SIAHA, 7th Thlarâh, 2019, Pachynoh – Atanoh dawh 1:30 Pm liata 4th MADC CHAIRMAN’S TROPHY 2019 cha DRDA’s Conference Hall liata Kick Off Programme ahmâpa châ ta, he liata Puhpa N. Zakhai, CEM, MADC cha Chief Guest châta hruapa a châna hawh ta Programme a hmâkhei ei.
Ary liata palâsapazy he a biereipa thokha, peimawh viapazy a châ:-
Ahmiatua chai ta atanoh daihti phapa miah pietuhpa eima Khazohpa hnoh ta nata Khichhai Laipa châna nâ khokheituhpa SDFC Nôpawpazy chô liata palôh hmeiseihpa ta alynabie ei reih.
SDFA chhituh hmiatuapazy hriapasana nata atahmâ chhituh achâ ngâhaipazy tiamana he arônah ei tah hmeiseih; âmo zawhzi ta eima Mararâh he thata Football liata hmah eima sie tahpa eima pahno chyu; ama chô liata alynabie reih ei na ta, zana chôta anaohna ei hlâ ei.
MADC Chairman’s Trophy he Football Tournament a châ no ta, Mararâh liata Football he eima hmia pahnona avaw rei tu mâh leipa ta pahno na ta, ei zâ theina rakha – keimo zy daihti liata Tournament pitlohpa a y chhôhpa ei pahnopa cha Hockey deita a châ.
Eima Missionary RA. Lorrain nah nôvah hriapasana zawhzi ta Mararâh liata Thâtihpha a vaw tlô tawhta khizaw hmahsiena cha eimâ phana rakha liata kaw paza papha laih lymâ pi ta, kô 1980 hlei liata cha eima râh liata TV zy vaw hnei hluh via laih hra pi ta, cha zawhzi ta kô 1986 liata Football World Cup zy vaw moh laih pi ta, kha daihti rakha tawh kha ta thata Football kha Mararâh pôpalôhpa tlai ta Football he eima vaw pahno pathao hleikhô ta eima vaw pahâh pathao laihpa a châpa ta ei pahno.
Atahmâ deikua Major Games liata cha Hockey hlâta Football lâ liata thata hmah sie pi ta, India râh liata alâluah theina taihta Player – B. Vabeikhokhei (Tâtâ) zy hnei pi ta, ano leipa ta rei awpah, ama y hôlô aw.
Ei rei khohpa deikua atakô liata Chairman’s Trophy liata ahlao thei awpah Club/Team 19 tlai nama châ tahpa, SDFA nôpawpazy tawhta vaw pahno na ta, ei ly hmeiseih. Abeipa ta âryh tah sala, eima nôpawpazy ta tao pazao awpa ta ryh ama rao lymâpa a châkhiah, aheihpa liata cha Team zy chhao atakô hlâta eima hluh via lymâ nahta hnabeiseihna ei hnei.
He hawh ta a châ no ta, thyutliapazy ta Talent rônah kawpa eima hneipazy he eima chaluah lymâ thei n’awpa ta hmo pha leipazy ta miah a pakhâ awpa rai châ vei tahpa he ei reih khoh kaw.
Eima râh liata mo pakha nata chhôh to liata kao totie liata hmahsiena miah pakhâ chai tyhpa cha Pari theipa he a châ tah leithei vana. Thyutliapazy ta, thyutlia daihti liata sahma nata Drugs zy hleikhô ta chanô chapaw châna ahmâna liata papeimawhsa leina eima hnei nahta he ta eima hmialâ daihti liata eima châna awpa zie hawh ta châ thei tyh khao mapi.
Chavâta, atanoh, he liata avaw hlaopa zydua nata Mara Thyutlia zydua hnoh ta bietapa ei hnei khoh chaipa cha “Pari theipa he ahria rai rai ta hria leipa ta, â râ ta arâsai lymâ awpah” tahpa he a châ. Eima viasa nata kyhpachâpazy ta tao awpa ta miah ama hrua hapa chhao ta, “he he la keima châta hmo pha leipa châ ta, tao aw vana” eima tah ngâh awpa a châ.
