Siaha Khih: ECM Ebenezer Chhyna O chheipâh
SIAHA, 26 Thlarâh, 2019, Pobienoh – Rev. RA. Lorrain he satlia no tawhta Missionary palôh avaw phaohpa, Amazon Africa Rahzohpa thâhtipha ama chho beih leina su lâ taihta siepa ta palôhru liata a vaw veih chiehpa a châ. Missionary Society nano nanopa lâ chhao ta a vaw hia laihpa a châ.
Nokha cha London liata a O liata a y thlâh ha nota a mâ ma, a ta ma pahno leipa ta ‘Ao’ theita, sia ngâsâpa ta “India râh chhâna liata a pahrâpazy thâtih roh la, thâtihbu liata papua teh” tahpa a châ. Cha ‘Ao’ athei pa cha Khazohpa ‘Ao’ tlai a châpa ta a pahno. A chhôhpadâhpa lâ angia ta, thlahchhâ ta, “Abeipa y, Na awna a châ khiatala, ei sie n’awpa su ei pahno thei n’awpa ta, he BIBLE tawhta na chhopasia mah y tahpa ta thlah a chhâ khai nahta, BIBLE cha pahy ta, Luka, 10:10-20 he reih ta, Khazohpa awna ‘Ao’ A châ tahpa liasa apahno pasia haw.
Châhrasala a sie n’awpa lâthlôh pahno thei mâh vei. A uhta, JAMES HERBERT LORRAIN, Baptist Missionary Lôlei liata a ypa hnota châ thlai paphao ta, Arunachal Pradesh liata Abor Phozy hno ta chakaona a rua nata rua lei hiahri ta, châhrasala a uhta James Lorrain ta thlai avaw chhy ta, su ruapa a y khao lei zie a vaw chho khô lâ liata ano yna tawhta noh 7(sari) siena liata chi hnohkhawpa mo luh la ahmâhpa ‘Lakher’ nah y ei ta, âmo he Zisu Krista thâtihpha apahno leipa ama châ tahpa za chhoh ta, a palôh a hria ngâsâ kaw. He leipa chhao ta Puhpa Hrepo (Karani), Thiahra Bei Sawchapawpa ta Baptist Missionary hnohta thâtihpha chho awpa ta â hawna châ (letter) chhao a uhta tawhta a hmôpâ hrâ. He heta a palôh hria ngâsâ kawpa a châ.
Lakher(Marapa) râh lâ thâtihpha chho thei n’awpa ta târi 11.2.1905 liata London khihpi liata “ Lakher Pioneer Mission” a vaw padua haw. Ama Motto cha “Founded on Prayer and Launched in Faith” – Thlahchhâna ta abôpa nata Ngiapâna ta asie papua tahpa ta palie theipa a châ. He py he “Evangelical & Inter-denominational” tahpa ta biepa a châ hra.
Mara râh pangaipa ta ama vaw sie.
Rev. R.A Lorrain novah chata ama O-lyuzy cha tlaichhai kaw hra ei sala Abeipa ta a tuana su lâ (Lakher Land) pangaipa ta London khihpi, noh tla tiah lei râh puasaipa ta 18th Nawh,1907 nohta ama vaw sie haw. Ama kaw sie my he noh hropa hlâ ameih achhoh via ta, dâhhaw chhao a tla hluh pachai khia maw tah theipa a châ.
Palôhlie kawna chôta chhôkha viasa richâhzy, unawh sietanô chhaota Train Station taihta vaw pathlie ei ta, chibai-zy amâ bu khai tawhta Euston pangaipa ta vaw sie ei ta. Abeipa baona ta Liverpool khihpi tlô ei ta, Liverpool tawhta 30th January, 1907 ta Port Said, mei balyh pahâna su ama tlô. Mei balyh ta sie heih ei ta, 12th February, 1907 ta Sri Lanka khihpi Colombo ama tlô. Colombo tawhna heta balyh pyly ta Bay of Bengal lâ heipa ta Tilaipi liana cha vaw sie lymâpa ta, Târi 16.2.1907 pa ta India khihpi Calcutta cha 6:00PM liata ma tlô. Culcutta liata a uhta James Herbert Lorrain nôvah Missionary Conference avaw hlaopazy nata a hmô ei ta, amâ lyna âki ngâsâ. Baptist House liata tlô khoh ei ta, noh 4 chhôh ama châh.
