SIAHA, 7 Di, 2019, Pachynoh (MNN) – Atanoh dawh 1:00 Pm liata Puhpa Bhupesh Chaudhary, IAS, DC Siaha ta Mararâh liata NGO laichaipa MTP, MSO nata MCHP General Headquarters Office Bearers zy DC Bungalow, New Siaha liata apakyhpa ta Thopi dokheina a hnei ei.
MTP Gen. HQ tawhta manôh 5 ahlao ei ta, MSO Gen. HQ tawhta manôh 4 nata MCHP Gen. HQ tawhta manôh 4 zy ta amâ hlao thei chyu hra.
Atliata liata MSO nata MTP Gen. Election hneipa châ ta, atlyna liata atloh thiehpazy alykheina châta Puhpa Bhupesh he ta alykheina châta Thopi do kheina he a pachhuah panohpa a châ.
Official lâ tawhta Puhpa Malsawmtluagna, Addl. DC, Puhpa Zonunmawia, Election Officer, Puhpa N. Vabeiratlua, Dist. I & PRO zy amâ hlao thei hra.
He Thopi do pahmaohna liata Siaha DC ta MTP & MSO Gen. HQ leader thiehpazy alykheina bie hlâ ei ta, Sawhkhâ nata NGO zy cha apha kawpa ta hriaparaoh lymâ awpa ta ahawna a tao.
Viarâh lâ cha MTP, MSO & MCHP zy hawh ta NGO padua awpa ha ama kho kawpa achâ tarawpa ta ama thei mâh lei zie reih ta, he hawh ta Siaha District liata NGO py rônahpa â vaw dua theipa he apha a tah zie reih ta, atliata liata MTP Gen. HQ Leaders atlyna, Kiasie liata hneipa chhao Democracy râh eima châna palâsa kaw ta, apathaih kawpa ta atlyna hnei theipa a châpazy cha rônah a tah zie reih ta, NGO deikua political platform taona awpa ta hmâ lei awpa ta ahawna tao ta, NGO cha mo pakha athôhna awpa ta paduapa châ leipa ta, râh zawpi nata eima chheipâh chiheihzy aboh nawpa nata mo hropazy châta hro apiena a châna hawh ta zôpha kawpa ta hria lymâ awpa ta khokheina a hlâ ei.
NGO Leader zy cha DC nata CEM(MADC) zy chhao rai ta ama biereipa nahthlie aw ei ta, chavâta pachâna pasohpa hmâpa ta Mararâh zawpi chata hmo phahnai awpazy patuapaluana chô ta bietluna dopa tao tyh awpa ta ahawna a tao hra.
MTP, MSO nata MCHP President zy tawhta aoh khopa nata peimawh ama tahpazy reina hnei chyu hra ei ta, hmialâ daihti liata NGO nata Sawhkhâ hriaparaoh lymâ awpa ama khonazy ama reih chyu hra.
DC he ta Thopi nata Ahmie pahâh kawpa avaw chhuanoh ta, aly kawpa ta niedo pahmaohna hnei khaipa a châ khô lâ ta nohthla lana hneikhei pâpa ama châ.
Pahno theina rakha liata Puhpa Bhupesh, Siaha DC ta NGO zy apakyhna he atahmâtahpa chhao ta ei 2 a hneikhei nawpa a châ.
(Admin, MNN via maraland.net)