SIAHA (MNN) – Atanoh târi 11 August, 2018 pa ta New Siaha VC zy ta MiMIR Project tawhta Integrated Mass Terminal – building (Motor apahâna 0pi) sana awpa project ama hmôpa alyna EE bungalow liata hneipa a châ.
He project he Mararâh VC 92 hry liata VC 20 zy ta project ataopasuapa ta DPR pangia chyu eita, he nahzy hry liata New Siaha ‘W’ VC zyta ama taopa Project cha atlypa châ ta, Rs.100.00 Lakhs ama dao aw.
He *Integrated Mass Terminal – building* (Motor apahâna 0pi) he *Siaha Sumo* apuapa nata angiapa zydua apahâna awpa (station) châ awta, Motor hropa hluhpi soh (parking) thei awpa a châpâ aw.
He Project rai hmô awpa ta New Siaha VC, MYA, MTP, MChP, LWA, nata Officer zy ta Joint Committee paduapa ta hmah ama lapa a châ.
A su awpa he District Civil Hospital râh chhôh, AR-18 camp road, motor pasina kiahpâh liata a châ aw.
Siaha district/Mararâh ta hmahsiena miakha peimawh kawpa nata Siaha khihpi ta â ngiah kawpa châ ta, alypa a châ ngaita kaw.
Zâlâ dawh 2-4pm ta apakhyna daihti a hmâhpa châ ta, kyhchhina hneipâpa a châ.
(Admin, MNN. Source: VL. Ngaia Hlychho via 1-MNN.)