SIAHA, 1 Thlarâh, 2019, Khazoh noh – Ary liata palâsapazy he târi 25-31 Thlazoh, 2019, hâta ei kha chhôh ta ECM Headquarters General nata Mission thâtih lapakhypazy a châ:-
1. MODERATOR:
Rev. C. Beima, Moderator ECM cha târi 29 Thlazoh (August), 2019 liata Châkhei Bia liata Châkheitlâh Achhyna O Hall pahyna hnei awpa ta sie ta, Achhyna o Hall he târi 30 Thlazoh (August)-pa ta a pahy. 29th Thlazoh (August) zâ tawhta 31st Thlazoh (August), atazâ taih speaker châpa ta chakaona a hnei pazao aw. Bia Hlapy nata Local Hlapy zy ta ama deichhy.
2. SENIOR EXECUTIVE SECRETARY:
Târi 1 September, 2019 (Abeipanoh) my apakhyna liata Rev. Dr. Laiu Fachhai, SES ta Shalom Local Church liata bierei chakaona a hnei.
3. EXECUTIVE SECRETARY (Edu):
Rev. Dr. S.T.Zawsi, ES (Edu) cha târi 30 Augut, 2019 khata ACWC ryhraona hawhta Agape Home nata ECM HSS chôchâh liata Sawhkhâ lâta hyutuhpazy adaoh awpa ta Aizawl lâ sie ta, Târi 10 September, 2019 liata Siaha lâ â vaw lie aw.
4. EXECUTIVE SECRETARY (Mission):
Rev. T.Salaw, ES (Mission) cha atanoh târi 1 September, 2019 (Abeipanoh) he ta Theiri Local Church liata chakaona a hnei.
5. NEPAL MISSION:
1). Kakarvitta Bia: Khazohpa ngiachhiena zawhzi ta târi 23 Thlazoh (August), 2019 khata Pastor SBC. Beireikhei Nôhro nata Ngori Syuhlô zy cha sawchanô khochhih ngâsâpa ama hnei. Atahmâ he Mawrâh lâ amâ mohhôh ngâhai.
2). Biratnagar Dharan Pastor Bia:
(i). Missionary J.Amos zy chakaona su liata Pihnô Sampati Risidev, nôhmeipa chata Bei Zisu cha Bei nata Pachhatuhpa châta apyh ta, bâti châ awpa ta a moh â pangia hra.
(ii). Missionary J. Amos nata Local Evangelist Pawan Ghimere zy cha atahmâno he Hindu theithaipazy nata raihriatuhpazy yna su liata chakaona ama hnei ngâhai. Khazohpa ypâna topa ta, ama chakaona ta thei phapa a pathei thei nawpa ta thlahchhâkhei suh vy.
3). Kathmandu:
(i). Field Director ta Logos Awnanopa, Bhaktapur liata apakhyna liata chakaona daihti pha ngâsâpa a hnei thei.
(ii). Târi 3 September, 2019 heta Nepal Mission Field Committee, Laxmipur liata hneipa a châ aw, Local Evangelist-zy chhaota chakaona kyh liata peimawh awpa training ama hnei pâ aw.
(iii). Thlahchhâkhei awpa ahawna:
a. Pastor C. Lalrinkhuma sawchapawpa St. Roddick cha atahmâ no tlâh-leipa ta, a mo zy chhao thatlô leipa ta, tlâh-na phapa a to thei nawpa ta.
b. Missionary RTC. Malsawmsangi, saw phao ngâpa châta. Hnatlâna phapa a hnei thei nawpa ta.
c. Biratnagar Awnanopazy ta Achhyna O a daihti ta liata ama hmâh thei nawpa ta.
d. Puhpa Chit Narayan Chuadhuri zy nôvah, Biratnagar liata chyhsazy ta riahpha kawpa ta Awnanopa châta amâ pie thei nawpa ta.
e. Puhpa Shrina Risidev, Biratnagar khihpa, sahma doh ngâ thlâhpa Khazohpa â ngiapâpa ta a vaw pathleih thei nawpa ta. Puhpa Risidev lahpinô he ngiapâtuh phapa a châ, ngiapâna liata â duah lymâ thei nawpa ta thlahchhâkhei suh vy.
f. Laihsa Missionary K. Khairili vahpa hnei awpa châta. Ahnei programme a palâ kawpa ta a sie thei nawpa ta.
6. TIWA MISSION:
1). Field Director: Rev. Khabi Chozah, Tiwa field Director cha târi 1st September 2019 noh liata Krombaroh Local Church liata chakaona ahnei aw.
2). TEC General Secretary: Rev.Arup Manta cha atahmâ hâta liata Kraikhumur Local Church Umsetri liata chakaona ahnei aw.
