Ary liata palâsapazy he târi 7-13 Khihpa, 2019 chhôh ta Evangelical Church of Maraland, Headquarters thâtih thiehpazy nata Mission chakaona thâtih thiehpazy a châ.
1. MODERATOR:
Rev. C. Beima, Moderator ECM cha Târi 20-21 July, 2019 liata Shillong Mara Church apôkhana alyna program hmâkhei awpa ta târi 17 July, 2019 liata Siaha puasaipa ta a sie aw. Rev. Dr. S.T. Zawsi, Executive Secretary i/c Education chhao a sie hra aw.
2. EXECUTIVE SECRETARY (MISSION):
Rev. T. Salaw, Executive Secretary i/c Mission cha atahmâno he ta Presbytery No.V Nôpawpazy nata Pakao Prayer House atly awpa ta a sie ngâhaino a châ. Târi 15 July, 2019 (Hriatuanoh) liata Siaha vaw lie heih awpa hnabeiseihpa a châ.
3. TIWA MISSION:
1). NLHS Holiday: New Life High School châ tahmâno he School holiday hmâ haino châ ta. Abeipa ta âryh atah khiahtala August nohkha noh liata class ama pathao heih awpa châ ta. School holiday chhôhta achuhaipazy ta hnatlâna phapazy ama vaw hnei thei lymâ nawpata thlachhâkhei ei suh u.
2). Bâti pachâsa: Pahânoh liana khata. Krombaroh local church liata manôh pakha Bâti pachâsapa châ ta. Rev.Anil, Treasurer, TEC ta Bâti a pachâsa. Angiapânazy a i via lymâ thei n’awpata thlahchhâkhei ei suh u.
3). Outreach Programme: Abeipa ta âryh atah khiahta cha Tiwa Evangelical Mission cha hâta heihpa tawhta Outreach programme hmâ pazao heih awpa ta apatohpatia haipa châ ta. Mission field liata Hriatuhpazy ta hnatlâna phapazy vaw hnei ei sala, a daihti ta liata ama sie thei n’awpa ta thlahchhâ khei ei suh u.
4. MISING MISSION:
1). Târi 7.7.2019 liata Koliya tawhta Raj Mili, kô 15 u theipa cha Zisu Krista Abeipa nata pachhatuhpa angiapâpa ta Rev. L.Lychhua, FD ta bati a pachâsa.
2). Târi 6.7.2019 liata Mising Field Local Evangelist, Babasingh Doley paw cha a pahâ ta, ano he krizy leipa a châ. A siesaipa chhôhkhazy châta Abeipa chhithana ama to lymâ thei n’awpa ta thlahchhâkhei suh vy.
3). Ls. Maimai, Singapore liata a ypa chata Masgaon Achhyna O compound dô n’awpa ta Rs.5,000 baona vaw pie ei ta. Mising Evangelical Mission chata eima Beipa Zisu Krista mohta alyna bie ama reih hmeiseih.
4). Târi10.7.2019-pa ta outreach ministry group sâsari (7) ta pachhaihpa cha chakaona hnei pathaopa châ ta, he he 20.7.2019 taih ta hnei awpa a châ. He programme ama hmâ chhôhta Abeipa chhithana phapa ama to chyu thei n’awpa nata ngiapâ thiehpa ama hmo thei n’awpa ta awnanopazy thlahchhâkheina maniah amâ haw.
5. ARUNACHAL MISSION:
1). Dimbwe missionary’s Quarter: Awnanopazy thlahchhâkheina vâta nata apasaih kawpa ta hmosai apietuhpazy vâta 4 July 2019 pa liana khata Dimbwe liata Missionary’s Quarter sa ngâhaipa cha patlô hapa a châ. He Quarter sapa a vaw châ chhôh zydua liata hmosai pietuhpazy, tha lâta rai abaotuhpazy nata tiama ngâsâpa ta Quarter sana rai ahriatuhpa Arunachal Missionary-zy chô liata Field Director Rev. Telung Chozah nata chhôhkha ta alyna bie ama reih hmeiseih.
Tawhtala, 6th July 2019 liana khata Missionary T.T. Nôkhei chhao Quarter a tlôh pa ha hra ta, he noh lia pyly heta Abeipa lâta Alyna bie reina thlahchhâna program pha ngâsâpa hneipa châ ta, Missionary T.T. Nôkhei ta he program avaw hlaopa zydua châta za pati pahâh ngâsâpa a pachhuahpanohpa hra.
2). Meika Vaduana: ECM Mission Concentrated Area liata Duraliang Awnanopa Pastor Gogoi o cha vâdua chhih kawpa ta mei ta a kâ. He o kâna daihti he zâ daw 11:30 Pm rachhôh liata hmo tlôpa châ ta, vâhnei kawpa ta a chyhsa pahrâpazy cha hmaphao hraoh leipa ta aboh ei ta, ama hmoh hneipa zydua deikua cha mei ta akâ pathlah khai ha. He vâduana he pahnopa a châ tawhta Field Director nata Missionary-zy ta vâdua atyhpa chhôhkha zy va tly ei ta, Missionary chhôhkha zy ta ama hmo hneipa tawhta ama thyu pakhypa saphâ bag 1, Chysia, pôphaw, Lahuah, beiphia nata o chhôh hmobaoh peimawhpa hmâ awpa zy ama pie. Tawhtala, Pastor Gogoi nah chhôkha ama pahra n’awpa o sa n’awpa châta Arunachal Mission relief fund tawhta Tho cubit 38 nata Cement Beg 5 chaleipa châ ta, meikâ vâduana atyhpa chhôhkha zy hnoh ta hlâpa a châ pâ hra. He Relief fund he Director nata Missionary zy su hraw sukha tawhtapa a châ.
