SIAHA, 20 Thlazoh, Hriaheinoh – Environment and Forests (E & F) Department, MADC ta Kaochao East liata Picnic Spot ama tao thiehpa cha atanoh dawh 1:00 Pm liata Puhpa N. Zakhai, CEM, MADC, Chief Guest châta hruapa ta pahyna a hnei.
He pahyna Programme he Puhpa Jimmy N. Ramdina, ACF, MADC ta chhihtha ta, Puhpa Thaly T. Azyu, CF, MADC ta Technical Report piena hnei ta, Puhpa N. Beithlapalô, FRO(Chakhei) ta hlasana – Solo a hnei thei hra. Chief Guest nata Puhpa F. Lawmkima, Executive Member i/c Environment & Forests zy ta biereina chyupa ama hnei raihrie.
Atahmâ liata pahypa Picnic Spot he Kaochao East khih kiapâh liata ypa, Ka-ao chavâh khôta liata Nursery Bed cum Picnic Spot tao tuapa(aparohpa) khôta liata a ypa châ ta, asu chhao, aparohpa hlâta âryh viapa ta pahnopa a châ.
Puhpa N. Zakhai, Chief Guest chata biereina chyupa hneipa ta, ano CEM a châ daihti liata he hawhta Picnic Spot pha kawpa zy pahy thei awpa a châpa he âly zie reih ta, Department liata hriatuhpazy nata a hrialâhpa Puhpa F. Lawmkima, EM i/c E & F hnoh ta alynabie a reih.
Eima râh he Khazohpa ngiahchiena vâta nata eima Missionary nahzy zawhzi ta kao totie liata hmahsiena hnei ha bâ pi ta, aly’pa a châ hmeiseih; eima râh chyhsa – Marasaw cheingei chhao atahmâ he châ thaipa nata officer hluhpi hnei ha bâ pi ta, he nahzy he ta weekend liata apaly pa-uasana awpa su ama peimawh pathao lymâpa ei pahno tyh. Chahawh pyly ta khizaw hmahsiena ta maniah atlôthlupa hawh ta nô nata paw, satlia laihsa zy nata chhôhkha/group zy hleikhô ta eima siku hawtinahzy chhao apaly pa-uasana awpa – picnic na awpa su he eima peimawh pathao lymâ haw tahpa eima pahno chyu.
Chahawh pyly ta nôvâh ahneithiehpazy chhao ta he hawhpa su dâhthloh kawpa liata honeymoon hmâna awpa ta ama khoh kaw tyh tahpa pahnopa a châ hra.
He hawhta Picnic na awpasu eima peimawh pathao kaw no ta E & F Department, MADC ta he hawh ta ama vaw patohpatia theipa he arônah ei tah hmeiseih. Technical Report eima nahthlie hapa hawh ta sôh achyhta hmâpa ta he hawh ta apahâna awpa O pha kawpa, chhâh 2-pa hleikhô ta Swimming Pool taihta tao theipa a châpa he aly’pa a châ hmeiseih. He Picnic Spot he ta eima râh châta hmahsiena a tlôkhei cheingei nahta ei hnabeiseih tahpa ta a reih.
MADC he Mizoram liata ADC sâ 3 ypa hry liata kyh totie liata example châ awhpa ta Mizoram Governor avaw châ hapa Puhpa Nibay Sharma ta maniah pasyu ta, ano pyly ta ADC sâ 3 hry liata ataopha chaipa eima châ tahpa ta khokheinazy chhao maniah a hlâ hra. He hawh ta a châ no ta eima sôh duahmo deikua chyhta, â cha-ie ngaita no ta eima officer nahzy ta tiama papuapa ta he hawh ta ryu (asset) pitlohpa eima hneitheipa he aly’pa a châ hmeiseih.
ADC sâ 3 liata, ei pahno chhei leipa ta a châ khiah MADC he Asset ahneipha chaipa eima châpa ta ei pahno. E & F Department he ta eima râh liata IB (Inspection Bungalow) nata Rest House sy 20 hlei eima hnei hapa ta pahno na ta, cha hawh pyly ta MADC ta Aizawl su liata Mara House pha kawpa nata Student zy châta Girls & Boys Hostel zy eima hnei. Atahmâ he, Siaha liata Quarter zy eima hnei hleikhô ta MDC Hostel chhao, Siahatlâh sa patlô daihmâ hapa a châ. He zydua he Khazoh ngiachhine vâ a châ tah leitheipa châ vei.
E & F Department ta he hawh ta eima râh châta Asset pha kawpa maniah ama taopa lymâ hawh ta Department hropazy chhao ta tao zie, hâ alapa ta, sôh chyhta eima hneipa hmâpa ta, achyhta chô liata ngâ achhihpa ta, hriapasapa ta, eima Council Property zy, eima Department chyu liata sâ 1 chhâ, sâ 2 chhâ tao chyu achhuah si la, cha cha eima Council mohphana miah pie tuh awpa dei châ leipa ta Mararâh mohphana miah pie tuh awpa a châ. Council he Mararâh ta a mo a tawpâ thlâhna tahpa pahnona chyu ta Council liata hriapazy tiama papua chyu awpa eimâ haw hmeiseih.
Khazoh hmosaipiepazy he mohôh pha ei si la, pasô thai ei si la, eima râh châta hmo tlyuhpa nata hmophapa a châ awpa a châ tahpa ta Puhpa N. Zakhai chata a reih.
He Picnic Spot pahyna liata Puhpa K. Hrahmô, EM i/c Edu. etc., Puhpa K. Chhuabei, EM i/c PWD etc., Puhpa F. Lawmkima, EM i/c E & F, Puhpa K. Siakhai, Adviser to CEM, Puhpa Tiahlei Syuhlô, Chairman, Town Committee, Puhpa H. Hrangchuanga, Deputy Chief Whip zy chhao ahlao thei ei ta, Puhpa P. Tluasa, SE, PWD nata Puhpa Beirôkhu Beita, I & PO zy chhao amâ hlao thei hra.
Technical Report tawhta sôh hmâna zy – Swimming Pool taona awpa ta Financial Year 2017-2018 chhôh ta Niti Ayog sôh tawhta Rs.7.00 Lakhs only ta taopa a châ. Rest House he Financial Year 2018-2019 chhôh ta GIA sôh tawhta Rs.5.00 Lakhs only tawhta sa pathaopa châ ta, hnoh lâ liata sôh nano nanopa tawhta baichhi laihpa ta Rs.16.00 Lakhs only hryuhpa a châ. Swimming Pool nata Rest House liata atahmâ taihta sôh hmânazy cha Rs.23.00 Lakhs only a chhâpa a châ.
Written by:-
BeiRôkhu Beitâ
Information & Publicity Officer
Mara Autonomous District Council
Siaha