SIAHA, 22 Chhiepah, 2019, Pachynoh (MNN) – Atazâ dawh 7:30 Pm liata Mara saino ataopasuana – Mara Comedian Search cha NSV Studio, Siaha liata Grande Finale ataopasuana hneipa châ ta, he liata Puhpa K. Chhuabei, EM i/c PWD etc. MADC cha khichhai laipa châta hruapa a châ.
Khichhai laipa Puhpa Chhuabei cha biereina hnei awpa ta hruapa châ ta, ary liata palâsapazy he a bierei tlâhpi viapazy a châ:-
- Ahmiatua chai ta daihti phapa nâpie tuhpa Mara Comedian Search apachhuahpanohtuhpa Maraland Entertainment Group nôpawpazy hnoh ta alynabie reih na ta, atazâ he Studio liata avypakhypazy hnoh ta nata TV siepahliepa ta maniah mohtuhpazy hnoh ta anaoh-na nata alynabie ei cha hlâ ei.
- Eima Mararâh chheipâh liata TV nata Internet zy siepahliepa ta Hlasa, Saisopa nata chi nano nanopa hmâpa ta Mara reih nata Mara chi nata pho maniah disao thei awpa hluhpi a y tahpa pahno thei awpa a châ no ta Mara chi nata pho âboh theina awpa ta Mara Comedian Search avaw y pa he ei ly hmeiseih. He hawh ta ahlao tloh theina awpa ta sôh, daihti nata palôhru hluhpi ahmâhtuhpa zydua hnoh ta alynabie ei chareih ei.
- Eima reih pabohsatuhpa py hluhpi y pi ta, he hawh ta Mara reih cheingei ta Programme pha kawpa a y lymâ vâta keima mo pakha pachâna liata cha Mara chi nata pho he lei aw vei tahpa ei hnabeisana nata pangiasana a châ. He Mara Comedian Search he Mara chi nata Pho abohna awpa na a châ e tahpa pahnopa ta eima pasô kaw awpa a châ.
- Mara Comedian Search he pachhuahpanohpa châhrasala Marasaw, saiso atahiapzy ta he su liata a vaw hlao leipa ei sa la, y zie y aw vei; chavâta talent pha kawpa anyukhei thlâh leipa ta he liata avaw contest tuhpazy hnoh ta alynabie ei hlâ hra ei.
- Keimo Marasaw hmotaopazy he chi hropazy ta maniah pasôpa aw vei ei; Mara Comedian Search he keimo Marasaw zy ta pasô thai kawpa ta apaly pauasana awpa châta eima hmâ chyu awpa ei khoh kaw.
- F & F, daoh hropa hneituhpa nata chyhsa nano nanopa zy ta sôh hluhpi hryuhpa ta he Mara Comedian Search he ama vaw sponsor vâta râh luhpa ei châna hawh ta nata atazâ chief guest ei châna hawh ta alynabie chahlâei na ta, abuakheituhpa nata apatohpatiatuhpazy hleikhô ta eima Judge nahzy chô liata alynabie ei reih hmeiseih.
- Keimo Marasawzy hawhpa, Micro minority liata he hawhpa Programme buakhei awpa he hmo rairu kawpa a châ tahpa reih tyh ei ta, he hawhta a châ no ta hlaotloh kawpa ta nama vaw taothei tyh vâta alynabie ei chahlâ ei.
- Eima râh hmahsiena awpa nata hmialâ tôh lymâna awpa kyh liata eima râh Luhpa nata Officer lai viapazy liata pahnieh thlâh leipa ta Mara chi nata pho abohna he nâma nata keima, eima zydua ku liata â pahnieh tahpa pahno chyu si la, Marasawzy, y chakhyh thlâh awpa châ mapi tahpa pahno si la, Chi hro pho hropazy ta maniah ama disao leina awpa ta eima tiama abyuh.
- Eima Mararâh kihpi Siaha liata daoh lai viapa nata Company Agent lai viapazy he chi hropazy ama châ. Chavâta keimo Marasawzy pi ta luhpa châ awpa ta cha eima hriapasa byuh ta, he hawhpa business ataopazy pi ta customer zy hnoh ta eima Polite kaw awpa byuh ta, hmo mâ chhao anao viapa ta eima zua ngâh abyuh aw.
- Hriapasana nata tiamana kyh liata eima Mara Officer hmiatuapazy atlu leipa ta eima y tlamaw aw tahpa pachâna thata eina pie; MADC, Mizoram nata Centre ry liata sawhkhâ rai hriapazy ta ngâchhihna nata tiamana he hnei achhuah chyu ei suh u.
- Marasaw, zawpi vâtlâh hluhpi, eietluana sianôpa hnei achhuah hlei leipa, y chakhyhpa eima hluh kawpa ta ei pahno tyh. Eima âhmie nata niebaw hluh via zydua he Lai nata Viah nah tawhta la pangiapa a châ tahpa eima pahno chyu. Sawhkhâ rai he maniah adaih tiah leipa aw ta, chavâta nietluana hropa pha kawpa eima patuapalua lymâ awpa apeimawh kaw.
- Eima Missionary RA. Lorrain zawhzi ta eima râh liata hmahsiena hluhpi avaw y haw; kô 100 Awnanopa châ ha pi ta, sapa nata thlahpa liata sasyh ativy bâ awpa eima châ bâ khiah ma tah awpaa châ no ta eima phusâ deikua chi hropazy lâta a sie ngâthlâh chy; eimâ pachâpasia awpa apeimawh kaw.
- Kô chareih ta MPSC ry liata sawhkhâ rai lapa liata Marasawzy hlaotloh-na pha kawpa topa ta avaw hlao lymâ pi ta, 2019 lia deikua avaw hlao thei khao mapi; he eimâ vaw hlao khao leina chhâpa he pachâ pasiapa ta tiama papua via heih awpa ta Marasaw achu haipa nata rai atei haipazy hâ haw ei na ta, palôh hmeiseihpa ta ei cha pasyu ei.
- Mara Comedian Search contestant zydua, khokheina chahlâ ei na ta, lymâ he nama zydua ta dao thai awpa châ leipa ta, atahmâ liata lymâ adao leipazy ta aheihpa liata dao thei cheingei awpa ta khokheina ei cha hlâ ei.
(Written by Admin, MNN. Photo source: FC. Minela.)