SIAHA, 19 Phiata, 2019, Pachynoh – Zâhnia my dawh 11:30 Am liata Puhpa K. Chhuabei, EM i/c PWD etc., MADC ta Vahia khih liata Paritheipa Adyuhna Tournament 2019 liata khichhai laipa(Chief Guest) châpa ta Final Match pahyna hnei ta, noh y ta daihti ahmâkhei ei.
He Tournament he MTP General Headquarters Resolution alaichadai pazina châta MTP Branch: Vahia ta apatohpatiapa châ ta, târi 14 Phiata, 2019 liata tlôpaki ei ta, târi 18 Phiata, 2019 liata pachhâpa a châ. Tipa RD block ry liata MTP Branch aduahpa zydua hruapa châ ei ta, he hry liata Mawhrei, Laki nata Lôpu Branch zy tawh ngâlâh ama vaw tlô thei.
He Paritheipa Adyuna Tournament he Chapaw châta Football taopa châ ta, chanô châta Volleyball taopa a châ.
Puhpa K. Chhuabei, Chief Guest biereina chyupa hnei awpa ta daihti piepa châ ta, ary liata palâsapazy he a bierei peimawh viapa thokhazy a châ:-
- Atanoh noh nata daihti pha kawpa miah pietuhpa eima Khazohpa hnoh ta alynabie ei reih.
- He hawhpa Tournament pitlohpa ahlaotloh theina awpa ta kyh toti liata avaw buakheituhpa MTP Vahia Leader zy hnoh ta alynabie ei reih.
- Khichhôh nô nata paw, khichhai apatlôpa zydua hnoh ta alynabie ei reih.
- Vahia he, kahlâ via cha Field phapa eima hnei lei vâta Tournament he tao thei tyh lei pi ta, atahmâ deikua cha he hawh ta Playground pha kawpa eima hnei tawhta a ei 1-na châta eima vaw tao thei vâta ei ly hmeiseih.
- Tipa RD Block ry liata MTP Branch zydua, he Tournament ahlao awpa ta hruapa ama châ tarawpa ta, rairuna nano nanopazy vâ hleikhô ta eima hmiata liata MTP General Headquarters General Conference, Kiasie liata avaw y awpa vâta Branch to ta amâ patohpatia chyu daihti a châ vâta eima tlôpha leipa a châ nahta ei pangiasa.
- Final akhaih daihti liata khichhôh chyhsa Team zy dei ngâlâh châ leipa sa la, khichhai vs. khichhôh team vaw châ thei sala tahpa kho â chhih kaw no ta, khichhôh Team zy ngâlâh ta Final namâ vaw khaihpa deikua khichhai lâ saihei amâ chhih hmeiseih. Anodeikua Vahia khihsaw zy ta Camp taihta hneipa ta nama tiamana theilâpa a châpa ta ei pahno; ei châ lykhei kaw ei. Khichhai lâ chhao, he tawhta tiama papua via awpa ta ei haw hra ei.
- Football he Vahia ta eima thai kaw thlâh ha; Fitness lia deikua eimâ hnai kaw. Siaha District level liata puapa ta hlaotlohna to awpa ta cha Fitness liata thata tiama papua abyuh tahpa pahnopa ta tiama papua via lymâ awpa ta player zy ei châ haw ei.
- Tournament avaw chhâ tawh chhao ta Exercise la pazao lymâ u la, Siaha District level Tournament liata 1st Prize Trophy eima chaba cheingei awpa a châ.
- Eima râh he Pari theipa nata moleina chi to rai ta miah tlahnaoh hai ta, eimâ boh theina awpa nata Mara Chi nata Pho â boh nawpa ta cha keimo mo pakha chyu he eima peimawh tahpa pahno thlâh ha ei si la, chahawhpa hmopha leipa nata lahpi/vahpa hnei hlâ via cha chanô chapaw châna zy hmâ tlâ lei awpa ta ei châ haw ei.
- He, eima râh buah kawpa nata chyhsa chyh kawpa râh tawh he ta Sports Discipline nano nanopa liata State, National nata International Level taihta pua thei awpa ta palôh atao chyu awpa apeimawh kaw. Sports liata ataopha kawpa, alâluah kawpazy cha eima râh ta pasô pi ta, sawhkhâ rai chhao piepa ama châ lymâ tahpa pahnopa ta hnabeidy leipa ta hmialâ tôh lymâ awpa ta ei cha pasyu ei.
- Atanoh, Tournament avaw hlaopa zydua, hmialâ nama sie lymâ nawpa liata khokheina cha hlâ ei na ta, Sports siepahliepa ta Mararâh châta hmo phapa vaw tlôkhei chyu awpa ta khokheina ei cha hlâ hra ei. Ei châ ly kaw ei.
Khito tawhta Team atlôtheipazy duahmo:-
- Laki = Football Team 3, Volleyball Team 2.
- Mawhrei = Football Team 2, Volleyball Team 1
- Miepu = Football Team 1
- Vahia = Football Team 5, Volleyball Team 7.
Khichhai atlô theipa maluh:-
- Laki = 68
- Mawhrei = 36
- Miepu = 12
TOTAL = 116.
Final Result:-
- Football = Vahia MTP-1 vs. Greenlake Football Club, Vahia
= Vahia MTP Team-1 zy ama champion. - Volleyball = Vahia MTP vs. Greenlake Football Club, Vahia
= Vahia MTP Team zy ama champion.
Football he ta 1st Prize Rs.10,000/-, 2nd Prize Rs.5,000/-, plus Trophy, Medal nata Citation(Player zydua châta) a chakaih ta, Volleyball he ta 1st Prize Rs.5,000/-, 2nd Prize Rs.3,000/- plus Trophy, Medal nata Citation(Player zydua châta) â chakaih hra.
Tournament chhâ zâ liata MTP Branch: Vahia zy ta khichhai laipa nata khichhai avaw tlôpa zydua châta zâ pati niehmaohna ama taopa.
(Written by BeiRôkhu Beitâ, I & PO, MADC. PR No.43/2019)