Culcutta tawhta kaw sie lymâ heih ei ta, Chandpur(Bangladesh) kaw chapiapa ta Rangmati, atahmâ ta East Pakistan lâ chapiapa ta Demagiri (Tlabô) ama kaw tlô. Demagiri (Tlabô) tawhta Lôsai a kaw ri ei ta, Abeipa noh ama hmâh.
Pakhyna liata Marapa râh châta thlahchhâna ama hneipâ ha. Lôsai khih liata a uhta J.H. Lorrain tuapa chyhsa manôh 25 ta ama vaw dy. Lôsai tawhta palôtlâh kawpa ta sie ei ta, 5th March, 1907 noh ta Lôlei amâ kaw ngia. “WE WELCOME YOU WITH GREAT JOY’’ châ rohpa tawpa ta a rônah thei chaipa hawhta zawpi ta ama vaw dy. Reihzy â chu khohpa vâta Lôlei liata thlacharu nata âkhophie tlai ama y tawhta, Dt. 19.9.1907 ta Lolei puasaipa ta Mara râh lâ ama kaw sie.
Târi no 25.9.1907 ta Marapa khih hmiatua chaipa Paithah khih ama kaw tlô. Dt. 26.9.1907 nohta Paithah tawhta Beinô chhopahru tlô ei ta, ti thata vaw lai ta, ama nô apo ngâsâ. Vâhnei chhih kawpa ta hmozy pahlei tlâ leipa ta ngiahkâh puakhei ei ta, amâ ly ngâsâ. Thapaw kawpa ta kaw palâh lymâ eita, Khazohpa ta tuana su Saikao khih cha Dt. 26.9.1907 noh zâlâ dawh 4:00PM pohbiehnoh ta ama tlô. A vaw dytuhpa hmia pahnopa pakha hmâh ta hnei vei ei. Saikao khih liata O lai chaipa ngiahdih O pangai ei ta, cha O cha Saikao beipa Thylai O châ ta, a lahpinô nata mei a vaw ai hlâ ha ei ta, vâro pi amâ pahâ tawhta abeinô chata sadô liata Basu tlaikha thlie ta, a vaw chhai ei. He noh he Marapa sawzy châta noh ngiatlah a châpa, THATIHPHA tlô noh Marapa sawzy châta thlahpa lâ liata eima pina noh ronahpa a vaw châ haw.
L.P.M Missionary zy thâtih chyupa.
REV. REGINALD ARTHUR LORRAIN (1880-1944)
Rev. Regionald Arthur Lorrain he târi 10th July, 1880 liata London khihpi lia a vaw pih. A paw James Lorrain châ ta, anô moh cha Moud Louisa Hawkins a châ. R.A. Lorrain heta unawh pathôh nata sietanô pakha a hnei. A paw James Lorrain he Post Master rai metropolitan London liata a hriapa a châ. A paw James Lorrain lâ tawhta a laichadaipa ta ‘William the Conquerer’ daihti no tawhta riahphapa lymâ dao tyhpa chhôh ama châ. Nôvah a ly thei kawpa chhôhkha ama châ. Ama unawh liata uhthei chaipa James Herbert Lorrain he British Baptist Missionary Society tuapa ta Lôlei liata Missionary ta a ypa a châ. R.A Lorrain he Withriff Grammer school liata Junior Cambridge achu patlôhpa a châ.
