SIAHA, 21 Di, 2019, Pachynoh – Atazâ dawh 7:00 Pm liata MTP Branch: College Vaih Rendezvous (RV) cha Puhpa Pahmô Hlychho, Secretary i/c Finance & Accounts, MTP General Headquarters ta pahyna a hnei.
He RV pahyna he College Vaih MTP Information Center liata Programme ahmâpa châ ta, Puhpa FC. Beithasia, President, MTP Branch: College Vaih
ta chhihtha ta, Puhpa Laitha Chozah, ECM KTP Branch: College Vaih North ta Devotion a hnei.
Pahyna hnei khaipa a châ tawhta Puhpa Pahmô Hlychho biereina hnei pazao ta, ary liatahpazy he a biereipa thokhazy a châ:-
- MTP zy pi he Rairuna chatôhpa ta sie lymâ awpa eima châ; ngiaroh achhih kawpa a châ thei aw; Mara Thyutlia zy ta hnoh asy leipa ta eima chi pho châta tiama kawpa ta hria suh u.
- MTP he Phasa kawpa ta a sie thei vei; ngialy chahra kawpa ta sie lymâ abyuh tahpa pahno chyu si la, RV he vaihchhôh nata Siaha khih châta thlahlôna su a châ via lymâ thei nawpa tiama papua lymâ suh u.
- Eima vaih chhôh nata opa lyuhri bawlaw liata bao ngiahpa nata achâkhei angiahpa eima vaw pahno chho tyh lei thei; leader phapa ta la O chaki chapâ eima tlyh awpa he eima maohphaohna a châ.
- Thyutlia hro eima vei awpa apeimawh: kô tloh leipa kô 13-16 likawh taihta pari theipa liata aboh vei ei tahpa eima pahno chyu; Thyutlia eimâ boh vei khiah Awnanopa nata khitlâh aboh aw vei. Pari theipa iahzaipazy he kyhpachâna chô ta veiseih palôhâhna rai hria apeimawh kaw.
- College Vaih he Siaha Town Branch liata eimâ bôchhâ kawpa nama châ; Pari theipa adyuh lymâpa ta, branch hropazy amopâ tlâh châ awpa ta tiama nama papua via lymâ awpa ta ei châ haw ei.
- MTP Leader zy pi ta Awnanopa eimâ hla awpa châ leipa ta, asu nata adaihti pahnopa ta Activr raihrie achhuah chyu suh u.
- MTP Logo liata Pahmôpi mathlaw hawh ta thachhâ leipa ta azaw awpa eima châna liata sapa thatlôna ta la thachhâ theipa eima châ; Khazohpa thatlôna angâchhâna chô ta thachhâ leipa ta eimâ zaw thei aw tahpa pahnona chô ta MTP he ta Khazohpa liata eimâ pahnieh awpa a châ.
- College Vaih MTP he thatlô kawpa ta hmialâ nama sie lymâ thei nawpa nata RV he apha kawpa ta nama mohôh thei nawpa ta khokheina sâh chaipa ei cha hlâ ei.
Puhpa Pahmô ta biereina a hnei khai tawhta St. Beirokhu Beita, Secretary i/c Information & Publicity biereina chyupa hnei awpa ta hruapa châ ta, ano ta biereina a hnei khai tawhta Puhpa MH. Vanlalsawma, VCP, College Vaih-I nata Puhpa John VT. Hniehu, Adviser, MTP College Vaih zy ta biereina chyupa ama hnei chyu hra.
College Vaih MTP he Section sâ palih (4) y ta, cha zy cha – V. Hlychho Section, Hly-âh Section, Hlichhy Section, Laila Section zy châ ta, he Section zy he ta RV zydua chhao pahyna hnei khaipa a châ hra.
Daihti chhâna lâ liata Machâ Kichho Chozah (ECM College Vaih North) ta thlahchhâna hnei ta, he khai tawhta Pahyna Programme khawpa a châ.
Sd/- BeiRôkhu Beitâ
Secretary
i/c Information & Publicity
Mara Thyutlia Py
General Headquarters: Siaha