SIAHA, 22 Phiata, 2019, Hriaheinoh (MNN) – Mara Writers Club(MWC), Siaha pachhuahpanohpa ta Marareih Campaign ECM HSS liata hneipa a châ
He daihti he K. Laitha, Fin. Secy. MWC ta chhihtha ta, Puhpa Beimosa, Sr. Adviser MWC ta devotion a hmâh.
Pihnô K. Pari, Matron MWC nata Satlia Beirokhu Beita, Adviser MWC zyta achuhaipazy hnohta marareih pasô via awpa nata palaiseihsa via awpa abyuh zie ama reih.
Daihti chhâna lâ liata Puhpa K. Zamo EM, MWC ta achuhaipazy marareih hmâh hluh via lymâ awpa ta bie apataihsa hra ei.
MWC heta Siaha liata Higher Secondary School zy hnohta Marareih Campaign a siekhei ngâhaipa he atanoh tahpa chhaota Siku sâpalih ama hnei kheina a châ.