SIAHA, 26 Thlarâh, 2019 – Mararâh liata Thâtihpha tlôna atyh heihna ei 112-na noh liata Mararâh liata ypa Marasaw zydua nata Khizaw kaoki liata Marasaw ypa zydua, anaohna nata zana Samaw ei cha hlâ chyu ei.
Eima Missionary nah nôvah Mrs. & Rev. RA. Lorrain zy cha târi 18 Nawh(January), 1907 pa ta Kheihti nata Sâhpiti lona râh London khihpi vaw puasai ei ta, atanoh hawhpa târi 26 Thlarâh(September), 1907 pa ta Saikao amâ kaw ngia; ama lâpi a pahsi ngâsâ.
Eima Missionary nahzy hriapasana nata tiamana vâta Mararâh amâ vaw ngia tawhta kô 3 khô lâ liata Krizyh hmiatua chaipa Puhpa Thytu Tlâpyu cha kô 1910 liata bâti a vaw châ.
Atahmâ deikua Marasaw zydua cha Krizyhpa eima châ khai haw. Abeipa moh cha reithaipa ta y mawh sy.
Marasawzy 100 liata 100 Krizyhpa eima châna he ta Rev. RA. Lorrain ta London tawhta â vaw phaopa tah thei awpa Biehrai bie tawhta biepipa châta a hmâpa “THYULA KHAIH TE!” tahpa cha apaki haw tah thei awpa a châ.
Marasawzy, byhnâ eima tona hnawh cha Thâtihpha he a châ tah leitheipa châ vei.
“Thâtihpha avaw tlôkheituhpazy pheipazah cha â ngia kaw dia!” (Rawma Mozy 10:15).
He hawh ta a châ no ta Marasawzy ta Thâtihpha byhnâ liata bua pi ta, Thâtihpha avaw tlôkheituhpa nata cha Thâtihpha, ly y chhihpa maniah chhopachhuahtuhpazy cha eima my ha khiah ma tah thei awpa ta eima duahmo apha lei kawpa ta ei pahno tyh.
Achhâpa cha alynabie reina châh apahno tlâ leipa eima lyu kaw vâta.
Zisu ta aphawhpa pa 10 a patlâh no ta mo pa 1 ngâlâh ta alynabie reih ta, mo hropa zydua cha alynabie reih leipa ei ta, Zisu aly vei tahpa eima pahno. (Pathipalôh liata alynabie reipa châ leipa ta, hmotaopa-pôhpa alâpa ta palâsa abyuhpa alyu kaw.)
Chavâta, Marasawzy, khihsa tôtuna liata byhnâ eima topa zydua vâ nata hri-iah pathaih-hnatlâna phapa eima hneipa zydua vâta Khazohpa lâ alynabie reih ei si la, Thâtihpha vâta byhnâ eima topa zydua my leipa ta atanoh THÂTIHPHA TLÔ NOH pachhaipadaipa ta khâpa chhâ ma, hmotaopa liata palâsapa ta Khazohpa lâ alynabie reih chyu ei suh u.
Kô 2019, Mararâh Thâtihpha tlôna noh atyh heihna noh alypa nata thapha kawpa ta ahmâh chyu awpa ta kyhpachâpa Marasaw zydua, zana chô ta khokheina sâh chaipa ei cha hlâ ei.
(Arohtuhpa: BeiRôkhu Beitâ, Admin, MNN/maraland.net)