SIAHA, 11 Chhiepa, 2019 (MNN) – Atanoh dawh 12 Noon khata Mara Chanô Py (MCHP) General Headquarters(HQ), Siaha ta Agape Home nata Maraland Theological College(MTC) zy tlypa ta, baona ama hlâ.
He baona he MCHP Branch zy thyupakhyna tawhta atlohpakhypa a châ. Zâhkô Phiata thla liata MCHP Special Assembly, Tôkalô khih liata hnei nota biepathlupa hlaopatlohna a châ. Agape Home châ heta hmobaoh lâta apiepa Branch thokha ama y hra.
MCHP heta sapa nata thlahpa liata a theina dâh hawhta rai a hria lymâ. Mara Chanô Py a châ vâ heta, sapa rai dei hria leipa ta, Awnanopa/Thlahpa lâ liata chhao a theina dâh hawhta raiphapa a hria lymâ tyh.
Maraland Theological College baona châta Rs. 12,500/- hlâpa châ ta, Agape Home he Rs. 7,500/- baona hlâpa ama châ hra. He he Branch thokha tawta avaw ngia chhieliepa châ ta, â vaw ngiachhi lymâ nahta hnabeiseihpa a châ.