SIAHA, 2 Di, 2019, Hriatuanoh (MNN) – Atanoh dawh 12:00 Pm liata pathaopa ta Miss Ephesi Hlychho, Miss Mara 2019 alykheina cha Puhpa HC. Biakcheuva, MDC (F/o Ephesi Hlychho) O, Siahatlâh liata hneipa a châ.
Puhpa CR. Pathang, Vice President, MTP Branch: Siahatlâh ta Programme he chhihtha ta, Rev. Dr. FC. Beicho, Principal, MTC ta devotion a hnei.
Puhpa J. Kholai, General Secretary, MTP Branch: Siahatlâh ta Miss Mara 2019 contest awpa ta amâ patohpatiana tlâhpipa report a pie.
Puhpa N. Zakhai, CEM, MADC chhao a daihti sôh kawpa aparuapa ta he alykheina Programme liata ahlao ta, alykheina châta biereina chyupa a hnei hra.
Siahatlâh MTP Branch ta Hlapy ta alykheina hla ama sa hra.
MHP General Headquarters: Siaha tawhta Puhpa PP. Zalena, President chhao biereina chyupa nata alykheina bie reih ta, Miss Susan Khuhly(Miss Mara 2016 1st Runner Up) ta MHP Gen. HQ vyuhpa ta Miss Mara 2019 alykheina ku chalyuna a hnei. Puhpa PP. Zalena he Pihnô LC. Grace, a viasanô ta kaw zi hra ta, Puhpa Pakhaw Chozah, General Secretary(newly elected) chhao a kaw zi thei hra.
Mara Hlasa Py (MHP) General Headquarters chhao hruapa ama châna hawh ta St. Beirôkhu Beitâ, General Secretary chhao â hlao thei hra.
He alykheina liata Miss Teresa Syuhlô, Miss Mara 1st Runner up nata Miss Beipingia Nôhro, Miss Mara 2019 2nd Runner up zy ahlao ei ta, Miss Maria Chozah, Miss Mara 2019 contestant(Bazar) chhao â hlao thei hra.
Avaih hneituhpa Miss S. Beireisi, Miss Mara 2019 Best Costume Sub Title winner chhao alykheina liata â hlao thei hra.
Siahatlâh Joint VC tawhta bie reina chyupa hnei hra ei ta, chhôhkha lâ tawhta Puhpa HC. Biakcheuva, Ex-MDC, Miss Ephesi Hlychho Paw ta biereina chyupa nata alynabie reina a hnei hra.
St. Esban Mara nata Ls. Sichho zy ta Solo pa ta alykheina hla ama sa chyu hra.
Revd. NC. Vabeilua, Senior Adviser, MTP Gen. HQ chhao ahlao thei ta, biereina chyupa hnei awpa ta hruapa a châna hawh ta pasyuna bie pha kawpa reina a hnei hra.
Daihti chhâna lâ liata Chairman ta Programme liata avaw hlao theipazy zydua hnoh ta alynabie reina hnei ta, Revd. NC. Vabeilua ta byhnâ awna ta thlahchhâna a hnei khai tawhta Programme he pachhâsapa a châ.
Programme chhâ tawhta alyna kyhchhi, Puhpa HC. Biakcheuva ta â chhuanohpa cha alykawpa ta dôhpa a châ.
Siahatlâh he Miss Mara Contest liata kô 15 hlei tlai avaw hlao khao leipa ei ta, atahmâ liata he hawhta hlaotlohna ama vaw topa he avaih chhôh châta byhnâ a châ tahpa Puhpa J. Kholai, General Secretary, MTP Branch: Siahatlâh ta a reih.
(Admin, MNN.)