3). TEC General Meeting: Târi 31 Thlazoh (August) 2019 at 10:30 AM liata TEC General Meeting , Pachimnagaon Local Church liata hneipa a châ.
4). Apahràna programme: Apahrana programme he târi 1st Sept 2019 tawhta hmâh pathao awpa châta. Biepipa: “Awnanopa”(Mathai 16:18)” tahpa châ aw ta, Tiwa Mission su liata Awnanopazy ta athôkheina ama hnei chyu thei nawpa ta awnanopazy ta thlahchhâkhei ei suh u.
5). Social Work: Machâ N. Zakhai tawhta baona eima hmôpa tawhta atahmâno he Achhyna O renovation tao ngahaipa a châ.
7. MISING MISSION:
1. Târi28.8.2019-pa ta Rev. L. Lychhua , Field Director ta Masgaon tawhta manôh pakha bâti a pachâsa. Abeipa ta a khinarah a pakawh lymâpa vâta Abeipa cha reithaipa ta y mawh sy!
2. Târi 30.8.2019-pa ta Mishing Evangelical Mission liata hriatuhpa zydua Bahguri, Immanuel Local church liata field châta peimawhpazy pachâ awpa ta Joint meeting hneipa a châ.
3. Teachers’ Day 2019 kaw tlô awpata liata Holy Grace School zy cha programme ahmâ hra awpa achhua ei ta, târi 28 August, 2019 pa tawhta last period lia maihta ama practice tyh.
8. ARUNACHAL MISSION:
1). Changliang Prayer Centre: 25 Thlazoh (August) 2019 pa liana khata Changliang Prayer Centre liata khichhai tlô n’awpa O cha Field Director Rev. Telung Chozah ta Pahyna nata hlana a hnei. He Guest House sana sôh he Changliang Awnanopa manôh zy ta apakhyna châhki ta sôh ama thyupa atlopakhypa tawhta nata Suhraw sukha tawhta sapa a châ.
2). Group ministry: Awnanopazy thlachhâkheina vâta Missionary zy group sano lâ ta apachhaihpa ta group Evangelism hnei pazao lymâpa a châ. He chakaona he mo pakha chakaona khô la ta, a py tlai ta thâtihpha chhona he hnei lymâpa a châ. Missionary T.T. Nôkhei group zy cha Duraliang nata Dimbwe khih zy liata O to angia hnaohpa ta thâtihpha chhopa ta, thlahchhâna chhao ama hnei lymâ.
3). Quarters sa ngaihâpazy:
(1) Missionary quarters cum Guest house: Zakô June thlâpâ tawh na khata, Missionary Quarters cum Guest House he MBCC mission compound liata sa pathaopa châ ta, September thlâpâ liata cha patlô thei awpa ta hnabeiseihpa a châ.
(2) Missionary Quarter: Tafragam khih liata Missionary HC. Lalbiaksanga nah chhôkha y n’awpa O ( Quarters) sa ngâhaipa a châ. Zakô lâ tawhta sa ha awpa a cha no ta, sôh lâ chhâh rairuna vâta sa thei leipa châ ta, atakô June thlâpâ tawhta sa pathaopa a châ. Atahmâ he a foundation cha patlô hawpa a châ. Abeipa a ngâchhâna chô ta December thlâpâ hlâta patlô hmâ awpa ta amâ chhuah. Quarter sa ngahaipa achâpa vâta Missionary HC. Lalbiaksanga nah chhôkha cha Khoraliang khih liata chyhsa o tlôpa ta ama y ngâhai.
3). Alynabie reina: Changliang Prayer Centre liata hriatuhpazy thla chareih ama lymâ châta Sponsor avaw taotuhpa zydua chô liata Arunachal mission field ta Zisu Krista moh ta alyna bie areih. Ary liata moh palâsapa zy he thlachareih phahnai angiah ngâsâpa ta Sponsor avaw taopazy ama châ:
1. Mc. K. Vanlaliana.
2. Mc. NT. Sanga.
3. Mc. K. Zachiangi(C.H.M).
4. K.m. K. Chhuabei
5. Ls NT. Florence.
6. LMB, Bethany.
7. KNP Branch Ebenezer.
8. Missionary Ngôkhe Fachhai ( Arunachal).
9. Missionary. T.T. Nôkhei ( Arunachal).
9. ODISHA MISSION:
1). Sambalpur Area:
(1). Târi 23/8/2019 tawh khata Pastor Dr. S. Lamo nata Local Evangelist Mihir Dip zy ta târi 30/8/2019 pa ta Bâti a châ awpazy mo la pakhyna bitaina nata thlahchhâna hneikheipa ta daihti pha kawpa hmâpa a châ.