A satlia thyudyuna daihti liata USA nata Canada liata kô 4 chhih a kaw y. A thyudyu nota a kho chaipa nata a byuh chaipa cha ahyhma ta ama tly beih leina su Razohpa Amazon nata Africa lâ liata a zoh chaina la sie awpa he a châ. Missionary Society nano nanopa hnohta hiah laih ta, châhrasala a hlaotloh tlâ vei. Kô 3 chhôh London Exchange Company liata a vaw hria. Razohpa lâ sie awpa a chhuahna a parao khai vâta lahpino hnei ta, London liata si daoh ta, khihsa a patyu awhpa â vaw chhuah hapa a châ. Kô 4 chhôh a y tawhta Mara râh lâ thâtihpha chhopa ta Abeipa awna ao sia kawpa thei ta, Missionary Society nano nanopazy ta vaw dytha hra ei sala, palôhru siapa a tao haw. Mara râh lâ Missionary ta a kaw sie thei n’awpa châta a viasa a khypazy Mission lâta a pahâhpazy a patlapasaopa ta, Lakher Pioneer Mission (LPM) Missinary Py cha târi 11th February, 1905 pa ta London liata a vaw padua haw. He daihti chhôhta Livingstone Medical College liata Diploma course patlô ta, he a chuna hryuna he chanô pakha Mission lâta a vaw vei kawpa heta â vaw tôhpa a châ. R.A. Lorrain he Mara râh lâ Missionary ta â khy hlâta Rev. Hugh Wallace ta Ordination chakaona a hneipa a châ. Lahpinô pha kawpa a kaolâh awpa Miss Moud Louise Ulander cha 20th October, 1906 liata hnei ta, Rev.Hugh Wallace pyly ta ku a patusa ei.
Rev. R.A. Lorrain hnohta British sawhkhâ ta Missionary rai a hriaphana nata a baokhâna zydua vâta “GEORGE-VI CORONATION MEDAL” a sâh ngaitapa 12th May, 1937 ta British vyuhpa ta ROBERT REID, Assam Governor ku tawhta a dao hra. Rev. Lorrain Mara râh lâ â khy no ta kô 27 uhtheipa châ ta, Mara râh liata kô 37 chhôh tlai Missionary rai a vaw hria tawhta kô 64 a cha no ta, 4th February, 1944 pa lia ta Khazohpa hnohta â vaw pahâ haw. Amylâ târi 5th February, 1944 dawh 10:45Am lia ta Mission Compound, Saikao liata Marapa leilô liata paziapa a vaw châ haw.
Mrs. Moud Louise Ulander Lorrain (1875 – 1960)
Mrs. Moud Louise Ulander Lorrain he 16th August, 1875 liata London khih liata a pi. A paw he Swedish chyhsa Otto Wilhem Ulander a châ. Hneirôh kawpa chhôhkha tawhta vaw laiseipa achâ. Rev. R.A. Lorrain nata târi 20th October, 1906 liata Anerly Congregational Church, London liata ku amâ patu. Mrs, Moud Louise Ulander he chanô riahphapa nata thlah a chhâpa, Khazohpa liata tlokhuh a pahniehpa a châ. A vahpa R.A. Lorrain chakaona kyh liata a vaw deichhy ngaitapa chyhsapa a châ. Marapa chanôzy hmo bieh nata hmo phieh dâhzy nata Khazopa bie zy a vaw pachu tyh hra ei. Khizaw a dyuhpipa ei 2-na liana khata missionary hluhpi zy ama râh lâ ama kuana daihti liata a vahpa nata “Keimo la, kua thei ma pi, eima chyhsa zy siesai thei mapi, Marapazy ama thina lia maih tlâ eima thi hra aw” tahpa ta rairu chaina daihti no ta Marapazy kyh, khâchâ a vaw pachâpa a châ. A dyuhna vâta British pheihsaih nata moleipazy aly kawpa ta vaw dy tyh ta, Arâzy chhao hmo phao n’awpa ta a vaw pahlie tyh ei. He vâta British sawhkhâ aly kaw ta, adyuhna liata chyhsa riaphapazy ama pie tyhpa “Tâkâ panô” KAISAR-I-HIND MEDAL” cha kô 1946 liata British sawhkhâ ta Mrs. Moud Louise Ulander hnohta Missionary rai a hriaphana zydua vâta a vaw piepa a châ. Pihno Moud Louise Ulander heta sawchanô pakha sa ta, amoh cha, “Louise Marquerite Tlosai Lorrain” a châ. Pihnô M.L. Ulander he kô 32 a châ nota Mara râh lâ a khy ta, kô 53 a chakao tawhta kô 84 uhtheipa ta, târi 23rd May, 1960 liata a chakaotuhpa Abeipa hnohta â vaw pahâ haw. Saikao khi Mission Compound liata a vahpa thlâ liata pabupa a châ haw.