Rathli hri-iah pathaihpa, pachâna pasohpa nata Khazohpa ta sona miah a piepa aparao theituhpa cha Pari theipa he a châ. Nâmo Football Player zy chhochhi cha pachâna thata hmâhpa ta Football akhaihpa, pass apie pachhuah laihpa nata goal a pangia awpa nama châ; tha nata zâh hleikhô ta pachâna palôhru rathli taihta apabuatheituhpa cha Pari theipa – Sahma nata Drugs zy he a châ. Chavâta, eima khakhaipa nata hmiahao lai chaipa cha Pari theipazy he a châ tahpa pahno thlâhna chô ta adyuh lymâpa ta, pahnie namâ chhuah cheingei awpa ta khokheina ei cha hlâ ei.
Pa-ô pazypa nata kuvâ châhnamei pazypa kyh zy cha nama Coach nata Manager zy ta tao awpa apha lei zie chachho khai ha ei ta, reih byuh leipa a châ nama tah ngyu thei; nâmo chhao ta Season sâ 1 akhaih awpah daihti a vaw tlô nahta cha namâ sohsi kaw tyh hra tahpa ei pahno. Anodeikua, Season sâ 1 ngâlâh he nama chhâna châ leipa ta, mylâ hâhnoh zydua liata chariah adyuh lymâ awpah nama châ tahpa apahno thlâhna chô ta, pari theipazy tawhta aboh awpah dei ngâlâh châ leipa ta pa-o pazypa chhao nama tao tlâ lei awpah ta ei châ haw ei.
Atahmâ Siaha liata AR Pheisaih hyutuh chaipa Major Puhpa Tamang he Sports Discipline tawhta Pheisaih lâ angiapa châ ta, discipline ahnei vâ nata a tiamana vâta atanoh he Major taihta a kiasâh theipa a châ. Nâmo chhao self-discipline he pachâ peimawh â ngia zie pahnopa ta nama tao lymâ awpa a châ.
Châ thai awpah cha apeimawh kaw; cha no ta, châ nama thai hleikhô ta Khazohpa ta Talent a cha pavaosa baichhih ei pa he amô aziakhei chakhyh thlâh leipa ta hmialâ tôh lymâpa ta noh tato ta step sâ 1 chhâ hmahsiena hnei lymâ achhuah awpah ta ei châ haw ei.
Chairman’s Trophy he MADC ry liata Chairman moh palâhâhna awpa nata MADC moh paphana awpa ta taopa châ leipa ta, eima râh thyutlia zy, hnatlâna phapa vaw hnei ei lymâ u la, Sports liata hmahsiena nama hnei lymâ theina awpah nata Mararâh lia hleikhô ta Mizoram, India nata Khizaw liata alâ thei awpah hnabeiseihpa ta taopa a châna hawh ta, hmahsiena khochhih kawpa a vaw tlôkhei cheingei nahta ei hnabeiseih.
Lymâ deikua Tournament avaw hlaopa Team/Club zydua ta to thai’pa châ vei tahpa eima pahno chyu; atiama patlua viapa nata ahriapasa viapazy ta lymâ he ama hmô tyh tahpa pahno thlâhna chô ta sâ 1-na lymâ adikhei cheingei awpah ta khokheina ei cha hlâ ei.
Atakô Chairman’s Trophy he player zy ta apathaih kawpa nata ângia kawpa ta akhaih u la, hmiahaopa nata atu-adaina y leipa sala, Referee nata Official nahzy za thai kaw u la, Playground liata namâ khaihpa châ mohtuhpazy ta mo ngia kawpa ta ama cha mo theina awpah ta asohsi chyu u la, Chairman’s Trophy hmâpa ta nama thaina sona zydua cha Mararâh châta nama vaw hmâ chyu heih awpa ta nata hmialâ nama sie lymâ nawpa liata Khazohpa ta byhnâ khochhih kawpa chapie chyu mawh ei sy tahpa chhao ta khokheina sâh chaipa ei cha hlâ ei.
Ei châ ly kaw ei.
PRESS RELEASE No.33/2019 of 7 September, 2019
Issued by:-
Information & Publicity Officer,
Mara Autonomous District Council,
Siaha.