SIAHA, 16 Di, 2019, Hriatuanoh – Atanoh dawh 1:00 Pm liata Puhpa N. Zakhai, CEM, MADC ta eima râh liata NGO lai chaipa MTP, MSO nata MCHP General Headquarters zy Thopi dokheina hneipa ta CEM’s Official Chamber liata apakyhna a hnei ei.
He apakyhna liata Puhpa H. Sahlo, Chairman, MADC, Puhpa K. Hrahmo, EM i/c Education etc., MADC zy ahlao thei hra ei ta, Official lâ tawhta Puhpa K. Chhihrau, Executive Secretary (i/c) nata Puhpa Beirôkhu Beitâ, I & PO zy amâ hlao thei hra.
MTP General Headquarers tawhta Puhpa PP. Zalena, President nata ahrilâhpa manôh 7 zy ahlao thei ei ta, MSO General Headquarters tawhta Satlia CH. Beikhochhi, President nata a hrialâhpa manôh 4 zy amâ hlao thei hra. MCHP General Headquarters tawhta Pihnô P. Chaki, President nata Pihnô B. Ngiaso, General Secretary zy amâ hlao thei hra.
He Thopi do pahmaohna liata Puhpa N. Zakhai chata biereina chyupa hnei ta, atliata liata MSO General Headquarters nata MTP General Headquarters atlypatloh thiehpazy alykheina bie hlâ ei ta, eima râh liata NGO lai chaipazy, â hawna nata a hruana pachâ peimawhpa ta atanoh liata ama daihti sôh kawpazy paruapa ta ano Office liata amâ vy thei vâta alynabie a hlâ ei.
Puhpa N. Zakhai chata reih pazao ta, Mara chi nata Pho abohna cha keimo Marasawzy liata apahnieh ta, a laiseih lymâ nawpa kyh liata chhao keimo Marasawzy lia pyly ta â pahnieh tahpa ta a reih; Mara chi nata pho, reih eihrâhpa ahneipa eima châna zawhzi ta District Council zy ahnei theipa châ pi ta, eima chi nata reih pabohsana kyh liata District Council liata râh chhihthatuhpa nata a sawhkhâ rai hriapazy ngâlâh dei châ leipa ta, a râh zawpi, Marasaw zydua ku liata â pahnieh tahpa ta reih ta, he kyh liata NGO zy he arâh zawpi ta hnabeiseihna eima hneipa nata MADC sawhkhâ chhao ta ngâna eima pahniehpa nata eimâ pahniehna lai kawpa a châ tahpa ta a reih.
Daihti avaw sie hapa liata NGO leader nahzy ta MADC nahta hriaparaohna pha ngaitapa ama vaw hnei lymâpa hawh ta atahmâ atlypatloh thiehpazy ta Term ama siekhei awpa liata chhao ti nata râh châta hriaparaoh lymâ awpa ta ahawna chhao a tao hra.
MADC nôpawpazy lâ tawhta Puhpa H. Sahlo, Chairman nata Puhpa K. Hrahmo zy chhao biereina chyupa hnei chyu hra ei ta, NGO lâ tawhta Puhpa PP. Zalena, Pihnô P. Chaki nata Satlia CH. Beikhochhi zy ta biereina chyupa hneipa ta eima râh châta vision ama hneipazy nata ama py chyu hmahlana nata hmialâ ama sie nawpa liata ama py chyu châta sadu thliena ama hneipazy reina ama hnei chyu hra.
Daihti pathaona lâ liata Puhpa H. Sahlo, Chairman ta thlahchhâna hnei ta, daihti chhâna lâ liata Puhpa K. Chhihrau, Executive Secretary (i/c) ta Abeipa lâ alynabie reina thlahchhâna a hnei hra.
Puhpa N. Zakhai ta, atanoh liata NGO leader zydua, Christmas nata Kôthiehpa alypa nata thapha kawpa ta hmâ chyu awpa ta khokheina sâh chaipa a hlâ ei.
(Apakyna daihti chhâ tawhta nohthlah lana hneipa châ ta, MSO Leader zy deikua Programme peimawhpa ama hneipa vâta nohthlah lana liata ahlao hmâ khao vei ei.)
(PRESS RELEASE No.48/2019)
Issued by:
Information & Publicity Office
Mara Autonomous District Council
Siaha