SIAHA, 8 Thlarâh, 2019, Abeipanoh – Ary liata palâsapazy he târi 1-7 Thlarâh/September, 2019 chhôh ta Evangelical Church of Maraland Headquarters thâtih thiehpa tlâhpipazy nata Mission chakaona thâtih thiehpazy a châ:-
- MODERATOR:
Rev. C. Beima, Moderator ECM cha târi 7-9 September, 2019 liata Chhaolô Pastor Bia tlyhpa ta sie ta, Chhaolô Local Church, Hermon Local Church nata Sharon Local Church zy a tly aw. He Pogrammee liana heta chakaotuhpazy nata apakyhna hnei thei awpa ta hnabeiseihpa a châ. Târi 10 September heta Siaha lâ a zâ lie heih awpa ta hnabeiseihpa a châ hra.
- SENIOR EXECUTIVE SECRETARY:
(1). Rev. Dr. Laiu Fachhai, SES cha târi 8 Sept’ 2019 (Abeipanoh) ta Siaha Vaihpi Local Church liata bierei chakaona a hnei aw.
(2). Târi 9-12 September, 2019 chhôhta NEICC Vice President a châpa hawhta NEICC Working Committee nata Executive Committee a hlao awpa ta a sie heih aw.
(3). Cha khai tawhta târi 13-16 September chhôhta Garo Baptist Convention Youth Mission Conference liata Resource Person châ awpa ta Thiara lâ sie aw ta, 18th September ta Siaha a vaw tlô heih awpah ta Programme taopa a châ.
- EXECUTIVE SECRETARY (EDU):
Rev. Dr. S.T. Zawsi, Executive Secretary (Education) cha târi 7 September, 2019 liata Lunglei Mara Church ta ama vaw hruapa hawhta chakaona hnei awpa ta Lunglei lâ sie aw nata, târi 9 September (Mon) liata Siaha lâ â kaw lie heih awpa ta hnabeiseihpa a châ.
- MISSION NEWS
1). Missionary Sponsorship :
Local Church 84 tawhta Missionary a sponsor theipa maluh zydua 1665 eima châ. August thlâpâ chhôhta maluh 163 ta vaw pôh via pi ta, aly a chhi ngâsâ. Missionary a sponsor hluh chaipazy Local Church 3 ary liata palâsapa a châ.
Local Church nata Maluh zie/Member:
- Bazaar, Siaha = 124
- New Colony, Siaha = 93
- Lôtai, Zyhno = 80
2). Target a patloh theipazy:
August thlâpâ chhôhta April, 2019 – March, 2020 châta Beihpari nata Local Mission Target a patloh theipa Local Church zy ary liata palâsapa a châ. (April – July, 2019 likawh liata Local Church 7 zyta Beihpari target patloh thei ei ta, Local Church 6 zyta Local Mission target ama patloh ha hra)
Beihpari Target: 1. Shamma, Laki, 2. Khaikhy
Local Mission Target: 1. Kaochao East, 2. Mawhro, 3. Noh-aotlâh, 4. Khôpai
2). Missionary zy ahneina: Missionary Satlia B. Joshua, Tiwa Mission Field, Assam nata Laihsa K. Khairili, Nepal Mission Field, Nepal zy cha September 13, 2019, Chutyhnoh, zâlâ dawh 1:00 pa ta ECM Local Church, Ebenezer, New Colony III liata Awnanopa dâh pathaihpa ta amâ hnei aw. Khazohpa khihnarâh kawhna châta thatlô viapa ta ama hria pazao lymâ awpa ta, thlahchhâna chôta khokheina sâh chaipa eima hlâ.
3). Furlough hmâh hai: Missionary Teacher KC. Buipisang, Mising Mission Field, Assam cha ama chhôhkha ta July –September, 2019 chhôhta furlough hmâpa ta eima râh liata ama y no a châ. Missionary Teacher he Chakhei & Chapi Pastor Biazy liata August thlâpâ chhôhta a chakaona report a pie.