3). Thlahchhâ khei ahawna:
(1) Khoraliang khih pa Mr. Padam Bahadur, kô 72 ta uhtheipa he Hindu pa châ ta, a pachao pasana vâta Missionary zy thlahchhâpa awpa ta â vaw haw. Khoraliang khih liata pa Missionary Bonny Laltlanliana ta thlahchhâna hneipa ta liasah avaw tlâh via ha bâ. Aku liata â ky tyhpa Tabi (dei hmotao theina) chhao athy haw hra. Zisu Krista mo rôhnana châ ta Mr. Padam Bahadur he tlâhna a vaw hmô thei n’awpa châta Awnanopa manôh zydya nama thlahchhâ kheina amâ châ haw ei.
(2) Mr. Fagrul Islam nata alahpinô, Mrs. Patima Begam chhao he Muslim châ ei ta, sapa tlâh leina vâta Missionary zy thlachhâkhei awpa ta ama vaw haw hra. Atahmâ he Missionary zy ta house visit nata thlachhâna program ama hmâhkhei ngâhaino a châ. Krista khihnarah avaw kaw via lymâ thei n’awpa châta Awnanopa manôhzy thlahchhâ kheina maniah amâ haw.
(3) Mr. Nuamso Thalai he ahripa ta a pabua tyhpa châ ta, Changliang Prayer Center liata chhhao tlâhna hnabeiseihpa ta avy khei ei ta. Abeipa ta Chaliang Prayer Centre liata hriatuhpazy chakaona byhnâ pie lymâ ta tlâhna chhao a vaw hnei hapa a châ. Chârasala, a pasana a pua pakhua heihpa ma a châ tly, atahmâ he o a puasaina tawhta adi khao leipa ta, achhôhkha zy ama palôrie athei ngai ta. Mr. Nuamso Thalai he a tlâboh kawpa ta hmôpa a châ thei n’awpa ta thlahchhâkhei ama ngia ngai ta kaw.
6. ODISHA MISSION:
1). Târi 9th July 2019 ta a ei kha n’awpa ta Kandhamal Dist lâta Local Evangelist la thiehpazy nata Missionary nah zy Pastor Beirôna Hlôvy o liata chakao n’awpa dâh apasyuna nata thlahchhâ paraohna hnei ei ta, thopi nata â hmie chhaota daihti pha kawpa ama hmâ.
2). Miriapanga khîh House Church liata Local Evangelist Mishra Digal nata Evan. S. Laduhawma ta chakaona ama hnei chy aw.
3). Pastor Beirôna Hlovy, Evan K. Maduati nata Local Evangelist Kailash Digal zy ta Bereshit Church, Karnetpur nata achheipa liata chakaona ama hnei chy hra aw.
4). Local Evangelist thiepa ama hnei tawhta chakaona awpa châta suh tlua chhielie awpa ta a pachhuapanoh ngahaipa châ ta, cha khai tawhta ECM Missionary nah 3 penawh chhao chakaona su awpa ama rao pathi heih aw. Awnano zawpi zy ta thlachhâkhei suh vy.
5). Târi 14th July, 2019 heta Local Evangelist thiepa Kailash Digal cha Bereshit Church, Karnetpur liata pa-ina (induction), Pastor Beirôna Hlôvy ta a hnei aw.
6). Tari 14 July, 2019 liana heta Hirakud liata House Church cha moh thiehpa bôna nata Local Evangelist pa-ina (Induction) hneipa a châ aw. Local Evangelist pa-i awpa he Mr. Mihir Dip a châ. Rev. Stephen Beihrosia Chozah, Field Director ta induction program a hmâh aw. Tawhta, Hirakud liata House Church moh awpa he ‘Theophila House Church’ tahpa a châ aw. Kyhchhina ta program he hmâpa a châ aw.
7. THÂTIH LAPAKHYPAZY:
1. Târi 12 July, 2019 (Fri) liata Agape Home: MRRC Managing Board meeting hneipa châ ta, Agape Home hmahsiena châta peimawhpazy reipahmaopa a châ.
2. Tlâhna Crusade: Târi 9 July, 2019 tawhna khata ECM Local Church, New Colony liata Bethel Ministry Team, St. Frederick Lalrindika Speaker ta hmâpa cha Tlâhna Crusade hnei ngâhaipa châ ta, târi 14 July, 2019, Abeipanoh, atanoh taihta he Crusade he hneipa a châ aw.
8. MARALAND GOSPEL CENTENARY HOSPITAL:
Târi 4 July –11 July, 2019 chhôh report.
1). Tlâhleipa apamosapa zie – 47
2). Tlâhleipa admitpa zie – 32
3). Ultasound mopa zie – 44
4). X-Ray – 9
5). ECG mopa zie – 9
6). Endoscopy mopa zie – 11
7). Hawsaih pihpa zie – 4
8). Athipa – nil
9). Emergency Case – 5
10) Operation hneipa zie – 4
(Published by J. Lalvarliani on behalf of Communication Department, ECM Assembly. Edited by BeiRôkhu Beitâ, MNN & maraland.net)