(2). Târi 25/8/19 Sunday my Theophila House Church liata Missionary Evan. James K. Beirachhô ta Sermon pha kawpa nata pasi pa-aona pha kawpa reina hnei ta, Awnanopa member zy ta ama thôh khei ngâsâ.
(3). Dt 30/8/2019 pa ta Hirakud liata manôh pa 10 bâti pachâsapa châ ta, Pastor Dr. S. Lamo ta bâti a pachâsa ei. Rev. Stephen Beihrosia Chozah, Field Director ta Abeipa tlâhkhai (The Lord’s Supper) â chhuah noh pâ hra. Bâti pachâsapazy ngiapâna liata a-i kawpa ta ama y lymâ thei n’awpa ta thlachhâkhei chyu suh vy.
2). Kandhamal Area:
(1). Târi 25th Aug, 2019 khata Evan. S. Lalduhawma ta a mohôh haipa Baulmaha house church liata Local Evangelist Kailash digal ta bierei chakaona a hnei. He noh pyly ta Bereshit Church, karnetpur liata Mishra Digal ta bierei chakaona hnei hra ta. A ei 1-na châta Sunapanga house church member zydua ta Bereshit church liata amâ vaw pakhy. Awnanopa 2 zy ta daihti pha ngâsâpa ama hmâh.
(2). Târi 27th Thlazoh (August) 2019 khata local evangelist Mishra Digal viasa pha kawpa Tilespara Digal nata a chhôhkhazy cha Hindu zyna tawhta Kri vaw zyh ei ta, Pastor Beirôna Hlôvy nah O liata “thlahchhâna ta krizyna lâ nâ ly pangia ula” tahpa ta a vaw haw ta, â hawna hawhta missionary nah zy nata local evangelist nah zydua ta Sliki Para khih lâ pangaipa ta puhpa Tilespara nata a chhôhkha zy cha Pastor Beirôna Hlôvy ta alypangiana hnei ta. Ama chhôhkha châta thlahchhâna ahneipa ei. Abeipa ta âryh atah khiahtala September thla chhâna lâ liata bâti pachâsa awpa ta pachhuapanoh haipa a châ. Puhpa Tilespara heta sawchanô 1 nata saw chapaw 1 a hnei. Ama chhôhkha châta thlahchhâkhei chyu suh vy.
(3). Atahmâhlâ he Local Evangelist nah nata missionary nah zy ta ama mohôh ngâhaipa khîh nata achheipa liata Thâtihpha chhona raih hriapa ta ama sie papua haino a châ. Krizyh leipazy ta local evangelist zy chakaona siepahliepa ta Krista ama vaw ngiapa thei n’awpa ta thlahchhâkhei lymâ suh vy.
(4). Târi 29th Thlazoh (August) 2019-pa khata Local Evangelist Kailash Digal nata Mishra Digal zy ta Bereshit Awnanopa member zy tlypa ta ama chakaona râh pakawh via lymâ n’awpa châta mopathlina ama hnei.
3). Thlahchhâkhei ahawna:
(1). Bosonti Digal, Baulmaha liata pa ahripa ta pabua tyh ta, Zisu Krista moh ta pahniena eima Missionary zy ta ama hmô theih n’awpa ta.
(2). Shubhakara Digal accident-na liata aphei rupa apahleih ta, thlaita avaw tla theih n’awpa ta.
(3). Aloko Behar a baih puapa vâta school chhao kiah thei leipa ta, thlaita avaw tlâh theih n’awpa ta.( he chapaw hawtipa na chhôhkha he atliata liata kri vaw zyh thiehpa, thlai ta bâti zy chhao pachâsa awpa ama châ).
(4). Chanô hawti Chingki Digal cha thyphoid pasana vâta thohna O liata admit-pa châ ta, a chhôhkha nah ama nôpo ngaita kaw ta. Thlaita a vaw tlâ theih n’awpata thlahchhâkhei suh vy.
(5). Local Evangelist Tangila Digal, Baulmaha liatapa cha bike ta accident vâta apakhu liata pasa tah kaw ta, thlaita a vaw tlâh theih n’awpa ta.
10. MARALAND GOSPEL CENTENARY HOSPITAL:
Târi 25– 28 Thlazoh (August), 2019 chhôh report.
1). Tlâhleipa âpamosapa zie – 76
2). Tlâhleipa admitpa zie – 42
3). Ultasound mopa zie – 27
4). X-Ray – 16
5). ECG mopa zie – 8
6). Endoscopy mopa zie – 14
7). Hawsaih pihpa zie -4
8). Athipa – 1
9). Emergency Case – 5
10) Operation hneipa zie –4
(Published by J. Lalvarliani on behalf of Communication Department, ECM Assembly. Edited by Admin, Maraland.net)