J. Viaua nata râh kyhpachâna – Revd. NC. Vabeilua

J. Vialua (L)

Atanoh tari 29th Chhiepa,2019 he hla nata bie liata Riahpaw,Marasawzy miah pahratuhpa Puhpa J.Vialua ta chhaolei puasaipa ta,bôhzy lytlâh a khona noh avaw châ ha heih.😭😭😭

Chyhsa ahy rai eimâ piepâ, biereizie, hrozie nôchâ nata hmotaopa hawhta eima chhichâna (background) nata kheihawhpa chyhsa ma eima châ tahpa (eima personality) pahno theipa a châ. He hawna heta Chârotuhpazy chhao ama châbu ropa tawhta ama palôhrupa pahno thei pi ta, hla a phithaipazy chhao ama hla phipa tawhta palôh liata ama veihpa nata ama pachâpeimawhpa zy, kheihawpa palôh ma phaoh ei ta, ama daihti nota hmo yzie kheihta ma ama hmô tahpazy eima pahno thei hra.

Puhpa J. Vialua chhao he a hlaphipa he alai kawpa ta hly pangawh ta (5) pachhaih theipa a châ.

1) Satlia laihsa vâ-iana.

2) Hmotaopa (Nature).

3) Râh kyhpachâna.

4) Lôhliena.

5) Khazohpa lâ hla.

Hezy hry liata eima chu patlua awpa cha RÂH KYHPACHÂNA HLAZY he a châ aw.

He Paper arohtuhpa ta Puhpa J.Vialua Râh kyhpachâna lâchhâh â heihpa ta hla aphipa a hmô theipa rakha cha -9 (hla chaki) a châ.

Chazy cha :-

1) Aolaihnô.

2) Alaipa lai lao.

3) Molah khydi.

4) Hlâno zohna lia charei pi.

5) Na tlôpa chi.

6) Syukizâpa.

7) Paphôh chhielie Vote chhielie.

8) Tupi Kali yrunô.

9) Thyula khaih te.

Note : Sl.No. 1 nata 3 he a bie â lyu kaw. Hla miakhapa khiahma tah theipa a châ. Anodeikua â lyuleina a y hôlô hra.

He hla aphipazy tawhta Puhpa J. Vialua palôhrupa eima hmô theipa rakha zy:-

  1. Marâh râh a hmô zie : Chyhsa hluhpi ta Marâpa râh cha râhchakipa, bypi phapa y leina su, râhchhie baohrupa hawhta eima hmô hnai no ta J. Vialua deikua Marâpa râh he chô Khazoh ku hria phapa nata noâhchhihpa, he hawhta râh phapa he vary khizaw liata hmo awpa a y leipa hawhta a hmô. J. Vialua ta Marâ râh moh a bipa cha “Pentikaws râh” a tah. He tlupo ta â ngia a tahpa nata râh khochhihpa ta a hmôpa râh liata a charei pasi leipa deikua saihei â chhih ngâsâ. Puhpa J. Vialua ta cha Marâ râh he a palai khei ngâsâ. He râh he sahrâh (Râhsa) laina su châta, Thlihua naizualuah pathlina, sopavaw chito hla paryhna, pawngia to pawhna, thokô ngia ngaitapa hluhna râh, vatie ti pasohpa lona râh, lôh paliesa rili awpa ta nopi meithâh â zawhna râh a châ. Râh a hnei tuhpa thokha ta Marâpa râh puasai ta râh hlapi lâ a sie khoh kawpa ama y nota Puhpa J. Vialua deikua Marâpa râh he âdai thei vei. “Loleipa ta pawh patly la…..” tahpa ta a awsao. Loleipa ta a pawh patly awpa he Khazohpa raopa hawhta khâchâ a pachâ.
  2. Marâpa râh cha chariahzy ta ama dôh hapa, pachha â ngiah kawpa hawhta a hmô.“Viapa kalâ tlaikao chariah miah dôh ei,” a tahpa zy, “ Ei sai châh ei pina râh he, chariah chichhihzy ta chadô ei,” a tahpazy, “ Thyutlia riahpha vaw thyu te u, Eima râh pachha â daih he zaw,” a tahpazy tawhta Marâpa cha chariahpazy vâta thlalôh â chhih khao leipa ta a hmô.

