Puhpa K. Chhuabei ta Chakhei-Siasi Road chôchâh liata Press chyhsazy â pakyh

SIAHA, 8 Khihpa, 2019, Hriatuanoh – Atanoh nohchhô dawh 12 Noon liata Puhpa K. Chhuabei, EM i/c PWD etc. ta Press Meet awpa ta CEM’s Conference Hall, MADC Complex liata Media chyhsazy apakyhna a hnei.

He â pakyna liata Puhpa Chhuabei ta Chakhei to Siaha Road chôchâh liata Social Media liata reirâna a hluh kawpa vâta nata biedopa, zawpi ta eima pahno abyuh vâta Press Meet he a awpa a châ.

Puhpa Chhuabei chata reih ta, Chakhei to Siasi lâpi he kô 2012-2013 tawhta MADC ta vaw buakhei pathao ha ta, Concept Paper nata DPR zy chhao MADC ta avaw taopa sai a châ a tah. Sawhkhâ ta dâh nata phôh a hneipa hawh ta eima Concept Paper zy chhao Mizoram liata Puhpa Lal Thanhawla sawhkhâ ta maniah khokheipa ta hiakheina châ chhao maniah a vaw rohpa hra tahpa ta a reih.

He Project he DoNER ty liata NLCPR sôh ta hria awhpa ta hnabeiseihpa a châ tarawpa ta NLCPR cha pachhâsapa vaw châ ta. Ministry hro lâ hia awhpa ta chhosie(advise) -na daopa a châna hawh ta Puhpa Lal Thanhawla pahnokheipa ta Puhpa K. Chhuabei chata Puhpa Arvind Ray, Chief Secretary, Government of Mizoram a hmô ta, hmo yzie zydua a vaw reikhei.

Puhpa Arvin he ta Ministry of Road Transport & Highways, New Delhi lâ châ rohpa ta Siasi he India nata Myanmar Border liata ypa khih châ ta, khih pachâ peimawh byuhpa a châ tahpa roh ta, he hleikhô ta India nata Myanmar châta Border Trade taona awpa su peimawh kawpa a châ zie roh ta, Special Case ta apyhpa awhpa ta nata Ministry of Road Transport & Highways tawhta sôh kaw pachâpa awhpa ta târi 27 April, 2018 pa ta âhawna (request) a vaw taopa a châ.

Puhpa Lal Thanhawla chhao ta târi 19 June, 2018 liata Puhpa Yadhvir Singh Malik, Secretary, Ministry of Road Transport & Highways hnoh ta ahawna châ a vaw roh heih hra.

Târi 3 September, 2018 liata Pihnô Florence Zotluangpuii, Joint Secretary to the Gov’t of Mizoram tahwta Director General & Special Secretary, Ministry of Road Transport & Highways, New Delhi lâ ta Chakhei to Siasi Road Concept Note châ a za paphao (Submit) haw.

Vâhnei chhih kawpa ta târi 28 October, 2018 liata Central Road Fund (CRF) sôh hmâpa ta Chakhei to Siasi Road cha chao/chhia awhpa ta Secretary, PWD, Gov’t of Mizoram hnoh ta châ ama kaw paphaopa a châ.

He thâtih theipa a châ tawhta Puhpa K. Chhuabei, EM i/c PWD chata Chief Minister Puhpa Zoramthanga ahmô awhpa ta Aizawl lâ sie ta, Chief Minister a bua kawpa vâta Adviser to Chief Minister ahmô ta, Chakhei-Siasi Road he MADC Project taopa a châna hawh ta MADC ku liata hlâ awpa ta a vaw hiah.

He daihti liata MLA Election ama phuah hapa vâta Election Process a chhâ hatua leipa ta cha he Project he MADC ku liata soh awpa nata soh lei awpa sia thai mâh vei tahpa ta â vaw chhy. Anodeikua he Project he Mizoram sawhkhâ ta buakhei leipa ta, MADC ta âthaona tawhta a buakheipa a châ vâta MADC ta a hria nahta hnabeiseihna a y zie a vaw reih.

