SIAHA, 26 Patô, 2019, Abeipanoh – Ary liata palâsapa he târi 19-25 Patô, 2019 chhôh ta Evangelical Church of Maraland: General News nata Mission News zy a châ.
- HYUTUHPAZY KHIHTLYH:
Hâta hmiatua lâta eimâ pahnosapa hawhna kha ta, târi 20-25 Patô, 2019 chhôh kha ta Agartala NEICC Seminar ahlao awpa ta nata Tripura Mission field zy tlypa ta Rev. C. Beima, Moderator, Rev. Dr. Laiu Fachhai, Senior Executive Secretary, Rev. T.Salaw, ES (Misn) nata Machâ RT. Zachônô zy cha ama sie.
Rev. C. Beima, Moderator he tlâh-leipa ta, thohna O liata x-ray nata uric acid blood test zy hneikheipa châ ta, pachâ chhie chhih kawpa châ vei. Târi 25 May, 2019 ta eima râh lâ amâ kaw lie aw. MP Election result vâta Tripura lâ thâtih chhiepa tlô lei awpa nata apalâ kawpa ta Awnanozy tlypa ta, lâpi liata rairunazy atyh leipa ta Siaha ama kaw tlô thei n’awpa ta thlahchhâkhei chyu suh vy.
- EXECUTIVE SECRETARY (Edu):
Rev. Dr. S.T. Zawsi, Executive Secretary (Education) cha târi 25 May, 2019 (Sat) liata Executive Secretary (Mission) vyuhpa ta Chapi khih khô liata Lorrain Mothlih tlana su – Pakao Prayer House sa ngâhaipa mokhei awpa ta sie ta, târi 27 May, 2019 (Mon) ta Siaha lâ â zâ lie aw.
- ARUNACHAL MISSION:
1). Dimbwe khih liata Ls. T.T. Nôkhei, ECM Missionary O tlô n’awpa quarter sa ngâhaipa a cha. Dimbwe khih he Thotlâh a châpa vâta aleitheileipa ta quarter sa awpa abyupa vâta atahmâ he Abeipa angachhâna chô ta Missionary quarter cha 21 May 2019 tawhta sa pathaopa a châ. He Quarter sa n’awpa châta Budget sôh a y leipa vâta nohchareih ta Director nata Missionaryzy ta he o sana rai he ama hria lymâ.
He missionary Quarter sa pathao thei awpa ta baona apietuhpazy chô liata Zisu Kriata moh ta alyna bie ama reih. Tezu Awnanopa chhao ta ama vaw bao hra awpa chho ei ta, amâ ly ngai ta. Ary liata palâsapazy he baona apie hawpazy ama châ:
(1). Siata Local Church ta Rs. 10,000/-
(2). Mr. Supemso Taiyang (Asst. Pastor Changliang Local) ta Thophia Cubic 20.
(3). Pastor Kumar nata a chhôhkha, Dimbwe ta Thopi nata Ahmie. Tawhtala, nohchareih O sa rai ama hria khei ei.
Missionary quarter he achatliena lâta patlôpa a cha thei n’awpa ta Awnanopazy thlahchhâna ama châ haw hmeiseih ei.
2). Miss Nilu Tamai; ECM ta Bible School achuna liata a sponsor ngâhaipa cha apha kawpa ta M. Div. 2nd year a pa tlô haw. Atahmâ he Summer Vacation hmâpa ta Hucheliang Awnanopa liata Abeipa chakaona rai a hria ngâhaino a châ. Rairuna hropazy a y leipa ta a châ khiata cha 14 June, 2019 liata Dimapur lâ M. Div. 3rd Year a chu pazao awpa ta a sie pakhua aw.
3). Hâta hmiatuapa 19 May, 2019 liana khata Changliang khih liata Ngiapâ thiehpa pa 6 – châpaw 3 nata chânô 3 zy bâti pachâsapa ama châ. He bâtina achâpazy he khih nano nanopa lâ tawhta tlâna hnabeiseihpa ta Changliang Prayer Centre avaw ngaipazy châ ei ta, Awnanopazy thlachhâkheina zawhzi ta missionary zy chakaona Abeipa ta byhnâ pie lymâ ta, tlâhleipazy ta tlâna vaw hmô ei ta, Krista cha Abeipa nata pachhatuhpa ta amâ vaw pyh haw; Abeipa moh cha reithaipa ta y se. Changliang Prayer Centre chakaona châta Awnanopazy thlahchhâ amâ châ haw pâ hra ei.