Eima thyutlia a thai a sopazy, râh chhihthatuhpa nata officer eima hneipachhôhpa zy ta eima râh duasu he kheihta ama hmô hraw vâ tahpa he pachâ lei theipa châ vei.

  1. Marâpa râh cha chariahzy ta dôh khai ha hra ei sala, a râh chyhsazy deikua â pahno thai leipa hawhta a hmô.

“Avy ula pachâ khoh tua suh u,

Eima râh he tyungia rai aryh khao vei.

Eima râh pachha â daih he zaw !

Aolainô Meithei a chabapa ta…..”

a tah . Marâ râh duasu a hmôzie he “a do vei” eima t’aw mâ, “a do” eima tah aw. “A do” eima tah khia pabohsana lâthlôh tlua â daihpa a châ thlyu aw.

  1. Marâpa râh cha adyuhna su (battlefield) hawhta a hmô. Puhpa J.Vialua ta Marâpa râh liata adyuhna a hmôzie cha. A râhchhô liata a pahrâpazy aryh leina tawhta â thaopa châ leipa ta, khôtholâ chyhsazy ta he adyuhna he ama pathaopa hawhta a hmô. He adyuhna vâna heta Hâra, dychhie, nôhmeipazy ta ama tovyuh dopa to khao leipa ei ta, phuhlana ta eima râh bie ta, Marâpa chizy cha maniah pachhaih ei ta,(molakhydi 2nd stanza last line) he hawhta eima sie lymâ khia cha Marâpa chi he eima lei dâhdei aw tahpa a hmôzie a châ (molakhydi 3rd stanza 3rd line) he adyuhna vâta Marâpa sawzy eima pachhaih thei dâh cha khizawpa hmo nata py lia dei châ leipa ta, eima Khazohpa eima chhyna nata thlahpa lâ hmolia chhao taih a chhaihna a tlôkhei tahpa a cha: “Marâ chi zydua miah pachhai khai, Achhyna o Maisah taih patlaw,” a tahpa he ta a palâsa pasia ngâsâ.
  2. Puhpa J. Vialua palôhrupa liata a sia ngaitapa ta ei hmôpa cha: “Marâpa râh he eima mahnô mahpaw zy ta thisai ta ama chaleipa a châ,” tahpa he a châ, (thyula khai teh 2nd stanza 4th line) Anodeikua khichhai Marâpa râh ta hnei ta, maniah tlô ta, maniah nie chie ei ta, eima rei thai a chhuah leipa ta, maniah hneipa ta, keimo hra cha ama reih cheikhei pita, Utu châchie lâ â liepa hawhta, khichhai reih cha eima chhôhkha liata tlao eima hmâh. Chanô ta a maophyuh nawpa nata a mohchhie nawpa a pahno thai leipa hawhta, eima vaw châ hapa he a vâ â sâh chaina a châ. Marâpa râh he chi hro phopa ry lia ta a y pathlei aw tahpa he a chi ngâsâ. “Marâpa râh he pho hropa râh rai ta châ vei,” a tah.
  3. Marâpa râh chhôh liata a pahrâpa chyhsazy a hmô zie :

1) Zawpi : Ama chhie nata pha pahnona pasohpa a hmâ thai leipa hawhta a hmô ei.

Paphôh chhielie vote chhielie tahpa a reizie he ta a palâsa kaw.

Khâpa Dyuma ama pari khai ha tly?

Ahy ma adyu ei, ama tlâh thai khao vei tly.

Paphôh chhielie, vote chhielie,

Chakhei chhielie, vote chhielie.

Zawpi zy cha â taopahthi thai khao leipa, dyu thaipa ta ama dyu hapa hawhta hmô ta, a rei pasiana châ ta bieso a hmâh.