MLA Election Process vaw chhâ ta, he Project hria awhpa ta thla 3 chhôh liata rai athao awhpa tahpa châ ta, atahmâ thla 3 a khô hapa vâta revalidate heihpa a châ. He chôchâh buakhei awhpa ta Puhpa N. Zakhai, CEM nata Puhpa K. Chhuabei, EM i/c PWD, MADC zy ta Adviser to Chief Minister ahmô heih ei ta, ano chata hmialâ liata MADC ta nama hria awhpa a châ a tahpa cha a bie vaw panano ta, biechhâna a taotuhpa cha Chief Minister a châ tah ta, ano advise hawh ta Chief Minister amâ hmôpa a châ. CM Puhpa Zoramthanga hnoh ta Chakhei to Siasi Road he MADC ta abuakheipa a châna hawh ta MADC ku liata 100 liata 100 pahnieh awpa ta ahawna ama tao.

Puhpa Zoramthanga chata amâ hawnazy vaw papeimawhsa kaw ta, anodeikua Centre sawhkhâ ta Mizoram PWD ku liata kaw pahnieh ha ta, chavâta MADC pahriasa thai khai awhpa a châlei zie reih ta, MADC Project taopa a châna hawh ta su 3 liata su 1 cha pahriasa hra awhpa ta a vaw paryhsa vâta alynabie chhao ama reih ngâ kaw hra.

He hawh ta bie huthâh asie hai no ta Mizoram Sawhkhâ Session hnôchaipa liata Chakhei-Siasi Road chôchâh liata Puhpa Ngurlianchunga ta hiahrina tao ta, Puhpa Zoramthanga ta â chhyna liata cha he Chakhei to Siasi Road he cha Crore 40 hlei mâpa a châ vâta MADC zy pahriasa chakhyh thai awpa châ vei tahpa ta a reih ta. Chahleikhô ta he Sanctioned he eima official nah eimâ chahraoh vâta a kaw pua theipa a châ tahpa ta reih ta, he he bie dopa a châ leizie, Puhpa Chhuabei ta a reih.

He chôchâh liata Puhpa Chhuabei ta Puhpa Zoramthanga cha phone liata bie a chho ta, Puhpa Zoramthanga chata a bierei hmiatuapa ‘MADC ta su 3 liata su 1 nama hria aw’ a tahpa bie cha â sysai hapa hawh ta â kaw chhyna a châ.

Puhpa Chhuabei chata, atanoh Press Meet liata reih ta, sawhkhâna cha kheihawhpa rai Mizoram liata vaw tao hra ei sa la, minority zy kyh maniah pachâtuhpazy cha ama hmotaopa liata â lâ tyh. Puhpa Lal Thanhawla sawhkhâna kha ta RKVY zy, SSA Mission nata Centre Scheme nano nanopa, eima hria beih leipazy maniah pahriasa ta, pasai kawpa ta maniah a pie no ta Puhpa Zoramthanga deikua, keimo tlaita Project hria awhpa ta eimâ taopa nata Concept Paper lia chhao ta MADC ta Work Execution a siekhei awpa tahpa rohpa a châ thlâhpa chhao ta, he hawh ta eima ku tawhta maniah a chhu khoh thlâhpa he no-âh a tah zie reih ta, keimo Mizoram chhôh liata Minority zy kyhpachâna rai rai a hneileipa hawh ta a pachâ zie a reih.

MADC he ta State Finance Commission tawhta sôh a hmôpa hleikhô ta sôh hropa a hmôna awpa y leipa ta, chavâta Centre Scheme tawhta sôh hmô thei hra awhpa ta a khaohrâ laih tyh ta, atanoh, he hawhta hlaotloh-na ama to nahta Mizoram State liata nôpaw chaipa ta maniah chhu khoh-na palôh a phaoh thlâhpa he a no a âh zie a reih.

He hawhta Puhpa Zoramthanga ta, a eih pachaipa ta Marasawzy maniah a tahkhohna nata maniah a mohnaona reikah, Assembly Hall tawh tlaita a reipa he Marasawzy châta vâdua â chhih hmeiseih tahpa ta reih ta, hmialâ eima sie lymâna awpa châta chhao hupo â chhih zie a reih.

Atanoh Press Meet liata MJA Member zy akipha kaw ei ta, khitlyna vâ nata tlâh-leina vâ tah deileipa ta cha Siaha liata MJA member zydua ama pua thei khaipa ta pahnopa a châ.

Leave a Reply

Your email address will not be published. Required fields are marked *