SIAHA, 8 Thlazoh, Pobienoh (MNN) – Atanoh kha Siaha Traffic Police zy ta ama duty post su zy khô lâ ta siepapuapa ta Siaha khichhôh liata pasai leina su liata Motor a paduapazy ama y nahta y lei mopasiana ama hnei.
Motor thokha cha pasai leina su liata padua raruahpazy y ta, Driver zy ama y lei vâta ama motor phei liata “Wheel clamp” pataihpa a châ. He nahzy he ta Traffic Police Office lâ amâ report tua leipa ta ama motor liata Wheel Clamp he pathlâ chakhyh pasai leipa a châ.
Atlia tawhta Mararâh khihpi Siaha liana he ta ahluah theipa avaw hluh kaw bâ vâta zawpi eima bua tu leina awpa ta dâh ta apasaipa hawh ta MADC sawhkhâ ta Parking Area zy vaw tao laih ta, Parking Area taopa a châ leipa liata motor apadua raruahpazy cha dâh hawh ta fine theipa a châ. (He he ta pasaina eihrâhpa piepazy pahly vei.(
Zâlâ dawh 6:00 Pm aparo tua leipa ta Motor laipa – Truck nata daoh hmo phaohpazy ta Siaha khihchhôh amâ ngai awpa châ vei tahpa a châ hra.
He dâh zyh leipa ta zâlâ dawh 6:00 Pm hlâta Siaha khichhôh Motor laipa angiakhei raruahpazy cha dâh hawh ta fine theipa a châ hra.
He hawh ta Motor Parking chôchâh liata dâh hawh ta chakhiecharieh kawpa ta siekhei awpa a châpa ta a châ khiah Private ta motor ahneipazy – a eih pachaipa ta National Highway lâlai kiah liata O ahneipa, ama O tlyhmia kha, kô vâropi tawhta ama Private râh hawh ta avaw mohôh hapa, zawpi râh a châ tlôhpazy ta ama tlyhmia liata ama motor ama padua tyhp cha amâ chei abyuh ha aw tahna a châ hra.
Chavâta O asa thiehpazy ta ama O sa daihti liata motor sona awpa he tao chhilie lymâ awpa apeimawh kaw aw; eima khihpi he khizaw hmahsiena ta maniah tlôthlu lymâ tlôh aw ta, eima tusawzy chhâ liata abua tu leina awpa ta atahmâno tawhta mo to ta palôhru eima hnei chhielie awpa apeimawh kaw aw.
Ahy rai, mo lai mo chyh, Traffic Rules he zyh lyhlia achhuah chyu suh vy.
He raohpa ta photo eima vaw post pa he ahneituhpa pasaina hawh ta vaw post pa a châ.
(Admin, MNN)