Puhpa K. Chhuabei, EM cha Seminar lia Khichhailaipa châta hruapa a châ

SIAHA, 19 Chhiepa, 2019, Pakhynoh – Atanoh dawh 11:00 Am liata Programme pathaopa Seminar on “Children in Conflict with Law: Issues & Challenges in Siaha District” liata Puhpa K. Chhuabei, EM i/c PWD etc. cha Chief Guest châta hruapa a châna hawh ta daihti a hmâkhei ei.

Seminar he MADC Forest Department Hall liata hneipa châ ta, Chairman Dr. David Zaitinvawra, District Child Protection Officer ta a chhihta.

He Seminar he Siaha Observation Home Management Committee nata District Child Protection Unit zy abaohpasupa ta ama pachhuahpanohpa a châ.

Rev. C. Beima, Moderator, ECM Assembly ta Devotion hneipa ta daihti pathao ta, Laihsa NC. Elisia, Superintendent, Siaha Observation Home ta Power Point Presentation hmâpa ta Big Screen liata Observation Home Report piena a hnei.

Puhpa K. Chhuabei, Chief Guest cha biereina hnei awpa ta daihti piepa châ ta, ary liatahpazy he a bierei tlâhpi viapazy a châ:-

  1. Khazoh ngiachhiena vâta nata sawhkhâ phana vâta Mararâh chhao thata khizaw hmahsiena hawh ta khihsana chhao eima hmahsie ta, anodeikua khihsa ahnaipa nata asâhpa eima y pathao tahpa pahno chyu pi ta, Observation Home Report eima vaw nahthliepa tawhta chhao pahno thei’pa a vaw châ heih hra; tha pasa â chhih hmeiseih.
  2. Politician nahzy pi ta tao awpa eima tao leipa hluhpi a y ngyu na aw tahpa keima liata pachâna thata napie ta, pahaona pha kawpa hluhpi eina piepa ta ei pahno.
  3. Khihsa rietheina vâta School akiah theileipa hawti hluhpi ama ypa tahpa Report tawhta vaw pahno pi ta, eima râh liata chahawhpa ama y leina awpa ta Awnanopa nata Khitlâh nôpawpazy ta hmah thata eima la tarawpa ta hmah la awpa hluhpi eima hnei via tahpa âlâ pasia kaw.
  4. Keimo nô nata paw zy chhao pi ta sawzy mohôh-na kyh liata eima diathlâ tlamaw aw tahpa chi âchhih kaw; thokha cha eima diathlâ vâta eima sawnahzy ta ama châna awpa hawh ta châ thei leipa ei ta, sawzy tawhta rairuna avaw y ti ta ataotuhpa deikua nô nata paw hleikhô ta khitlâh ta eima tao heih tyh.
  5. Khihsa pha viapazy ta sawzy school pakiasa pi ta, mopazina kyh liata eima diathlâ ngyu thei; keima bawlaw chhao saw pa 3 hnei na ta, ama luh chahnaopa ta thlahchhâna ei hnei tyh nata hnei tyh lei zy pachâna thata eina pie. Thlahchhâna chô ta sawzy he Abeipa liata eima pavaosa lymâ awpa apeimawh kaw.
  6. Atahmâ he IT hmahsiena zawhzi ta TV, Computer nata Mobile phone zy hmâpa ta kheihawhpa hmo rai pahno thei pi ta, eima moh thei khai rô haw; he hawhpa hmo zy he khizaw hmahsiena ta â chakaihpazy a châ vâta apakhâ thai rimâ’pa châ vei. Chavâta eima sawnahzy Khazohpa bie tawhta ahmâna dâh eima pachu awpa nata hmo phapa nata hmo pha leipazy eima chhopasia khai awpa he nô nata paw zy maohphaoh-na a châ.
  7. Eima râh liata NGOs hluhpi aduah pi ta, ângiana rakha liata raihria thlâh leipa ta ti nata râh kyhpachâna chô ta hmeiseihna kyh ta chakaona rai eima hria awpa abyuh hmeiseih.
  8. Eima sawnahzy he amâ pakyhpa reizie ta chyhsa phapa ta pua thei ei ta, chyhsa pha leipa ta ama pua thei vâta keimo nô nata paw zy pi ta School O ama tlô ma, Sunday School O ama tlô tlai ma tahpa eima mo pazi lymâ awpa he apeimawh kawpa ta pa ei pahno.
  9. Eima opa lyuhri liata khihsa rairu viapa nata riethei viapazy ama y nata y lei pahno chyu achhuah si la, baotheina eima hneina dady chyu liata kyhpachâna chô ta bao eimâ chhuah chyu awpa apeimawh hmeiseih. Keimo eima tao theina hlâta ama peimawhna âsâh via hapa ta a châ khiah eima khitlâh nôpawpazy nata NGOs zy hleikhô ta ama peimawhna dady liata biehneituhpazy thlai pahnosa lymâ thei si la, apha kaw aw.
  10. Atanoh Seminar liata hruapa All NGOs nata he Programme liata avaw hlaopa zydua, athôhkheina hnei chyu awpa ta khokheina ei cha hlâ ei.

Puhpa K. Chhuabei he ta Programme liata Chief Guest châta hruapa a châna kyh liata Organiser nah lâ alynabie reih ta, he Programme liata Chief Guest a châpa pahnokhei awpa ta I & PO, MADC siepahliepa ta MJA Siaha zy pahnosapa nata hruapa ama châpa hawh ta amâ hlao thei vâta ama chô liata alynabie a reih.

Siaha Observation Home liata hawti manôh 20 mohôh ngâ hai ei ta, Project liata cha manôh 50 mohôh awpa tahpa a châ no ta ama yna awpa O a y lei vâta manôh 20 taih he ama mohôh ngâhai tahpa Laihsa NC. Elisia tawhta report nahthliepa a châ.

He Seminar he atanoh noh 1 chhôh ô awpa ta pachuahpanohpa a châ.

(Written by BeiRôkhu Beitâ, I & PO, MADC, Siaha)

Leave a Reply

Your email address will not be published. Required fields are marked *