Mrs. Louise Marquerite Tlosai Lorrain (1909-1968)
Pihnô Marquerite Tlôsai he Rev. R.A. Lorrain nata Pihnô Moud Louise Ulander sawchanô hneichhôhpa a châ. Târi 18th September, 1909 lita saikao khih liata a pih. Mongyupa Mara râh liata a pih tuahchaipa a châ. Ano a vaw pi tawhta Marapa palôhru cha pa-isa ta, Missionary nawh bie nata hla chhao zo via bâ ei ta. Marapa râh liata y hmeiseih awpa ama châna chhao ama zo via ha bâ hrâ. A vaw laihsa tawhta Missionary laihsapa Irene E. Hadley nata Ls. N. Chiapy zy chhaota a vaw kao ei ta, Mission school, Sunday school nata Hati penawhzy chhao ama vaw pachu lymâ tyh hra. Mara râh liata KTP nata KNP paduatuhpa zy hry liata pakha a châ hra. Pôhraoh pha kawpa nata chhithai kawpa châta, hlasa chhao a thai kaw. London Khihpa West Minister Central Hall liata ama pakhy nota, Mara reih ta, hlapasasa tyhpa nata hlasa a thai kawpa a châ.
Rev. Albert Bruce Lorrain Foxall nata 20th September, 1934 liata Ponge Congregational Church London liata ku amâ patu. 16th April, 1938 ta sawchanô khochhih kawpa Violet Louise Annie ama hnei. Pihnô Tlôsai he a laihsa noh tawhta ano chakaona vaw bao tyh ta, hmo biehzy vaw pachu tyh ta, ano ta a vaw pachu nahta cha achu penawhzy chhaota ama vaw pahnothai ngâsâ tyh. Ano he Marapa hla chhaota Mara reih a thai viapa a châ. Sunday school pachuna lia chhaota hmâhtlâh a châ kawpa a châ. Pihnô Tlôsai cha Mara râh liata kô 60 a vaw y tawhta Cancer pasana avaw tyh ta, Ludhiana Christian Hospital liata 21st June, 1968 noh ta a vaw pahâ haw. Kô hluhpi a vaw sie tawhta a ru reihpa cha la pa châ ta, 6th November,1992 liata saikao khih Mara râh leilô liata pabu lilaw heihpa a châ.
Miss Gladys Ramsey (1921-1927)
Miss Gladys Ramsey he Rev. R.A. Lorrain novah London lâ chhuti ei ta, amâ kaw lie nota ama hnohta, ama chakaona bao awpa ta kô 1921 liata Mara râh lâ akhypa a châ. Mission chakaona liata a pie kawpa chyhsa, chakaona liata ngâhchhih kawpa chyhsa, a chakaona hleikhô ta a hropa liata a pahlaopahli khoh leipa a châ. Mission school liata pachu tyh ta, Abeipa noh maihta Sunday School pachu tyh ta, chanô nawh he a chhitha via chai tyh. Music a thai kawpa tota nata piano zy tô thai kawta, hlasa chhao a thai kaw. Kô 7 a vaw chakao tawhta 9th February, 1927 liata London lâ a sie pakhua haw. Marapa zy chhaota eima my thei khao leipa a châ.
