Puhpa N. Zakhai, CEM ta HSSLC Exam liata Top 7 alykheina hnei

SIAHA, 13 Chhiepa, 2019, Pobienoh (MNN) – Atanoh dawh 1:00 PM liata Puhpa N. Zakhai, CEM, MADC ta atakô MBSE ry liata Class-XII (Arts) Exam liata Top 7 Lalzawmsanga Khenglawt(Zawma), S/o Lalmawia Khenglawt, New Siaha cha CEM’s Conference Hall, MADC Main Complex liata alykheina a hnei.

He Alykheina Programme he Puhpa K. Chhihrau, Joint Secretary(GAD) ta chhihtha ta, Puhpa N. Zakhai ta biereina chyupa hnei ta, Class-XII Result a puana vaw rei taraw bâ ta, result zy eima pahno thlâh tarawpa ta Office lâ liata daihti ruapa a y palâh lei vâta alykheina Programme taopa he bâhta vaw hawh pi ta, pachâthaina ahawna a hnei.

Ary liata palâsapa hawh ta Puhpa N. Zakhai chata Satlia Zawma pasyuna bie nata biereina hropa a pazao.

Eima District liata Class-X nata Class XII Exam liata hlaotlohna phapa atopazy cha MSO General Headquarters nata MADC Education Departmenty zy ta alykheina hnei tyh ei ta, he he chuhaipazy châta pahaona pha kawpa a châ nahta hnabeiseihna ei hnei.

MADC nôpawpazy ta Thyutlia khizaw he pachâ peimawh kaw ta, a eih pachaipa ta Sports nata Achuna liata hlaotlohna atopazy he eimâ lykhei hleikhô ta eimâ phana rakha ta hmah pasiesa via lymâ ta cheihchalo lymâ awpa he eima khohpa a châ.

Atahmâ liata HSSLC Top 7 liata avaw tlohpa satlia Zawma chhao he eima Mararâh hmia maniah pakaituhpa châ ta, Mararâh pawpiri maniah pa-aotuhpa a châ tah leithei vana. Keima, CEM, MADC ei châna hawh ta eima MADC vyuhpa nata Mararâh zawpi vyuhpa ta palôh hmeiseihpa ta alykhei na ta, eimâ lykhei tlaina tahpa pamosana châta he Programme chyupa he pachhuahpanohpa a châ.

Satlia Zawma hriapasana nata tiamana cha a result tawhta pahnotheipa châ ta, ano a satuhpa a Nô nata Paw zy chhao reithai tlâh ama châ hmeiseih; sawzy châta amâ piena nata hriapasana theilâpa hmô thei awpa ta vaw châ ta, amopâ tlâh ama châ hneiseihpa ta ei pahno; ama chô liata alynabie ei reih hmeiseih hra.

Eima District liata pari theipa chi nano nanopa nata drugs zy ta maniah tlahnao ta, eima thyutliapazy ta cha hawhpa paritheina nata drugs ta a pabuapa hluhpi ama yna hry liata he hawh ta chyhsa siapa, châ thaipa nata nôpaw rei ngiahpa eima hneipa he arônah hmeiseih. Ano Zawma chhao ta nô nata paw pha kawpa a hneipa he Khazohpa lâ alyna châh pahno sala, atahmâ liata hlaotloh-na he achhâna châ leipa ta âthaona tlao vaw châ sala, eima Mararâh châta hlaotlohna khochhih kawpa vaw tlôkhei via lymâ awpa ta khokheina sâh chaipa ei hlâ.

Keimo hlâta chipho hmahsie viapa nata asosâh viapa ta eima pachâpazy eima pahnie theina a y chhôhpa a châpa ta ei vaw pachâ tyhpa cha Sports nata achuna liata hlaotlohna he a châ; chavâta tiama papua via lymâ awpa châ haw na ta, Mararâh thyutliapa zydua chhao ta eima dady chyu liata hriapasana, tiamana nata ngâchhihna hneina chô ta, eima nôpawzy ta thlah ama chachhâpa lymâna hawh ta atahmâpa hlâta tiama papua via chyu heih awpa ta ei châ haw ei.

Satlia Zawma âchuna thâtih chyupa:-

Satlia Zawma he Class-IV taihta Adventist School, Siaha liata kiah ta, Class –V to VIII Don Bosco, Siaha liata kiah ta, Class IX & X he Adventist liata a kiah heih hra. Class XI & XII he Mizo Gov’t Higher Secondary School, Aizawl liata kiah ta, Class-XII â exam tuana liata Failed ha ta, he he a tlâh leipa vâta a châ. Class-XII chanei awpa ta OIKOS, Aizawl liata kiah ta, Mizoram pôpalôhpa liata Top 7 (Asts) liata â vaw lâ theipa a châ.

He Alynakheina liata Puhpa N. Zakhai ta Citation nata Cash Incentive Ward Rs.30,000/- hlâna a ahnei pâ hra.

Satlia Zawma Paw Puhpa Lalmawia Khenglawt ta chhôhkha lâ tawhta biereina chyupa nata alynabie reina hnei ta, hrua eihpa MJA Siaha vyuhpa ta Puhpa M. Baithai, Editor, Chhim Aw ta pasyupalina biereina chyupa a hnei. He liata MADC Officer thokha ta he alykheina Programme he pahnokhei awpa ta amâ hlao hra.

(Admin, MNN. Source: I & PO, MADC, Siaha)

Leave a Reply

Your email address will not be published. Required fields are marked *