“Zôh chazai la â thla na, kôh ta arô dei tlyzaw” a tah : Zôhri ta hmo a chazeipa a pathlâ theipa a châ. Bia kôh ta a rô hapa deikua taopathi thaipa rimâ châ khao vei. Zawpi palôh cha, Kôh ta Bia a rôpa hawhpa, rao khai ha ta, taopathi thaipa châ khao leipa hawhta a pakhopâ.A kho leipa, paphôh chhielie, chakhei chhielie vote chhielie a tahpa rei pasia nawpa ta “Khapa kôh ta ma a rô a vote ngâthlâh ha chy, Anô chhôhchhi a paw ryhtly a pathlei khoh vei,” tahpa bie atlâh pakyuna châ ta a hmâh. Khizaw sôh vâta ama palôh a rao khaipa hawhta a hmô (a laipa lai lao).

2) Râh chhihtuhpa zy : Ryureihtuhpazy ta Khazohpa china âphahla ei ta, dychhiepazy tlybai ei ta, phula hmâ ei ta, ama ryureina ry liata a laipa lai lao ei ta, dychhiezy ama rie thei rili. Hâra dychhiepazy châ râh hmasiena lia tovyuh hnei khao veih ei. Adona nata ngâchhina â phahla ei ta, a rulâ ta hmo moleipa tao ei ta â papeisa veih ei,” tahpa he atlâhpakyuna cha ta eima hmâh aw.

3) Dychhie, Nôhmei, Hârapazy : Puhpa J.Vialua palôhrupa liata dyhchhie, Nôhmei, Hârapazy thapasana a hneizie a hla tawhta eima pahno thei aw. J. Vialua palôhrupa cha, râh kyhpachâna, chi nata pho abohna nata dychhie, Nôhmei, hârapazy he pachhaih thai lei awpa ta khâchâ â phâpapa a châ. Dychhiepazy he ama châhrôh ta, ama case he champion khei achhuahpa ta a paro ngaitapa ta pyungia hmâpa ta a awh papua. Bierei thai, ryurei thaina, hlaphi thaina, hlasa thaina etc. talent chi nano nanopa khazohpa ta a piepa.

Marâpasawzy hry liata Puhpa J. Vialua tluta rietheipa case thapi a phiakheipa he y tlâ thlyu mapi tah theipa a châ. He a palôhrupa he “Alaipa lai lao,” tahpa hla liata eima hmô thei.

ZAWPI TA VIALUA AMA PAHNO CHHEINA

Marâpa zawpi (thokha) he paper arohtuhpa tlai chhao ta Puhpa J. Vialua hla nata bie liata pahnochhheina eima hneipa ta â lâ.Zawpi ta J.Vialua, a hla nata bie eima pachâna dâh tlâhpipa;

1) Zyhna kyh a uasa leipa,

2) Hla thuthâ leipa phi ta, a sa tyhpa

3) Rah chhithatuhpazy a reipachhie thaipa

4) Ahla nata bie, a palôh ta a veipazy cha, hlapi biepi ta la tlâh lei awpa hawhta pachâna a lai kawpa ta â lâ.

Anodeikua zôpha kawpa ta a hla nata bie eimâ chu tita deikua he pachâna zy he a vaw do khai vei tahpa eima pahno. Khâzia ma he hawhta pachâna he zawpi ta eima hnei eima tah khiah cha, hezy he a chhâpa zy a châ thlyu aw.

1) A sâkhana liata cha a hla nata biezy he a chu pasia leipa pita, lâpaw tawhta eima pahnopa rakha liata pachâna eima tao tyhpa vâta a châ. A chhuahpa pahno leipa pita, keimo ta he he khiahma â chhuah tah pita, hnabeiseipa ta bie eima rei tyhpa vâta a châ. Eima pahno chhei chaipazy cha.

a) Syukizâpa

b) Na tlôpâ chi

c) Alaipa lailao.

He hla sathôhpa he eima pahno chhei chainapazy achâpa ta âla. Eima râh politician zy a thata areipachhiepa nata a taochhiepa hawhta pahno pita, politician thokha, party liata apahâh viapa thokhazy nata educated thokha chhao ta pahno a tah pita eima reipachhiena chaipa a châ.He he hlaphituhpa ta â chhuahpa pahno leipa pita, eima pachâna hawhta eima siekhei vata a châ.(pakah ta bahta ei reih pakawh tua aw).

