awpa lyu ta, kheihta phahnai awpa ma a cha aw, khapa ma a duasu nata eima duasu, tahpa pacha ta eima patoh patia chhielie awpa abyuh kaw.

    Atahma he India rah State zydua he Central Sponsored Scheme (CSS) hmah ei ta. He CSS he State ta a chakhapa a toh ta, a hluh viapa cha Central tawhta piepa a cha tyh. Mizoram State he State hry liata dyhchhie chaipa a chapa vata Central ta  90% a toh via chai ta, State ta atohpa cha 10% a cha via chai.


   Central Sponsored Scheme he Department to liata y khairopa cha ta, chavata atahma cha rah hmahsiena chata plan taopa a hluh viapa he cha he hawhpa (CSS) tawhta taopa sairo a cha. Apakhona sakha reih ei sihla: Horticulture ry liata Plan lai viapa, Technology a sah viapa ta hria byuhpazy cha Central tawhta baona pie khaipa cha ta. A moh cha “Technology Mission (TM)” tahpa a cha. He TM ry liana heta plan nata project hluhpi tao theipa cha ta, cha plan & project tao awpa ta State Directorate of Horticulture ku liata a pahnieh khaipa a cha. Chavata amo ta ama taopa cha taopa tla cha ta, ama tao thai leipa tlyma, ama tao hma leipa tlyma, cha tao leipa tla a cha. He hawhna heta Department to lia maihta ama hma thei awpa nata hmahsiena lathloh hria nawpa ta CSS he a y khai ro. Anodeikuala, Department lata a daih leina vata pahnona a chyhpa vata tao thei awpa, tao leipa hluhpi y tyh tahpa eima pahno awpa a pha kaw.

 ‘Non-Lapseable Pool Fund’ eima tah tyhpa he pahno aw pi ta; hleidy zy, lathlohzy, bajarshed, etc taona tyhpa he a cha. He Fund a vaw yna dah he he hawhta reipa a cha- North East State zy mohhoh nawpa heta ‘North Eastern Council’ (NEC) paduapa cha ta, he NEC heta India Maw-Nochhi rah liata State a ypazy mohhoh nawpa a cha. Central la tawhta India Maw-Nochhi rah liata State zy mohhoh nawpa ta Plan & Project a Special ta taopa ta. Cha cha ‘Special NEC Package’ tahpa ta biepa a cha. He heta a pahlypa hluhpi cha India rah State hluhpi ta ama dao pha leipa cha ta; anodeikuacha, State la tawhta Plan & Project ta a pabie khai thei leipa vata NEC Package he pachha hma leipa ta Central la a kua lilaw (Lapse) ha tyh. Cha hawhta Central la a kua tyhpa cha ‘pha thai vei’ tahpa ta Non-Lapseable Pool Fund tahpa ta atahma cha Central la kua khao leipa ta, NE State zy hmahsiena chata pyly hmapa a cha heih tyh.He hawhta Lapse Fund tyhpa he nota leipa a cha.

   Ko 2002 khata Mizoram State vyuhpa ta Delhi la Indo-Israel Project Training awpa ta sie hra na ta. Training eima patlo khai tawhta Indian Agricultural Research Institute liata hyutuhpazy nata  Management Council hyutuhpazy nata noh kha cha apakyhna hnei pi ta. Cha nota kei ta ei hiahhrina cha, “Papuh saih u, eima rah hmahsie nawpa ta Agriculture nata Horticulture lachhah ta hmahla awpa he byuh kaw ta, cha hawhta hmahla awpa chhao eima byuh kaw na. Anodeikuala, eima khodah hawhta raihria awpa ta eima theina nata thainazy chyh kaw ta. Cha bailai ta sawkha la tawhta baona hmo awpa he hmo rairu kawpa cha heih ta. Central Sponsores Scheme he a hluh viapa maniah pie thei ula, abyuhna dah hawhta rai eima hria thei hra nawpa ta,” tah na ta. Ama chhyna cha, “NEC Package he thata Lapse tyhpa cha ta, a khophie hmahta hmapa cha vei. Mizoram State chhochhi cha 70% hmah vei. Chavata, nama hyutuhpazy nata reihpahmaoh ula, Project hluh via vaw tao ei sala, lyuhtaopa (farmer) zy bao awpa ta Central ta khatinorai apahy thlahha. Nama Package chhao a daih kaw,” tahpa ta na chhy ei ta. Chahrasala, Mawrah lata hyutuhpazy rei khei ei na ta, apacha nawpa pahno thai veih ei.

   He hawhna heta State sawkha ku liata zakha zakha eima pahniehpa heta hmahsiena raihria awpa hluhpi hria thei leipa ta y ta, tao awpa hluhpi cha tao hma leipa eima pakho tyh. A hriatuhpa ama daih leipa hleikho ta, hmoto zydua amo ta tao khai awpa ta hmo a theipa cha leipa ta. A chahta khokhei viapa nata khokhei leipa a vaw y nata chhochhi cha lapi a po ta a po thlahha tyh.

    He Direct Funding heta State sawkha siepahlie leipa ta soh maniah pie (khai) ba aw tahna cha leipa ta, District Council (MADC) ta CSS hmapa ta Plan & Project zy tao thei hra aw ta. Atanoh ta Directorate rai ama hria hma leipa hluhpi cha hria theipa vaw cha ha ba aw ta, baona hnabeiseihpa vata politics liata a rahreih nga kawpa chhao byuh khao aw vei. Cha hleikho ta khi tota amo khih, ti nah rah ta amihpa ta Project tao thei ha ba aw ta, Aizawl Directorate liata a thla hlei chahta phusa athy la hryuh awpa byuh khao aw vei. A pakhona ta, Phura nata Salyu by kiah liata a ypazy cha amo khota Project tao aw ei ta. Ku ta leipalie thei leipa cha Khaw hmapa ta leipalie thei ha aw ei ta. Ti lata ama rairuna chhao a rah leilo yzie hawhta a rairuna cha pathla lymapa a vaw cha ha ba aw. Khopai khih chyhsazy cha sahdo taopa lachhah pahah kaw ei ta, sahdo taopa lachhah project tao aw ei ta. Cha hawhna cha khito ta ama khih yzie hawhta hmahsiena rai ama hria thei khai ha ba aw tahna a cha.

  Chavata, he Direct Funding nata Decentralization Policy he atahma ta eima ngiah kawpa a cha. State phusa hmah leipa ta, Central Sponsores Scheme hmana a cha. A hlaotloh awpa vaw cha sala, eima thohkhei thei nawpa ta cha Plan & Project a tao thaipa, Detail Project a tao theipa, chathaipa hluhpi eima ngiah aw. Fund nata Scheme y hra sala, Detail Project tao thaipa eima y vei khiata, eima khih nah rah chata y zie hnei aw vei. Chavata, Marasaw chathaipazy, eima chuna Coarse hleikho tawhta eima rah chata hmahtlah cha theina awpa eima chu awpa abyuh ngai ta kaw.

Leave a Reply

Your email address will not be published. Required fields are marked *