Service tahpa he eima palóh liata a sia khai chyu thlàh ha tarawpa ta, reipasia awpa deikua a vaw ru ngaita kaw. Chakao, raihria, hmotao, bao tahna hawhta a chà via chai. Khäpa rai chä sala, reihtuhpazy palôh liata a sia khai thläh ha na ta ei pangiasa. Ei chahlô cha ei tu khiah la, ei zyu a vaw là heih aw ta, hmiachhie ei la hlâta tlao ei siesai ha tua aw.
Kheihaawhpa rai chä sala, chyhsa hro liata ‘Service’ peimawh zie he rei awpa ei kho chaipa tlao a chä. Chyhsa sawzy he khizaw liata eima vaw pina chhäpa, chyhsa apa chyhsasa tyh tuhpa, chyhsa za pachhihsa ta nohäh a tao tyh tuhpa, rönahna lakho a pakhosa tyh tuhpa nata nozana saikao a pasaosa tyh tuhpa cha he chakaona (Service) he a vaw chä. Rei eimä chhuahpa a sia via thei n’awpa ta chyhsa rônahpazy bierei nano nanopa he duah vaw paläsa tua ei si.
Albert Schweitzer (1875 – 1965) German Pholosopher nata physician ta cha, ” Service hläta phôhryhpa a sàh viapa y thai khao leipa ta, mo hropa eima chakaona he bie ngiapàpa ( Creed) rônah chaipa a vaw chä” a vaw tahpà ngä kaw. Chyhsapazy pi he a hlao/a hri hri ta y pakhypa (Social animal) chà pi ta, a buakhei ta a chakao veichàh awpa he Taotuhpa ta miah a paduana dàh a vaw chà. A hy hmah ta keimo dei ta khih a sa theipa y tlà ma pi. Ngiapäna liata khatlu hmahta nôpawpa chä hra la, chakaona (Service) he hnôh na chhy ha khiah la, ngiapâna thipa deita a chä aw.
Scientist moh pathàhpa Albert Einstein (1879 – 1955) chhao ta, ” Hrona sôna (Value) a pahneisa tuhpa cha chakaona deita a chä” a vaw tah hra. Tlai chuh, thi hnöhlä ta a hy hmah a chakao thei khao lei p’aw pi ta, a hy chô lia hmah hmopha tao thei khao hr’aw ma pi. Hrochhôh daihti chyuta liana heta mo hropa chakaona he eimä bähpa tlao a vaw chä. Yh, cha tlai cha hrona sôna a pahneisatuhpa nata byhnä eima tona hnawh a vaw chä. Mo hropa chakao ha tua la, ala cha vaw chakao hra aw.
French writer nata Histirian, Voltaire ( 1694 – 1778) ta cha, ” Chyhsa rônahpa zydua he chakaona liata a hläkhai leipa pahno tlä va na” tahpa ta a vaw reih hra. A yzie cha, chyhsa rônahpa eima tahpa zydua he, kheihawhpa kao lia chhä ta ma a chyhsa heihzy chakaona liata a hlä khaipa nata hriapasa ngaitpazy ama vaw chä tyh. Sasyh a chakaopa chyhsa rónahpa y beih vei ei tahna a chà. Chakaona kao deikua la a lyu khai thai thlyu aw vei.
WH. Auden ( 1907 – 1973) English poet rönahpa ta cha, ” Leichö lia he chyhsa hropa chàta hmopha tao awpa sopa deita eima chà” a vaw tah heih hra. Mo pakha chà chhä ta byhnà eima chà thei vei khiah cha, leichö liata sopa eima chäna chhàpa eima parao ha tahna a vaw chä. A hy tlyma sawhkhà rai lia a chakaona (Service) a pachà peimawh leipa cha, hriepa ama chà tyh. Tuapa eima chàna chhàpa, sopa eima chàna chhàpa eima uasa vei khiah cha, thai chà beih aw ma pi.
John Adams (1735 – 1826) America Presisident 2 na chhao ta he hawh ta a reih hra. ” Eima chyhsa heihzy chakao vei ei sih la, a hy hropa e eima chakao khao aw tly?” tahpa ta. Tlai chuh a chakao veichàh awpa eima chàna he chhàzaw biedopa nata pa ei pachhia thai lei awpa, khizaw chei ô (Culture) tlao a vaw châ.