2) A reihkah hmâpa tawhta : Puhpa J.Vialua hla liana heta, Marâpa reih, Marâpa biechhypa eima hneipa ropa (written) ta hmô awpa a y leipa nata eima roh sisaw leipazy he a chhuahpa reipasia nawpa ta a hmah.He he thokha cha eima khoh thai leipa vata ahla dua ta eima pasô leina chhao a châ tlamaw thei eg. Na tlôpâ chi, “Na niechiepâ chi, Na sôpa chi” tahpazy, “Syukizâpa, hrailâ zâpa, tahpazy hih Reikah chhiepa, nozachhihpa hawhta eima pachâpa vâta a châ thei. He dei châ leipa ta a palôhpasana reipasia nawpa ta reihkah pasapa hmâpa a chado vei. “Dychhie, Dyhru, Ochaki, Ochabâh hnoh chyhsa do ngâsâpa a palyusa hra… Ei saw nie chi ei vah nie chi, khâpa he ma na ngiabâh ngâthlâh ha to” tahpa reihkah zy he eima palô maniah a chhuhnoh kawpa vâta , a zydua ta eima pachâna dâh â do khao leipa vâta chhao a châ thei.

3) A private life vâta chhao a châ thei: Puhpa J.Vialua he biedopa ta apahnopa nata ano ta pha atahpa liata cha molai mochyh tah leipa ta, arypaoh ma rypaoh vei ma tahpa chhao pachâ hlei leipa ta a reih ngâhpa nata riahpha ngâsâpa ta aduakhei ngâpa a châpa vâta thokha ta cha a hla nata bie he biepi hlapi ta eima la leipa chhao a châ thei

Awnanopa liata chhao â hmâh hlei leipa ta, a hro â pahnie leinazy eima pahnopa vâta chhao a châ thei English literature liata chhao Samuel Tailor Coleridge zy chhao a private hro liata khâpa hmah rei tlâh y hra vei. Anodeikua English Literature liata cha moh â lâ phapa a châ. Farewell to arms Novel a rohtuhpa Erneest Hemingway chhao châbu a ropa cha zawpi a pasô ngaita ei ta, Literature liata Nobel prize taihta a hmô phapa a châ. Châhrasala kô 1961 liata a chhôhpadâhpa liata â kasao thlâh ha. Hmotaopa pasô tlâh a châpa nata talent a hnei phapazy pakhâ nawpa ta chhaichhi ta private life hmâ awpa deikua â do chaipa châ thlyu vei. Zyhna kyh he Lliterature ta thlie a ryhpaoh thai leipa ta, Literature chhao zyhna kyh tawhta thliepa he a do thai hra vei.Hmo nano nanopa, pahlao pahli lei awpa eima pahlao nahta khizaw chhiesana liata a pao chiehpa a châna nata, chyhsa hry liata pha pakipa eima y leizie a vaw lâ ta, buakhei lei awpa buakhei pi ta, atymâpa ta eima y tyh.

PUHPA J.VIALUA HE KHEIHHAWHPA CHYHSA MA A CHÂ?

Athaona liata reih ha pi ta, hla a phi thaipazy he ama hla phipa tawhta kheihhawhpa chyhsa ma châ ei ta, khâpa ma ama palôh liata y ta, khâpa palô ma ama phaoh tahpa eima pahno thei Puhpa J.Vialua chhao a hlaphipa tawhta a palôh phaozie eima pahno theipazy :-

  1. Marâpa a pôhkhana (Unity) a pasâhsa.
  2. Khihtlâh moleina (Socialevil) a dyutuhkhohpa a châ eg. Nieparu bawparuna, dyhchhiepazy tlybaina etc)
  3. Chi nata pho thapasana ahneipa (Nationalist) a châ.
  4. Hla nata bie (Literature) apahâhpa a châ.
  5. Khizaw liata hmotaopazy a pasôpa chyhsa (Naturalist) a châ.
  6. Hlaphi thaipa (poet-Song composer) a châ.
  7. A nah a tla leipa cha anosasyh chhao, mohropa rai chado leipa ta, reikah pasa ngâsâpa ta a reih ngâhpa, chyhsa riahphapa a châ.
  8. Lôhliena a hneipa chyhsa a châ.
  9. Chi nata pho thapasana a hnei ngâsâpa (Communal feeling) a hnei kawpa a châ.

