Puhpa K. Vanlalliana ta Teacher zy apakyh

SIAHA, 29 Chhiepa, 2019, Pachynoh – Puhpa K. Vanlalliana, Senior Education Officer, MADC cha Lôpu khih liata MADC Education Department nata MSO Sub-HQ: Zyhno apakaohpa ta pachhuahpanohla Education Awareness Campaign hneipa liata Guest of Honour châta hruapa châ ta, târi 27 Chhiepa, 2019, Pobieh noh, Lôpu khih tlô zâ liata MADC ry liata Pachutuhpa (PS & MS Teachers) zydua awpakhypa ta apakyhna a hnei ei.

Puhpa Beirôkhu Beitâ, I & PO, MADC ta Chairman châpa ta Meeting he chhihtha ta, Rev. A. Zawngia, ECM Lôpu biatuhpa ta Devotion a hnei.

He meeting liata atakô Teacher lathiehpazy nata Teacher a châ ngâhaipazy ahlaopha kaw ei ta, Puhpa Vanlalliana ta pasyupalina bie nata biereina chyupa a hnei. A bie reipa thokhazy ary liata palâsapa a châ:-

1). MADC ry liata School zy he Teacher adaih leina vâta rairuna eimâ tyhpa hawh ta rei pachhie hlao tyh pi ta, Mizoram sawhkhâ ry liata School hluhpi cha School sâ 1 liata Teacher pa 1 ngâlâh ama yna su zy y ta, cha zy pachâpa ta cha MADC ry liata Teacher zy he eima hluh kawpa ta ei pahno.

2). Atakô Teacher lathiehpazy ta kheihawh khih lia rai post pa ama châpa chhao ta papeisa leipa ta aly kawpa ta ama hriana awpa School liata apazao lymâ ei ta, aly’pa a châ hmeiseih. Induction Training liata eimâ pahnosa khai hapa hawh ta Teacher thiehpazy ta eima râh kyhpachâna chô ta eima post su liata Missionary rai hriapa hawh ta eima hria chyu awpa ta eimâ haw hmeiseih.

3). Eima râh liata Siaha khôtho lâ liata Teacher hluhpi cha hlao la awpah ta Siaha lâ azu ei ta, hlao raih daihti lei liata Siaha ama za tlô vâta hlao raih daihti a tlô hlâ via cha Siaha liata noh hluhpi ama châh abyuh tyh; cha no ta siku hawhtizy deikua thata rairuna amâ tyh ha tyh; he hawhpa taozie he pathleih laih abyuh kaw.

4). Teacher zy châta subject atlyhpa ta Training aw tyhpa châ ei ta, School thokha liata cha ama pachupa Subject a châ leipa chhao ta Siaha liata ama y chho no a châ khiah cha Teacher cha Training awpah ta amâ ngiapâ thai kaw; he he Training ta â chhuahna châ lei ta, Pachuhpazy ta ama pachupa Subject nochâ kha pahnopasia via heih awpah ta amâ Training cheingei awpah tahpa tlao a châ. Atahmâ tawhta cha mo hropa apa training chakiesa hawhpa he tao khao lei awpah a châ.

5). Vyuhpa ta pakiasapa he pasai leipa a châ. Sapa chieh leina vâta nata tlâh leina kyh deikua biehneituhpa lâ tlôkheipa ta ryhraona mokhei awpah châ ta, sasyh ta vyuhpa pakiasa awpah tlua laihpa he pasaipa châ vei.

6). Lôpu khih he Odyh 210 châ ha ei chi ta, Mararâh, thotlâh khih liata cha Odyh hluh chai py nama châ; anodeikua achuna lâ deikua, nama polulation pachâpa ta hnohkhaw chaipa khih nama châ tah thei awpa a châ; atakô Teacher lana liata Lôpu tawhta manôh 3 apply hra ei ta, khih hneituhpa tawhta candidate zy cha khokhei viapa ama châ vâta Mark 200 liata Mark 10 cha pie chhieliepa ama châ. Cha no ta Lôpu post liata Lôpu chyhsa pakha chhao atloh theipa nama y lei vâta atahmâ he khi hropa chyhsazy ta Lôpu liata pachuna rai ama vaw hria awpah a châ; Lôpu khih chyhsazy namâ hra â daih hmeiseih.

7). Educational Awareness Campaign eima pachhuahpanoh daihti liata Nô nata Paw zy ama peimawh kaw; Nô nata Paw zy ta saw nawhzy amâ chuna liata eima pahâkhei leipa nata eima mokhei vei khiah hmialâ daihti liata eima sawnawhzy cha eima palôrie maniah patheituhpa ama châ ngyu thei; amâ chuhaino, atahmâ he eima tiama awpah abyuh hmeiseih.

Puhpa Vanlalliana he ta Lôpu hleikhô ta Miepu nata Vahia liata amâ pahâna liata Primary School nata Middle School liata Teacher nahzy apakyhna hnei laih ta, MADC ta achuna liata hmah lana kao nano nanopazy rei pasiana hnei laih ta, teacher nahzy amâ thôhkhei kawpa ta pahnopa a châ.

(Written by BeiRôkhu Beitâ, I & PO, MADC.)

Leave a Reply

Your email address will not be published. Required fields are marked *