CHAKHEI, 5 Nawh, 2020, Pahânoh (MNN) – Târi noh 3 Nawh, 2020, Chutynoh liana kha ta Rev. Dr. Peter Beichatlai Beita (Rev. Dr. Peter/Chatlai) cha Chakhei khih liata Doctorate Degree a hmôpa alykheina hneipa a châ.
Alykheina he a Paw Machâ BH. Sibei ta ama pahrâna O, Chakhei Vaihpi liata pachhuahpanoh ta, Programme chyupa taopa a châ. He raohpa he ta Dr. Seri Lee Beita (W/o Rev. Dr. Chatlai) Doctorate Degree a hmôpa – Doctor in Ministry alykheina hnei pâpa a châ.
ECM Chakhei Vaihpi Chairman Elect Machâ K. Beirasiachai ta chhihtha ta, daihti thaona lâ liata Machâ TT. Sazi, Local Secretary ta thlahchhâna hnei ta, Rev. Jimmy F. Sachai, Chakhei biatuhpa ta Khazohpa bie tawhta pasyupalina biereina a hnei.
Daihti chhâna lâ liata Khazohpa lâ alynabie reina thlahchhâ paraohna hneipa châ ta, alykheina pati dôhna hneipa a châ hra.
He liata Chakhei Local Church ry liata Awnano Chhihthatuhpa zydua nata Fellowship Department liata President & Secretary zy hruapa châ ei ta, hmosai piepa chhao ama pie chyu hra.
He hleikhô ta Local Mission Board tawhta sôh lâta hmosai piepa ₹.3,000/- ama hlâ hra.
Chakhei liata ama châh chhôh ta Chakhei Vaihpi, Nazareth nata Chakheitlâh Local Church zy liata Bierei chakaona piepa châ ei ta, Nazareth nata Chakheitlâh Local Church Awnano nôpawpazy ta sa thisaih palopa ta zâpati dôhkheina ama hnei chyu hra.
Rev. Dr. Chatlai he khizaw lâ achuna liata M.A (Political Science) châ ta, Master of Divinity (California, USA) tawhta â chu patlôpa ta kô 2001 tawhta chakaona liata y a pathao. He a chakaona he Olivet Assembly of India liata full time worker a châ; he he World Olive Assembly, New York liata Headquarters ahneipa châ ta, khizaw râh hluhpi liata chakaona ahnei haipa châ ei ta, ano chakao viana he urban area a châ. Reverend châta ordained pa a châ khô lâta kô 2009 tawhna khata Olivet University, USA ry liata Zinzendorf School of Doctoral Studies tawhta Doctor of Ministry tao pathao ta, kô 2014 liata Degree he piepa a vaw châ.
A thesis cha, “A Biblico-Practical Approach to Urban Evangelism Applied Among Working Professionals in India” a châ.
A viasanô Dr. Seri he Khizaw thaina achuna lâ liata B.E. (Electronics) châ ta, Theology lâ ta a thaina cha M.Div a châ. Kô 2000 liata India liata Mission chakaona rai hria awpa ta South Korea tawhta Delhi liata a vaw tlô. Rev. Dr. Peter nahta ahnei ei ta, kô 20 daihmâ Mission chakaona rai a vaw hria tawhta kô 2018 liata Doctorate Degree – Doctor of Ministry he Olivet University tawhta a vaw hmô hra.
Eima râh lâ ama kaw tlô thei palâh lei vâta atahmâ liata Machâ BH. Sibei ta kô thiehpa 2020 â chhuahnoh vâta ama nôvah ta ama kaw tlôpa cha ryhpaohna chaleipa ta Alykheina he Rev. Dr. Chatlai liahri tlôna Chakhei khih liata taopa a châ.
Âmo he USA, Korea nata India liata Delhi nata Bangalore liazy chakao tyh ei ta, atahmâno Bangalore liata Mission chakaona rai hria awpa ta ama y haino châ ta, ama chakaona he Urban Area châ ta, Urban chyhsazy Krizyna lâ chhihtha awpa he a target pa ta thâtihpha achhopa ama châ. India lia ngâlâh châ leipa ta Khizaw su to râh to liata hruana ama to daihti liata thâtihpha achhopa ama châ.
(Admin, maraland.net)