Mr. John Mark (1924-1925)
John Mark he chyhsa dovâh seih kawpa, chyhsa palôh patlâh kawpa, Denmark chyhsa a châ. John Mark he a thaina lâta B.A. a passed pa a châ. Ano he thâtihpha pahno mâh leipazy lâ ta kyhpachâna a hnei ngaitapa, Khazohpa palôhru a hlypa ta Marapazy lâta Khazohpa kyhpachâna palâhâhtuhpa pakha a vaw châ. Cha cha a hmotaopa nata hrozie nâchâ ta a vaw palâsa tyhpa a châ. Marapa râh liata a rei leipa ta a vaw chakao chhôhta a panawhna hro phaopa ta, Missionary Bungalow lia chhaota a rie khoh leipa ta, Hostel liata Siku hâtizy hnohta tlâ arie laipa a châ. A hrozie nôchâh ta, Khazohpa kyhpachâna phualua ta, Marapazy ta my thei beih ma pi. Â khy kô lilawh ta London lâ a sie pakhua haw.
Rev. Albert Bruce Lorrain Foxall (1903-1977)
Rev. Albert Bruce Lorrain Foxall he thla ki leipa thla 7 ta pihpa châ ta, 30th July, 1903 thlahpa liata Bridge North, England liata a pihpa a châ. Bridge North he London tawhta Km. 120 a hlapa khihpi miahkhâ a châ hra. A paw he sôhdaohna lai kawpa a hneipa a châ. Unawh pa 4 nata sietanô pa 5 hnei ta, ama hryta a seihnai chaipa a châpa vâta a paw ryu totuhpa ta pachâpa a châ. A uhta zy cha pheisaih zy châ ei ta, anô cha a paw sôhdaohna a baotuh chaipa, Account lâchhâh a thaipa a châ. A thaina lâta Senior Oxford patlôpa chyhsa a châ.
Kô 1925 liata All Nation Bible College liata Missionary Training Course a vaw patlô hra. Kô 1927 ta Rev. R.A. Lorrain ta Lakher Land liata Missionary ta hria awpa ta hruana a pyh nota “Kô 7 chhâ hria tua leipa ta ei chakaona ei pahâsai khiatala, L.P.M ta keima châta sôh a hryuhna zydua he ei pakua khai aw” tahpa ta bie â vaw taih. 13th October, 1928 ta England tawhta Mara râh pangaipa ta a kaw sie. Mara lâ a khypa he a paw ta paryhsa leipa ta, châhrasala a nota khâchâ a kho hapa vâta a paw ta a vaw ei ngâh khao leipa a châ. Thohna raihria he ano mopakha tiamana nata phahnai ngiahna ta achu ta, pahno kawpa nata a thai kawpa a châ. Abeipa baona nata ano phahnai ngiahna ta Dawty zy chhao ta ama hnabeidy chiehpa, tlâh leipa hluhpizy ama vaw tlâh hôlô; chyhsazy ta ama reithai kaw tyh.
Târi 20th September, 1934 ta Louise Marguerite Tlôsai Lorrain nata London liata ku amâ patu.16th April, 1938 ta Sawchanô khochhih kawpa hnei ei ta, amoh cha “Volet Louise Annie” tahpata ama biepa a châ. A.B. Lorrain Foxall he a chyhsa châna liata chhao Chyhsa nônaipa, hmo apachâ pasih kawpa a châ. Châbu reih hoh kawpa nata Thlahchhâ hluh kawpa a châ. Missionary hmiatua chaipa Rev. R.A. Lorain rai chhâhbâhpa zydua vaw pazao lymâ ta, Bible Translation chhao he avaw pazao lymâpa a châ. Kô 1956 ta Bible pôhpalôhpa cha a papua theipa avaw châ haw. Amen!! Marah râh liata Kô 49 Missionary rai ahria hai nota kô 74 uhtheipa ta Châ-ao pha leina vâta 2nd July, 1977 ta a chakao tyhpa ABEIPA hnohta â vaw pahâ haw. Â vaw pahâpa he Marapa Zawpi palôhrupa hria ngâsâ ta, ano daihti hnoh chaipa pathliena cha Saikao Mission Compound liata hmâpa châ ta, Rev. T. Laikai ta a thâtihzy reih ta, Senior Pastor Hratlu Nohro ta pabuna chakaona hneipa ta pathliepa a châ haw.