- CHAKMA MISSION:
1). Chakaona lâchhâh:
(1). Târi 1.9. 2019 liana khata Mission Pastor A. Lachhantluanga cha Udalthana lâ Awnanopa kaw tlypa ta chakaona a kaw hnei.
(2). Awnanopa manôh thokha cha lyu raihria daihti a châpa vâta lyu liata amâ rie hôlô.
(3). Assembly ta life jacket hriatuhpazy châta a chaleipapa cha liahsa kaw tlô ha bâ ta, ti laipa liata Missionary-zy thlalôh kawpa ta Balyh ama kia ngâ ha bâ awpa vâta ECM Assembly lâ ta alynabie ama reih.
2). Project lâ chhâh:
(i). Borapansury liata Siaha Vaihpi local Church zy ta Missionary quarter sa n’awpa sponsor ama piepa hmâpa ta quarter chhao sa pathao lymâpa a châ hra.
(ii). Damlui liata Edenthar Awnanopa- zy ta Achhyna O sa awpa amâ chhuahpa cha Motor – Backhoe Loader (JCB) ta chavah a chaka thei mâh leipa vâta O hmo chao thei mâh leipa a châ.
(iii). Ebenezer KNP zy ta Silsury liata Achhyna O sa awpa ama chhuahpa Ebenezer KNP-zy ta noh chareih sôh tluapa ta ama hlao lymâ tyhpa pahnopa châ ta, alyna bie ama reih hmeiseih.
(iv). Laki KTP nata KPP Joint ta November, 2019 chhôhta Borapansury liata work camp hnei awpa ta amâ pachhuahpanoh ngâ kaw hra.
3). Donations:
(i). Siaha Vaihpi zy ta Rs. 3,00,000/- baona ama piepa hleikhô ta Rs. 1,00,000/- tlai baichhi ei ta, Missionary-zy ama ly hmeiseih.
(ii). Laki KNP zy ta Krismas tao n’awpa châta phusâ Rs. 15,000 ama piepa chôta Abeipa mohta alyna bie ama reih.
4). Thlachhâkhei awpa ta ahawna: Missionary Beisunaw nah nôvah cha ama nô tlâh leipa pamosa awpa ta Aizawl lâ ama sie hai no châ ta, thlahchhâkhei awpa ta maniah amâ haw.
- ODISHA MISSION:
1). Kandhamal Area :
(1). Târi 3.9.2019 khata Missionary zy nata local evangelist nahzy Pastor Beirôna Hlôvy quarter liata thlachha paraona ama hnei. He liata Local evangelist nahzy tawhta chakaona thâtih nata thlahchhâkhei ama ngiahnazy nathliepa châ ta, Pastor Beirôna Hlôvy ta Khazohpa bie tawhta pasyuna a hnei ei.
(2). Târi 1.9.2019 liana khata Evan K. Maduati ta a mohôh ngâhaipa Sunapanga house church liata Pastor Beirôna Hlôvy ta Abeipa tlâhkhai (sacrament) service a hmâh. Târi 8.9.2019 heta Bereshit Awnanopa liata Abeipa tlahkhai (sacrament) pachhuahpanohpa châ heih aw ta, Khazohpa bietana a rei heih aw.
(3). Mission Pastor Beirôna Hlôvy Birthday alyna miahkha châta Bereshit Awnanopa Odyh to châta Birthday present châta saphâ bag 2 chalei ei ta, Awnanopa sahlaozy lâta a saipata ama rai. Abeipa ta byhnâ hluhpi ta vao lymâ mawh sy.
(4). Atahmâno he Evan Lalduhawma nata Local Evangelist Tangila Digal cha Baulmaha Awnanopa member zy nata achheipa liata tly(visit) na ama hnei ngâhai no a châ. Abeipa ta ama chakaona byhnâ apie theih nawpata thlahchhâ khei suh vy.