4). Duraliang nata Taffragam Achhyna O chhao sa ngâhaipa a châ. Duraliang Achhyna O he vâro sa hawpa châta, October thlâpâ liata cha Apakhyna châta hmâ thei awpa ta hnabeiseihpa a châ. Taffragam Achhyna O deikua cha atôtlâh ngâlâh padua theipa châ chy ta, sôh rairuna vâta sa pazao theipa châ khao mâh vei. He achhyna o sa n’awpa châta Abeipa noh apakhyna thyuna he pachô pakhy ngâhaipa a châ. Zâkô liana kha ta Tezu khih liata One day Hotel chhao taopa a châ haw hra. Chavâta, he Achhyna O sa n’awpa cha heta Awnaopazy Abeipa liata thlahchhâ bao lymâ awpa ta amâ châ haw ei.
- MISING MISSION:
1). 1 Patô, 2019 ta thlih pathlipa liata Dogoria liata eima krizyhpa-nah nata amâ Chhyna O cha thlih ta parao ta, apakhy n’awpa ryhpaopa ama vaw hnei thei n’awpa nata eima krihzyhpa nahzy ta ngiapâna lia hnabeidy leipa ta ama y thei n’awpata thlahchhâkhei amâ ngia ngaita kaw. Amâ Chhyna O he ramawh ta sapa, achô râhvâ ta sapa a châ.
2). Târi 21 Patô, 2019 zâ liata Pihnô K. Nasia, w/o Pastor K. Dyukhu cha chhôpasapa vâta thohna o lia zâ kha admit-pa châ ta, a mylâpa ta atlâ kawpa ta a vaw pua ha heih.
3). Immanuel Awnanopa liata krizyhpa satlia pa Sheela Taye cha ie pazô sâna kyh liata rairuna hnei ta, dawhty zy apamosapa ta test awpa nano nanopazy taopa châ ta, a result pha khai thlâh ha tlôh ta, ano liata hmahsiena y tlô leipa ta, a nô nata pawzy ta kâhvileipa ta thlachhânazy hnei tyh ei ta, awnanopazy chhao eima thlahchhâna liata athei hra awpa ta maniah amâ haw.
4). Târi 18 May, 2019 liata Arunachal Mission Field tawhta Pastor Lalnunhlima Mathiepee nata chhôhkha nata Tezu Baptist Church liata Asst.Pastor-nah nôvah, deacons nata laihsa panoh ta Mising field za tly ei ta, hriatuhpazy amâ ly ngaita. Ama za tlô zâ, Saturday zâ liata Immanuel awnanopa liata apakhyna hneipa châ ta, Sunday program he hawhta taopa a châ: Immanuel liata speaker- Asst. Pastor Lohik Krisikro, Tayung- Pastor Lalnunhlima Mathiepee, Dinachapori- Evan. Chhetri. Saroh- Deacon Borang. Program pha kawpa hmâh thei ei ta, Tezu tawhta Missionary nata a za tlypazy chô liata MEM moh ta alyna bie ama reih.
- CHAKMA MISSION:
1). Ministries.
(1). Târi 19, May, 2019 lia kha ta Silsury liata manôh pathôh nata Borapansury liata manôh pakha, ama zydua ta manôh papalih zy cha Mission Pastor V. Chozah ta Bâti pachâsa ta, hawsaih pakha a hlâ pâ.
(2). Târi 24. May, 2019 liata Rev. KP. Azyu Field Director nata Missionary thokhazy cha Borapansury bia lâ ta local Church thokha tly awpa ta Kamalanagar lâ ama sie.
(1). Rev. KP. Azyu, Field Director cha Aizawl lâ Motor Servicing a buakhei khai tawhta Date 16 May, 2019 kha ta Station a za tlô lilaw haw.
(2). Evan. B. Vâbeibyhnarôna chhao ama nô a tlâh leipa operation taopa liahsa a pha via hapa vâta târi 22 Patô, 2019 lia kha Chakma field a zatlô lilaw ha hra.