PUHPA J. VIALUA NATA MARÂ ZAWPI

Puhpa J. Vialua hro nota he tlupo ta zawpi ta thapasa aw ei ta,ama pasâhsa aw tahpa he vaw pachâ beih vana. Anodeikua a vaw thi tawhta zawpizy ta ama pasôzie nata ama pasâhsazie cha âvawlâ ngâsâ. Marâpasaw foreing liata a ypa zy dei châ leipa ta, Marâpa a châ leipa zy chhaota ama pasaih leizie nata pei ama tahzie taokheina Email ta thata ama vaw paphao (Puhpa C.Simona ta cha Condolence Message Email ta a vawtlôpa zydua he 2000 râhchhôh a châ thlyu aw, a tah.) A ri yno cheingei ta su nano nanopa liata taokheina programme chhao ama hneikhei tahpa eima pahno. Zawpi ta puhpa J. Vialua ama pasâhsana chhâpa he “A hlaphi thaipa vâta nata a hlasa thaipa vâta a châ” eima tah thei aw.

Atanoh Art & Culture Committee chhaota J. Vialua hlaphipa kyh liata Seminar eima hneipa kyhzy chhao he Marâpasaw hry liata cha a patlua patlâpa (Extra –ordinary) a châzie a palâsa hra. A ri apabutuhpa ei châpa chhao ei ly kaw. Ei hmô phana liata cha rikô liata Pawpi ama piepa chhao Siaha khihpi liata cha a hluh chaipa ta ei pahno.

TLÂHPAKYUNA:

Râh kyh eima pachâna paluahsa nawpa ta thokha cha Platform pha kawpa eima hnei. Politician zy châta chhochhi cha reikah chhiepa châleipa sala, ama nietluana a châ. Râh kyh ama pachâna cha a hy riah hmah chileipa ta, ama kho dâh hawhta reithei ei ta, ama khoh khiah a bu ta chhao ama papua thei. Puhpa J. Vialua ta râh kyh a pachâna palâsa nawpa ta Platform a hnei chhôhpa cha Hla ta Phi ta, a sapa he a châ.

A hla hmâpa ta eima râh sôhzie nata phazie miah chho ta, a hla hmâpa ta eima râh raozie nata chi hro pho hropa ta sei ta miah ama tao daihmâ tahpa miah chho ta, a hra ta, pabosa bâ awpa ta miah awsao ta, tharôhpa hmâh thlâh awpa chhao ta miah a pasyu. Eima râh kho â chhihzie miah chho ta, châhrasala ryureina nata zawpi â doleina vâta sapa kyh lia dei châ leipa ta, thlahpa kyh lia taihta eima raozie miah a chho heih.

He Marâpa râh kyh a pachâ ngaitapa, phazie zy ângiazie zy, hmiahaopa ta a pahnie daihmâzie zy, ahra ta taopathi a byuhnazie zy, zawpi ta pahno thai sihla, tahpa a khohtu hapa vâta a reika hmâpa thokha he pasa ta, a palôh pahnothai leipa zy châta cha ahao â chhihhna chhao a y tlai aw. A vâsâh tu hapa vâta reikah pasapa a vawhmâh pathlei hapa chhao ta a palôh pasazie eima pahno thai ha khiatala “Mao vei” t’awh pi ta, he reikah hmâpazy vâta tlao eima pasô rilina daihti chhao a y thei aw.

Marâland kyh he Puhpa J. Vialua ta y khei ta, chareikhei ta, a môkhei ta, he râh kyh a pachâna he hla ta phi ta, sa ta, mohropa pahra pachhuah ta awhsâh ta, reikah chado leipa ta a râh zawpi miah pahra â chhuah. Zawpi eimâ hrana tlâh cha a hawhtu pathlei aw tahpa pachâ chhie â chhih kaw.

Vialua ta Penticost râh a tahpa kyh a pachâ ngaitapa cha MARALAND he a châ.

Leave a Reply

Your email address will not be published. Required fields are marked *