Ahy tlyma va chakao ta, va buabä khei awpa ta cha, eima thatlôna, thaina sona, daihti, sôh nata thih taih hryuh awpa ä ngiah tyh. Chavà ta chakaona cha a ngia ta, kho ia hnei ta, a roh pahàh ta, mo ai a chhih tyh vei.
Ema chakaona chyuzy he nietluana nata rai (job) hawh deita ta eima pachà khiahta la eima rie thei kaw tyh aw ta, phaohri deita a chà aw. Chakaona hawhta na pachà khiah deikua la, hro lyna a cha pie aw.
Leo Tolstoy ( 1828 – 1910) Russian Writer ta cha, ” Chyhsazy heta ama chakaona ama sai palie chàh deita ta lyna hmeiseihpa ama hnei tyh” a tah cha maw!! Lei chyhsazy ta eima tlua chaipa cha lyna he a vaw chä. Aly awpa eima khoh khiata la, chakao thlàh ha tua sy. Eima chakaona sai palie awpa eima hnei hra tly ma?
William Shakespere, English poet nata writer ta cha, he khizaw he nohthlah a châna daosàh nata a thlie pakho. Cha daosàh liana cha daihti nano nanopa liata chyhsa nano nanopa a vaw là tyh ei ta, buakha ta dähdei daihti vaw hmâh tyh ei ta, daosàh ama puasai lilaw ha heih tyh. Chata chuh, chyhsa tozy chàta he khizaw liata alà theina daihti piepazy a za rei lei tyh bao cha. Eima rureihpazy a thuzao khai hlà ta khizaw ta miah a my ha heih tyh. Anodeikua, khizaw ta a my thaileipa ama y tyh. Chakaona(Service) liata a hlä khaipa chyhsazy hih.
Eima maohphaona nata tovyuh nano nanopazy he chakaona hawhta eima pachà thei tyh leipa väta eima tha vaw thi tyh ta, ängiana rakha ta hria tyh pi ta, ngâ a chhih tyh leipa pi ta, nieparu khoh tyh pi ta, bawh paru khoh tyh pi ta, ai tyh pi ta, hria hluh a tah tyh pi ta ,eimà reithai tyh. Chakaona lia deikua hriapasa via khohna, a piepasa via khohna, a hlà vià khohna tlao miah a pahneisa tyh. Chyhsa thàchhie reih hmâ leipa ei ta, âmo thàpha a reih hmà hra vei ei.
Eima ràh heta châthaipa sawhkhà rai a hria awpa a ngiah chai leipa pi ta, politician thlàhthlipa a ngiah via khao leipa pi ta, awnano machâ nata pastor vàtlähpa a ngiah muarua khao hra ma pi. Ryureituhpa hnei hluh kaw pi ta, khihtlàh chhituhpa eima hluh. Chyhsa vätlàhpa châna a patu leipa y tlâ khao ma pi. Châhrasala, Maraland cha hmialà tôh dusaw kaw ta, a chhôh liata pahrâpazy pi eima hmia kai leipa ta, eima hnabei tlao a dy tyh he zaw ! Khazia rimà maw he tluta duasu chhiepa lia eimâ duah thlâh ha tly? Khàpa hropa vaw châ vei, eima chakaona liana eimâ hlà khai thei tlà vei. Sapa nata thlahpa liata he râh ta chakaotuhpa dopa a vaw hnei hluh via ti ta, a hmah sie aw ta, hmialâ tóh aw ta, a vaw chhua ua aw ta, a vaw sosàh aw ta, a paw a vaw pakai aw.
Biechhà n’awpa ta nata mo hropa chakao awpa à ngiah zie cha, Mother Teresa (1910 – 1997) biereipa he vaw hmàh ei sih la. “Chyhsa zakha na baokhà thei leipa chhaota pakha chhâ vaw chakao mah y”. Chakaona nata khâchâ a pazao hapa hmo miakha cha, AHLÀNA a chà.