SIAHA, 30 Khihpa, 2019, Hriaheinoh (MNN) – Mara Writers’ Club (MWC), Siaha chata, ama py hmahlana, Reih palaiseihsa tahpa alaichadaina nata hmahlana châta, atanoh târi 30th Khihpa, 2019 khata Mararâh liata Political Party laipa mia 3 – BJP, MNF nata MDCC zy hnohta, Mara reih hmâh hluh awpa nata, reih pabohsana kyh liata Political Party zy ta keih chakâ awpa ta ahawna ama pangia. He hleikhôna heta, Siaha DC, Puhpa Bhupesh Chaudhary, IAS a hmôpa ta, Zawpi lâta pahnosana ama papuapazy, MARA REIH -ta a hluh thei chaina hawhta papua awpa ta amâ haw hleikhôta, chã ama pangiapâ hra.
MWC ta Political Party zy hnohta Mara reih hmâh hluh awpa ta ahawna ama pangiapa he, Political Party zy chhaota chyh-eih pha kaw ei ta. Party Apakhyna (Devotion), Public Meeting nata Party hmahlana nata siepapuana nano nanopa liata a hluh thei chaina hawhta Mara reih hmâh lymâ awpa amâ chhuahzie MWC nôpawpazy hnohna heta chhopa ta, MWC hmahlana he ama theina zydua ta baokhâ amã chhuahzie ama rei hra.
MWC nôpawpazy heta, Siaha DC, Puhpa Bhupesh Chaudhary, IAS chhao a Office liata chareipa ta, DC Office tawhta châ papuapa (Public Notifications) zy cha, Mara reihta a hluh thei chaina papua awpa ta amâ hawna cha, DC chata, hlao a patloh awpazie nata, MWC châta châbu papuana kyh liata bao theina kao a y khiah a bao awpazie a vaw chho hra ei.
MWC chata, abyuhna nata â ngiahnazie lymâ hawhta, Mara reih abohna nata hmahsiena kyh liata thathyu chyu awpa ta zawpi zy a hrua chyu ei.
(Source: Robert B. Syuhlô)