(5). Târi 5.9.2019 pata Local evangelist nah lyma raihna nata eima missionary zydua chhaota Karnetpur khih lata outreach ministry ama hnei.
2). Sambalpur Area:
(1). Târi 3.9.2019 kha Sambalpuri, Odisha chyhsazy ta ama pasô kawpa Nuakhai Festival (Chithieh ku) chata, Theophila house church, Hirakud liata Apakhyna ta daihti a hmâpa châta, niedo zy patohpatiapa a châ hra. Member 27 zy ta amâ vaw pakhy thei. Odyh apua theileipazy chhao niedo ama patoh patiapa raih khaipa ama châ hra.
(2). Local Evangelist Mihir Dip cha atahmâhlâ he a tliata liata member thiehpa Bâti a châpazy tlyna daihti châta ahmâ lymâ no a châ. Awnanopa member zy ta thlahchhâ khei chyu suh vy.
(3). Târi 8.9.2019 Abeipa noh liana heta Mission Pastor Dr. S. Lamo ta Theophila house Church, Hirakud liata Sacrament a chhuahnoh aw.
(4). Rev. Stephen Beihrosia Chozah, Field Director, OEM cha eima râh lâ tao awpazy nata mopakha peimawhnazy a hnei vâta eima râh la kaw sie chy ta, Director khitly chhôh ta Mission Pastor Dr. S. Lamo cha Field incharge ta y chy awpa ta raopa a châ.
- MISING MISSION:
1). Puhpa Thompson cha Nectar liata cross-cultural training, 4 months a patlô tawhta atlâh kawpa ta Mishing Field cha târi 1.9.2019 liata a tlô ha heih.
2). Târi 5.9.2019-pa ta Holy Grace School hawtizy ta Teachers’ Day Celebrate ei ta, daihti pha kawpa ama hmâh. Field Director Rev. L. Lychhua cha Chief Guest ta hruapa a châ. Programme a chhâ tawhta Teacher zydua niepahmaona, pati pahâh kawpa student zy-ta ama taopa pâ hra.
3). Târi 7.9.2019 ta field kâhvileipa thlahchhâna hneipa châ ta, leader châta Evan. Bikash Kari raopa a châ. Thlahchhâna subject châta ‘Christian Growth’ tahpa hmâpa a châ.
- TIWA MISSION:
1). Apahrana programme: Atahmâno he Tiwa Mission su lia cha apahrana program hmâ haipa châ ta. Awnanopa odyh to kiapa ta azo lâta hmâ tyhpa a châ.
2). Thlahchhâkhei awpa ta ahawna: (i) Tiwa mission field Native Pastor & Native Evangelist zy chakaona kyh liata keih ama chakâ via lymâ thei n’awpa ta. (ii) Tiwa Mission su liata hriatuhpa Missionary nah zydua châ ta. Sahpa nata Thlahpa liata thatlô kawpa ta keih ama chakâ lymâ thei n’awpa ta.
3) New Life High School liata hriatuhpazy, Pachutuhpa zydua nata achu haipa zydua châ ta.
4). Quarter thiehpa tlôh: Zâhnia hâta liana khata Puhpa K. Buithang nata a chhôhkhazy cha Quarter thiehpa liata ama tlôh haw. Ls. J. Didali chhao quarter thiehpa liata yna su liahsa â paryh ha bâ hra.
- MARALAND GOSPEL CENTENARY HOSPITAL:
Târi 29 August- 5 September, 2019 chhôh report.
1). Tlâhleipa apamosa zie – 94
2). Tlâhleipa admit zie – 37
3). Ultasound mo zie – 40
4). X-Ray – 15
5). ECG mo zie – 5
6). Endoscopy mo zie – 20
7). Hawsaih pih zie -2
8). Athipa – nil
9). Emergency Case – 17
10) Operation hnei zie –2
(Published by J. Lalvarliani, on behalf of Communication Department, ECM Assembly. Edited by Admin, MNN)