SIAHA, 24 Phiata, 2019, Pobienoh – Atakô 2019 ta MTP General headquarters atlyna (Kiasie liata avaw y awpa) he achhithana dâh thiehpa hmâh awpa eima châ.
Kô hro ta atlyna eima hnei daihti liata cha arulâ ta candidate awpa tluapa ta branch meeting siepahliena chhao y leipa ta hmalana hlu kaw tyh ta, floor liata candidate a chhuparai pi ta eima hie eimâ pahâhpâ ngâ kaw tyh.
Tahmâ ta atlyna dâh thiehpa liata deikua cha Town chhôh liata branch zy ta arulâ ta tao khao leipa ta meeting siepahliepa ta Nominee pakha sai ama hnei thei aw.
Town Khôtho lâ ta sub HQ zy ta branch zy a saohiana chô ta nominee 2 ama hnei hra aw.
MTP HQ chhithatuh awpa chyhsa phapa nata ngâchhihpa, MTP hmochhuahpa apahnopasiapa Nominee awpa meeting siepahliepa ta apathai kawpa ta eima tlua aw.
Nominee awpa he 30 hlâta hlu via leipa ta alphabetical order ta moh paziapa ta list tao awpa a châ.
Hezy hry tawhna heta ama duahmo reita Marapa râh châta pha awpa chyhsa, post eima khopa liata eima chyhsa khopa kha vote bâ awpa a châ.
Achhithana dâh thiehpa he ei kha eima hmâ n’awpa a châpa vâta eima novâh khai leina nata pahnothai leina hlupi chhao y thei aw ta, kaw hmâh via lai aw pi ta eima pahnothai lai lymâ nah ta pangiasa â chhi..
Sub- HQ nata branch zy ta eima kaokâ, eima vaih, eima khih chyhsa tahpa palôh phao leipa ta khatai vaih liatahpa rai chyhsa phapa eima tlua awpa a peimawh kaw…
MTP HQ chhithatuhpa châta âlâhâhpa ta Meeting siepahliepa ta chyhsa phapa tlua theina daihti achhithana ta miah apasaipa hmâh thai leipa ta, nominee awpa ta ama pha nata phalei chhao pachâ leipa ta eima vaih chyhsa cheingei tahpa palôh phaopa ta nominee eima tao khiata la achhithana dâh thiehpa âchhuana chhei k’aw pi ta, chhithatuh phapa eimâ tly papua lei tlamaw aw tahpa chhao chi âchhi kaw aw.
Palôkaw kawpa phaopa ta Nominee awpa tlua chyu suh vy.
~ By: Lungmuana Hrahu