Miss Irene E. Hadley (1928-1934)
Miss Irene E. Hadley he kô 1982 pata Rev. Albert Bruce Foxall nata Miss Gladys E. Gorst zy hnota akhy hrapa a châ. Sunday School pachuna lâchhâh liata apie kawpa nata Chanô nata Hawti zy chhihthana lâchhâh chhao asaoma kawpa chyhsa achâ. Mara râh lâ akhy hlâ chhao ta Rev. R.A. Lorrain ta Mara reih achu chhielie awpata avaw chho chapa a châ. Rev. R.A. Lorrain ta Mara reih avaw test daihti lia chhaota ano nata Rev. A.B Foxall cha First Class liata ama passed lymâ. Chanô nata Hawtipa lâchhâh ta Khazohpa bie he apachu via chai ei. Miss Irene E. Hadley cha ko 1934 liata America lâ alie tawhta vahpa pha kawpa ngiapatuhpa English chyhsa hnei ta, Rev. T. Laikai USA liata achu daihti 1978 liata Mara râh ama vaw my thai lei zie nata thlah khâ avaw chhâpa tyh tahpa avaw chho. Vâdua chhi kawpata 23rd July, 1978 pa ta a chakao tyhpa Abeipa lâ ta â vaw pahâ haw.
Miss Gladys E.Gorst (1928-1929)
Miss Gladys E. Gorst he kô 1928 liata London tawhta Rev. A.B. Lorrain Foxall heta Miss Irene E. Hadley zy hnohta akhy hrapa a châ. Ano he chyhsa sia kawpa nata hrozie nôcha pha ngâsâpa châ ta, Sunday School pachuna kyh liata Laihsa Tlôsai Lorrain nata Laihsa Irene E. Hadley zy a bao tyh hra ei. Ano he Khawchhu(Typing) a thai kawpa vaw châ chho ta, Pringting Press liata ama hmâ phahnai kaw. Hawtizy nata Chanô zy pachuna liata a saomâ kawpa nata a rai liata ngâchhihpa nata a sia kawpa a châ. Mara Râh liata kô 1 a y tawhta December, 1929 liata London lâ alie haw heih.
Mr. Jelly, Mary, Susan Nata Johny (1935)
Amo pawsaw 4 penawh he kô 1935 liata Marapa râh liata Missionary ta y awpa ta a khy ei ta, ama theina rakha ta eima Missionary nahzy vaw bao lymâ ei ta, ama hriapasa kaw. Mr. Jelly he pawhmeipa a châpa vâta chatlupo ta a kho pasana hawhta vaw chakao thei leipa ta, a saw nah mohhôhna raihria chhaota a châpa vâta rairuna hluhpi a vaw tyh ha ta, Mara râh liata y parei thaipa a chakhao leipa vâta, ama khy kô November, 1935 liata a sawzy chhaota ama yna râh lâ maniah amâ lie sai haw hei.
Mrs Violet Louise Annie Lorain Foxall Mark ( 1938 )
Mrs Violet Louise Annie Lorrain Foxall Mark he Rev. Albert Bruce Lorain Foxall nata Mrs. Marquerite Tlôsai Lorrain sawchanô hnei chhohpa a châ . 16th April, 1938 liata Saikao khih liata a pihpa a châ. Eima Missionary hmiatua chaipa Rev. R.A. Lorrain samohpa a châ. Ano he eima Missionary pathla a sie lymâpa Mongyupa thisai dopa ta a hrohpa a y chhôhpa Missionary hnôh chaipa a châ. A hawti no tawhta a phana rakha ta anô nata paw Mission chakaona liata a vaw bao tyh ei. Chyhsa do kawpa nata a reisi kawpa Mara reih chhao a thai kawpa a châ. Kô 1986 liata KNP President châ ta, Khopai khih KNP Pakhypi liata ryureihna nata Committee peimawhpa hropa chhao a pha kawpata a chhitha thei. Pihno Violet heta kô1969 liata Marapa chyhsa Rev. L, Mark B.A cha vahpa châ ta hnei ta, sawchapaw 3 nata sawchanô pakha ama hnei. Pihno Violet he Rev. Dr. Lambert Carter ta Pastor châta ava ordained. Pihno Violet he Awnanopa Member zydua ta pasâhsa pi ta, eima zah ngasâpa a châ. Abeipa ngiachhiena vâta atanoh taihta miah hrolâ ta eima ly ngâsâ kaw sai. Marapa râh Awnanopazy eima pôhkha heih theih n’awpa he a vei chaipa nata a thlahchhâna chaipa a châ tyh.
