Chhôsoh ta khâ zarohpady tyh hra na ta, reih papua lei thai lei awpah a châ ha bâ pata ei pahnopa vàta Article chyhta Marapa chi nata pho thapasa ei hnei lai kawpa vâta ei vaw roh.
Marapa na ei châ eimâ ta hmeiseihpa ta a châ khiatala, he chàpaw pachhohpa ei vaw ropa he zyh cheingei awpah ta ei Mara chanô/narônô zy hnohta khokheina ao ei vaw tawh papua.
Pho hropa na pasâhsa kaw tyhpa khata, Mara chi nata pho châta athôkheina a tlôkhei tlyma?
Pho hropa zyta Mara chanô a hriahrâ awpah ta maniah amâ hnabeiseihna zy vâta, eima chôlia pha amâ chhuna vâ khata Marâ chapaw mohnao pata a chhiehru kawpa ta na pakhopâ tyhpa khaw!
Mara chanô pho hropa hry liata thokha cha ngiachhie amá chhi ngaita kaw. Kyh miah pachá hmeiseih leipa ta eima ráh lia sôh tlua n’awpa cháta zy, hmo hropa tlua n’awpah chátazy ta kyhpachâna hmeiseihpa y hlei leipa ta maniah ama khoh tyh.
Eima Biehrai liata Asadô nata Môâbâ chyhsa thokha Zu chyhsa hneipa zy kha Zerusale ku paduatuhpa Nehemia ta hriena taihta zy pie ta, chhie zy asakhâh ei khawh! Nôvah likawh liata rairuna â tyhpa hry liata a hluh via he cha ama Chipho heihpa a hnei leipa zy vâta a châ chai thlyu aw tah sih la reichhei thlyu aw ma pi.
Chadeileipa chhaota eima Biehrai lia heta a chi chi ta, a Pho pho ta tahpa he he hmô awpa a hluh kaw.
Khazohpa chhaota Chipho kyh he a pachâ peimawh kawpa a châ. Mizo Zirlai Pawl nah chhaota atahmâ cha Pho hropa lahpi vahpa châta hnei lei awpah tahpazy ta ama pathlu páh ngâ kaw.
Buakha aly ua kheikhona hnabeiseih chaipa hlao na patlohpa nota Mara chi nata pho maoh eima/napa phyu tahpa pahno pata Mara Chanô zy he a hra bâ ei suh vy.
Eima sô/sohsih thei vei khiatala, Mara chapaw amâ zai thlâh ha, Mara chi nata pho eima pôh viana a châ hleikhô ta, Marâpa eimâ boh viana, eimâ pasâhsana, eimâ pôkhana tlao a châ tahpa athiehpa ta einarô heihzy heta pahno bâ sila tahpa ei kho pasana ao chà ta, à hra bâ ei suh vy.
Marapasaw, na chi pho heihpa liata cha noza awpa nata maophyuh nawpa he khàpa kao lia hmata y vei. Phatu ha ta, eimà boh chaina a châ. Chhie khiah chhie khoh, pha khiah pha khoh, Meitipô tla khiah tlakhei khoh, Vàrâh ei kia khiah kiahkhei khoh tahpa he eima pathipalôh phiapa liata khâ à vaopa ta palôh a pa-i ei suh tahpa he ei Mara chanô heihzy hnohta àpasipa-aona bie ta apyh chyu sila tahpa palôh hmeiseih ta ei haw khoh kawpa ei mara Chanôzy heta â hra bâ ei suh u.
By: Kalvari Khaila, Aizawl