SIAHA, 21 Patô, 2019, Hriaheinoh – Atanoh dawh 1:00 Pm liata 2nd “Chief Executive Member (CEM) Cup” Volleyball Tournament cha Puhpa Beirahmô Syhly, EM i/c Sports & Youth Services ta Gov’t High School Playground, New Siaha liata pahyna a hnei.
Pahyna a hnei khai tawhta Puhpa Beirahmô ta biereina chyupa hnei ta, ary liata palâsapazy he pasyunabie a reipazy a châ:-
- Sports chyhsazy cha Discipline nama hnei pha awpa a châ. Cha Discipline chata Siaha District Volleyball Association ta dâh nata phôh a taopazy chhao a pahly awpa a châ.
- Pari theipa nata niedo liata aboh awpa apeimawh. Sports chyhsa, talent a hneipha kawpa hluhpi, hmâtlâh ama châ khaoleina chhâ tyhpa cha Pari theipa nata niedo asohsi leina vâta a châ tyh.
- Sasyh avao pahnie ngaita kaw awpa byuh ta, mei pazy, sâdâ/khaini nata kuvâ zy taih ta tao tlâ lei awpa he, sports chyhsa ta eimâ chhuah awpa a châ. Eima vaw tyhpa ta a châ khiah ataih cheingei awpa a châ.
- Tlâhchâna nata dyutlaina (fitness) hneipha awpa ta cha sasyh avaopahniepa he apeimawhpa a châ. Tlâh eima va châ kawpa chhao ta lathli lâta pachâna hmâh hluh byuh pyly ta, cha hawhta patuapaluana ahneipazy cha chyhsa hlaotlohpa ama vaw châ tyh tahpa nama my awpa châ vei.
- Taochhei tlamawpa ahnei leipa chyhsa pakhata hmahta y mapi; eima taochheina deikua eima pahno awpa nata ataopathipa ta, aheihpa liata tao pado lyh-lia eimâ chhuah awpa a châ.
- Eima Mararâh ta nâmo he eima mokhâh thlâh-na tahpa namâ pahno awpa ei khoh kaw. Tiama lymâ u la, eima râh moh paphatuhpa châ achhuah chyu awpa ta ei châ haw ei.
- MADC liata eima nôpaw hmiatuapazy zawhzi ta atahmâ cha Sports lâ chhao hmahsiena eima hnei pathao lymâ; MADC he ta a theina rakha ta hmah la pazao lymâ achhuah ta, chavâta nâmo, Khazohpa ta Talent a chapiepazy chi he ta tiama kawpa ta tao hnolo u la, sâkhana châ achhuah awpa ta khokheina sâh chaipa ei cha hlâ ei.
Puhpa Beirahmô Syhly he MJA tawhta Puhpa Jeffrey Khara, Puhpa B. Dawpho zy ta kaw zi ei ta, MADC tawhta Puhpa JH. Beihnai, Sports Promotion Officer nata Puhpa BeiRôkhu Beitâ, I & PO zy ta ama kaw zi hra.
Atahmâta ‘Chief Executive Member (CEM) Cup’ Volleyball Tournament he a ei 2-na awpa châ ta, Siaha District Volleyball Association(SDVA) zy ta ama pachhuahpanohpa a châ. SDVA ry liata affiliated club 15 a y ngâ hai thapa SDVA nôpawpazy tawhta bie daopa châ ta, atahmâ liata ahlao theipa cha chanô team 7 nata chapaw team 8 zy ama châ.
Puhpa Beirahmô biereina a hnei khai tawhta Tournament pahyna awpa ta chanô Team – Model United FC nata College Vaih FC – zy pakhaihsa tuapa a ma châ.
(Written by BeiRôkhu Beitâ I & PO, MADC, Siaha)