(3). Evan. C. Ngôna cha chhôhkha hmo peimawhpa vâta Lôbô lâ a sie no a châ.
(4). Evan. A. Vabeikhohnei, Damlui khih liata a ypa cha ama tikhaoh kua khai ha ta, ti ama nie awpa a y khao leipa vâta Missionary zy SSK tawhta Rs. 20,000/- ta tikhaoh reipa tao awpa ta hmah la ngâhaipa a châ.
3). Donations
(1). Lotai ECM local Church zy ta student sponsor châta Rs. 6,000/- baona ama piepa vâta Abeipa moh ta alyna bie ama reih.
(2). Machâ B. Vâhnei, Zyhno local cha Silsury Awnanopa châta Dekchi nata Dawrâ hluhpi chaleipa ei ta, amâ ly ngaita kaw.
- ODISHA MISSION:
1). Târi 12th May, 2019 khata zâkô lâ tawhta amâ vaw chakaona chiehpa Miriapanga khih liata laihsa Puspita Digal nata Bataguta khih liata satlia Bijaya digal zy cha bâti pachâsapa ama châ. Âmo he târi 20th May 2019 liana khata Dâh Pathaihpa ta amâ hnei haw hra. Pastor Misra Digal ta bâti a pachâsa ei.
2). Atahmâno he Rajghara nata Karnetpur khih lia zy ta, sie papuana (Outreach ministry) hneipa châ ta, eima missionary nah zy chakaona liata thatlôna thiehpa ama hnei via lymâ thei n’awpata thlahchhâ khei amâ ngiah ngâsâ.
3). Alyna bie reina:
i) ECM Local Church Amôbyu ‘B’ ta Odisha mission field liata hlabu pataosa n’awpata Rs. 40,000 ta baona pie ei ta, ama chô liata OEM moh ta alyna bie ama reih. Abeipa ta byhnâ ahluhpi ta vao via lymâ ei se.
ii) St. Jonathan, Melbourn, Australia liata a pahrâpa ta OEM liata missionary zy ta abyuhna liata ama hmâ awpa ta Rs.12,000 baona pie ei ta, a chô liata eima Beipa Zisu Krista moh ta alyna bie ama reih.
4). Thlahchhâ Ahawna:
i) Evan. K. Maduati nata Evan. Beirôna Hlôvy zy cha, Evan. K. Maduati chiehleina vâta eima râh liata liahsa a vaw mohôh ha bâ ei ta, azie y viapa hawhta eima pachâ nota, atanoh taih pha pathlah thei mâh vei ei. Thlai ta ama vaw tlâh thei n’awpa ta eima thlahchhâna liata a thei chyu heih suh vy.
ii) Tahmâno he Pastor Dr. S. Lamo nata a chhôhkha zy cha eima râh la furlough hmâh ngâhai ei ta, Awnanopa-zy tly laihpa ta field report zy piepa ta ama siepapua lichih a châ. Ama daihti zy aphapa ta ahmâhpa ta, Odisha field lâ atlâh kawpata amâ lie lilaw thei n’awpa ta eima thlahchhâna liata a thei chyu suh vy.
iii) Odisha Evangelical Mission ta Odia reih ta Bible hnei thei mâh leipa ei ta, Abeipa ta amâ ngiahna zy pahnopa ta ama thlahchhâna zy chyh-eihpa ta Bible ama vaw hnei thei hra n’awpa ta thlahchhâkhei lymâ awpa ta maniah amâ haw.
- MARALAND GOSPEL CENTENARY HOSPITAL:
Târi 16 –23 Patô, 2019 chhôh report tlâhpipa:-
1). Tlâhleipa mopazie – 80
2). Tlâhleipa admit zie – 49
3). Ultasound mopa zie – 31
4). X-Ray mopa zie – 12
5). ECG mopa zie – 8
6). Endoscopy mopa zie – 25
7). Hawsaih pihpa zie -nil
8). Athipa – 2
9). Emergency Case – 14
10) Operation hneipa zie –nil
(Published by J. Lalvarliani, on behalf of Communication Department, ECM Assembly. Edited by BeiRôkhu Beitâ, Admin, MNN)