AIZAWL, 20 Chhiepa, 2019, Pohbieh noh (MNN) – Atamy ta, Mizoram University ry liata Graduate Result apuapa liata, Laihsa C. Ludy, Puhpa C. Beisa, Lôbô sawchanô cha Govt Hrangbana College, Aizawl tawhta Bachelor of Arts (Education) First Class liata hlaotlohna a to.
Laihsa C. Ludy he vâduana vâta a chyhta no tawhta a mokhaoh miano ta chao (totally blind) ha ta, Special Blind School, Durtlang liata High School taih a kiah. HSLC apha kawpa ta he School tawhta Passed ta, HSSLC cha Durtlang Higher Secondary School tawhta a patlô heih.
Government Hrangbana College, Aizawl liata BA (Education) a pazao ta, a hriapasana nata palôh chhyuna zawhzi ta First Class liata Graduate cha a vaw patlô haw. Post Graduate (MA) he NEHU liata apazao awpa khoh ta, MSO Joint Headquarters, Shillong nôpawpazy ta ama buakhei haipa ta pahnopa a châ.
Eima pahnona rakha liata Laihsa C. Ludy he, Marasaw mochaopa tawhta Graduate patlô tuachaipa a châ (Eima pahno chhei khiahtala rie miah pahnosa thei u la).
C. Ludy he châ a thai thei hleikhô ta, hlasathaipa châ ta, Gospel Outreach Ministry (GoM) zy chhaota ‘Paw Kyhpachâna’ tahpa hla ngia kawpa Music Video ama taopa cha YouTube liata mo thei awpa a y. Blind Sports lia chhao lymâ hluhpi a vaw la ha hra.
Abeipa ta chhihtha lymâ sala, hmialâ daihti liata hlaotlohna khochhih viapa to lymâ awpa ta, DMG ta khokheina sâh chaipa eima hlâ.
(Admin, MNN. Source: HC. Malsawmthanga)