SIAHA, 6 Di, 2019, Pachynoh (MNN) – Atanoh dawh 2:00 Pm liata Miss Mara 2019 1st Runner Up Miss Teresa Syuhlô alykheina Programme cha Puhpa BL. Syuhlô (Miss Teresa Paw) O, College Vaih liata ahmâpa a châ.
Chairman Puhpa AZ. Sa-u, President, MTP Branch: College Vaih chhihthana ry liata Programme ahmâpa châ ta, Rev. S. Beikhokhei ta Devotion hneipa ta Khazohpa lâ alynabie reina, Programme pavaosana nata thlahchhâna a hnei.
He alykheina liata MTP Gen. HQ tawhta Puhpa Zalena, President nata a hrialâpazy ahlao ei ta, biereina hnei awpa ta raopa a châna hawh ta Puhpa Zalena ta pasyupalina nata biereina chyupa a hnei.
He liata MSO General Headquarters: Siaha tawhta President Satlia CH. Beikhochhi nata a hrialâhpazy ahlao ei ta, President he ta biereina chyupa a hnei hra.
Mara Writers Club tawhta President Satlia FC. Chhuasa chhao a hlao thei ta, biereina chyupa nata pasyupalina bie pha kawpa reina a hnei hra; a hrialâhpazy thokhazy chhao ama vaw zi thei hra.
Chhôhkha lâ tawhta Puhpa S. Hiato (Miss Teresa Paw laipa) ta biereina chyupa nata alynabie reina a hnei.
Machâ A. Pawchi, ECM College Vaih Awnano Hyutuhpa nata Puhpa N. Chhylai zy chhao biereina chyupa ama hnei chyu hra.
He alykheina Programme liata College Vaih VC-I & VC-II zy tawhta ahlao thei ei ta, MCHP Branch: College Vaih tawhta chhao amâ hlao thei hra.
Pasyupalina bie areihpazy ama reipa tawhta apeimawh viapa thokhazy:-
- Miss Mara nata Contestant zydua, khih/vaih to liata eima ngâ kawpazy nama châ; Mara chanôzy amopâ tlâh châ awpa ta kyh toti liata asohsi awpa.
- Chanô nama châna hawh ta O pathai tiama awpa châ ta, O chhôh nama phi ti ta, â lâ theina ngâlâh dei phi leipa ta dyuchhai nata rakhô ry taihta pathai awpa.
- Mara chi nata reih palaiseihsa ta hmah pasiesana kyh liata Marasawzy miah pachutuhpa nata miah pahmôtuhpa châ awpa.
- Miss Mara apatlâhpazy he MTP luhpazy reingiahpa ta keih avaw chakâ papuapa sai ama châ; ama rei ngiana vâta byhnâ ato tlâh ama châ; reingiana kyh liata Mara Thyutliazy ta eimâ mopâ chyu awpa a châ.
- Miss Mara zy he cheihchalo ei si la, Programme thokha liata ti nata niebaw raihtuhpa châta eima hmâ tyhpa he bâsai si la, keimo Marasawzy pi ta eima cheihchalo leipa ta a châ khiah chi hropazy ta vaw cheihchalo aw vei ei; deichhyna kyh liata kho pahâhpa ta palôh hnei chyu ei suh u.
- Miss Mara zy ta pa-ôpazy nata niedo liata asohsipa ta atao chhao ama tao rairai awpa châ vei.
- Miss Mara zy ta apalai leipa ta areisi kawna chô ta, ama duty zy lia deikua zawpi pahnie kawpa ta nata noza pasôh leipa ta tao lymâ awpa.
Miss Teresa alykheina Programme chhâ tawhta zawpi avaw hlaopa zydua châta zâpati pachhuahpanohpa châ ta, alykheina châta zâpati he dôh chyupa a châ.
(Admin, MNN.)