Bangalore, Dih 3 (MNN) – USA nata râh hropa liata tao pathao lymâ hrapa, Kuki, Chin nata Mizo ta a pahlyhpa liata chi pho zy Zohnahthlak joint fellowship – worship servive cha a ei khana chata Bangalore liata Bangalore Mizo Christian Fellowship pachhuahpanohpa ta Pahânoh, Tari noh 1, Dih thlapa 2019 khata Bangalore liata lyy kawpa ta hneipa a châ.
Su hrolâ hawhta he joint fellowship liana heta churches nata fellowships 10 hlei tlai ta ahlao ei ta, hlapy nata special items hluhpi hleikhôta py kha tawgta pakha lymâ he bietana chyupa ama pareisa chyu.
Bangalore Mara Christian Fellowship vyuhpa ta Rev. Dr. Peter Bei Chatlai Beita ta biereina chyupa hnei ta: he hawhpa akaoraona lâpi ama tao oha cha apha a tah zie nata aly zie reih ta; hata chareih ta apakhy mah leipa ama châna liata fellowship hropa zy ta ama deichhyna zy vata alyna bie reih ta, apôhkhana he USA lia zy, Australia, Europe nata râh to liata unawhzy ta tao lymâ ei ta, reihkah kyh chhao he sâkha ahly awpa a y awpa apha kaw nota English he common language ta a vaw pua via ngapa a pahno zie reih ta, USA nata râh hrolâ apuapa eima chyhsa zy chata chhaota common language pha viapa cha English he a châ haw ba, tahpa ta a reih.
Unaw zy he ryureina zy, ti nata tlâh nata rairuna rietheina zy ta kô hluhpi maniah pachhaih hrasala, apôhkhana eima tlua via lymâ abyuh, a tah.
Achhana liata, khei hawpa su liarai y ei sila, keimo zydua he Khazohpa ta aw eihpa, atly eihpa eima châ vata chyhsa hropa zy chata phaohri châ leipa pita, byhnâ châ via lymâ awpa ta a khokheina a hla ei.
Ano bie a rei khai tawhta Mara Laihsa Welden ta reithaina hla ngia ngaitapa Mara reih tlaita hlasana a hneipa hra.
He liana heta he joint fellowship athei thlahana ryuchâ cha Bangalore Mara Christian Fellowship hnohta piepa hrapa a châ.
Bangalore Mara Christian Fellowship vyuhpa heta uthei viapa liata Rev. Dr. F. Lalrotluangi w/o Puhpa PS Chhuasa zy novâh, Rev. Chatlai zy novâh, MCF Bangalore Chairman St. Roland, MSO Sub-HQ President St. Henry nata ama hrialahpa chyhsa 25 rachhôh ta ama hlao thei.
Daihti achha tawhta zâpati pahâh kawpa kyhchhina hneipapa a châ.
