SIAHA, 20 Chhiepa, 2019 (MNN) – Atanoh my dawh 11:00Am khata DRDA Conference Hall liata Siaha District Deputy Commissioner, Puhpa Bhupesh Chaudhary IAS, ta ano nata ahrialâhpa(Subordinate Officer) zy ta ama paduapa LÂTHLÔH PAHMÔTUHPA (MENTORSHIP) PROGRAMME pahyna ahnei. He he ta achhuahpa châ “Eima sawnah, eima hmiasai (Our Children, Our Future) tahpa a châ.
Atanoh Programme he Laihsa NC. Elisia, Superintendent, Observation Home, Siaha ta chhihtha ta, Puhpa H. Zonunmawia, Election Officer ta avypacha alypangiana bie (welcome speech) reina hnei ta, Puhpa T. Malsawmsanga, PD, DRDA ta LÂTHLÔH PAHMÔTUHPA Programme paduana zie nata ahmôchhuahpazy â ki chôcha kawpa ta reina daihti ahmâ khai tawhta Puhpa Bhupesh Chaudhary ta he Programme he pahyna ahnei. Puhpa R. Lalremsanga. Addl. DC chhaota biereina hneipa ta pachutuhpazy pasyuna bie reipa ta lâthlôh pahmôtuhpa Programme hlao tlô nawpa ta zawpi nata sawhkhâ hriaparaohna phapa liata apahnieh a ta.
He lâthlôh pahmôtuhpa Programme he Puhpa Bhupesh Chaudhary chhihthana liata District Administration, Siaha ta apaduapa a châ.
He Programme ta a chhuah chaipa cha District chhôh liata Sawhkhâ mohôhpa Siku Middle nata High School hawti zyta achuna kyh liata atahmâ hlâta hmahsie via nawpa ta khihtlâh zawpi nata siahlia kawpata padua awpazy, Central nata State ry liata sawhkhâ raihriapazy he Programmer y liata a volunteer pa ta, programme ta achhuahpazy nata hmahlana siekhei awpazy liata thatho kawpa ta alaichadai awpa ta hruapa ama cha hra.
He programme he DC Chairman na liata District Level Executive Committee member 15 nata Core Group mentors Member 6 ama y.
Programme siekhei nawpa dâh tlâhpipazy –
1) Programme he Volunteer based a châna hawhta, sawhkhâ raihriapa akhohpa zydua châta ahlao theipa a châ aw. Volunteer zy he Phusâ thyu cheingei awpa ta ahnawpa châ leipa ta, apasaihpazy châ deikua athyu theipa a châ aw.
2) Mentor pakha ta Siku 4/5 rahchhôh topa mohôhna hnei aw ta, thla 1 chhôhta ei kha chhâ siku he atly cheingei awpa a châ aw. Pachutuhpa nata Achuhaipazy nata apakyhsiana hnei aw ei ta, ama rairu nata bao ama ngiahna liata abyuhna dâh hawhta hmah ala khei aw.
3) Mentor zyta achunabu khotho la nata ama chuna liata bao thei awpa nata ama sai pakawh thei nawpa chhaichhihzy ama patuapalua khei aw.
He Programme hnawh chai awpa cha apasaihpazy tawhta athyupakhy tuapa châ aw ta, programme ahlaotlohna zie lymâ hawhta sawhkhâ sôh nata CSR sôh tawhta rypaoh viana tlua lymâpa a châ aw.
He Programme lia heta sawhkha mohôh haipa Middle School nata High School Principal/Headmaster zy nata NGO nano nanopa nata thâtihbu chyhsa chhao hrua eihpa ama châna hawhta ama ki pha kaw.
Programme he achhâna lâ liata Puhpa Pu N.Vabeiratlua, DIPRO ta alynabie reina hneipa ta daihti pachhâsapa a châ.
Source ; I&PRO, Siaha
Palietuhpa : Lalremruata Khithie (Lark KT)