CONCLUSION:
Ryhpa chaneina 32:7 liata eima hmâpa hawhta, “Hlano noh zy cha a thei thlâh hala chhâ hluhpi kô zy cha pachâ tua, na paw hiahri la, a cha chho aw, machâzy chhaota ama cha chho aw” tahpa bie hawhta Mara râh liata Missionary a khy penawhzy hro tawhta a chu pachhuah awpa eima hneipazy eima theihna rakha ta, vaw pahripazia tua ei sihla.
Ama tiamana nata ama hriapasana hro he a peimawh chaipa a châ. Biehrai pôhpalôh paliena kyh liata Presbyterian Missionary nata Baptist Missionary zy hlâ ta ama vaw hriapasana theilâpa cha, kô 1956 liata Biehrai pôhpalôhpa eima vaw hnei haw. Saikao liata râhsazy daodo kawpa ta vaw mohôh lymâ ei ta, ama hohna tawhta râhsazy daodo ta pabohsa awpa he miah ama pachu ngaita kaw. Chi nata pho ta miah padua ei ta,ryureina eihrapa District council hnei pi ta,(Education) vâta hmasiena thata eima vaw tohpa a châ. Eima missionary zy kaw tlô leipa ei sala, Marapa sawzy he Hindu nata Muslim, phoryh hropa lâta zy y pi ta, reih hropa cheihpa ta eima y hôlô thlyu aw. Ama y na râh lâ chhao a lie khao leipa ta, Marapa leilô liata ama hrona chhâ ta, tlokhuh amâ piena hro he my thai rimâpa châ vei.
Eima missionary nah raihriana nata chakaona tawhta saipa ta, Mara râh Awnanopa cha special ta paduapa a châna â vaw lâ pasia kaw. L.P.M paduah noh tawhta atanoh taihta ECM Awnanopa cha khazohpa paduapa,Zisu Krista Bei chaipa ta a hneipa, Zisu khohzie ta apachuna a chaba lymâpa, Apostol zy pachuna liata a pahniehpa, Zisu Krista lyuna lâta alaiseih lymâpa, Moleina siesaipa ta pathaihna hrohta a hropa, Awnanopa a pôkhana a chadai lymâpa, Zisu Krista bie piena Sacriment 2 Batina nata Beipa zâh pati hmâ lymâpa, thatihpha chho pakawna a papeimawhsa lymâpa eima châ.
ECM Awnanopa cha sasyh ta ryu a reipa, sasyh ta achyh papuapa nata sasyh ta a tuah papuapa Awnanopa châ awpa ta eima Missionary nahzy ta maniah ama pachu chaipa a châ. Atanoh daihti hnô chaipa liata Awnanopa zy pi heta eima pizie dohpa eima pahno pasia awpa âbyuh ngaita. Sasyh ryu a reipa eima châna hawhta, ryureina dohpa Abeipa khozie ta ryureina siapa nata dohpa padua ei sih la, sasyh ta achyh papuapa eima châna hawhta, Beipa lâta ku riaphana palâsa rili sih la, sasyh a tuah papuapa Awnanopa eima châna hawhta, Missionary chakaona kyh liata ECM Member hry tawhta missionary he a tuah papuapa hluh via lyma awpa he eima maophaohna lai chaipa a châ.
Abeipa ta byhnâ pie mawh sy!