Puhpa K. Hrahmô, EM ta Siaha lia Entrance Coaching Centre pahy

SIAHA, 21 Nawh, 2020, Hriaheinoh – Atanoh dawh 11:00 Am liata Maraland Entrance Coaching Centre (MECS) Ltd., New Colony, Siaha liatahpa cha Puhpa K. Hrahmô, EM (i/c Education etc.) ta Ribbon chakiepa ta a pahy.

He pahyna hnei awpa he ta Programme chyupa taopa châ ta, daihti thaona lâ liata chhituhpa Puhpa J. Beichhualai, President, MECS ta hrua-eihpa, avaw hlao theipazy hnoh ta alynabie reih ta, MECS paduana chôchâ nata a thâtih tlâhpipa reina a hnei.

Rev. B. Beilua, ECM New Colony Biatuhpa ta Devotion hnei ta, Biesozy 1:7 nata Rawma Mozy 5:3-4, Khazohpa bie tawhta pasyupalina bie pha kawpa reina a hnei. He khai tawhta Khichhai laipa Puhpa K. Hrahmô ta Ribbon chakiepa ta MECS Ltd. pahyna hnei ta, biereina chyupa a hnei pazao.

Puhpa K. Hrahmô biereipa thokhazy:-

  1. Atanoh liata noh nata daihti pha kawpa miah pietuhpa eima Khazohpa hnoh ta alynabi reih na ta, Marasawzy châta byhnâ avaw châ awpa Coaching Centre pahy thei awpa ta nâ khokhei tuhpa Puhpa J. Beichhualai, President nata a hrialâhpazy hnoh ta, palôhru hmeiseihpa ta alynabie ei reih.
  2. MADC Officials nâ vaw zi tuhpazy, MSO General Headquarters chhihthatuhpazy nata he pahyna Programme avaw hlaopa zydua, anaohna Samaw ei cha hlâ ei.
  3. Khizaw hmahsiena he, TV nata Internet liata eima hmôpa dei châ leipa ta keimo Marasawzy chhao ta eima mo tlai ta hmô bâ pi ta, atahmâ cha Internet siepahliepa ta Siaha tawh tlai ta hmo to rô he eima tao thei haw; he ngâlâh dei châ leipa ta atahmâ cha Technical Entrance Coaching Centre chhao Siaha liata pahypa a châ hleikhô ta MECS avaw y hapa zawhzi ta Siaha lia cheingei ta Entrance roh thei awpa a châpa he aly’pa a châ hmeiseih.
  4. MECS avaw y ha tawhta India râh liata achuna sâh viapazy apazao awpa ta Siaha liata Entrance roh thei awpa a châpa he, eima District châ nata Marasaw châta hmahsiena a châ tah lei thei’pa châ vei; achuhaipazy ta hmâ phahnai achhuah chyu awpa ta eimâ khokhei hmeiseih.
  5. Marasawzy pi he Siaha lia dei ngâlâh châ leipa ta India râh khihpi lai viapazy liata achu theipa eima vaw hluh kaw bâ, he he Khazoh ngiachhiena vâ dei a châ; anodeikua Bachelor/Master Degree apatlô thlâhthlipa, rai hmô thei lei awpa nata hmâh tlâh châ leipa ta apuapa eima y tlamaw thei; achu daihti liata tiama papua awpa he apeimawh kawpa a châ.
  6. Marapa chi nata pho aboh nawpa Achuna (Education) he eima peimawh chaipa a châ; he he Chi hro Pho hropazy eima pahnie theina nata eima chi nata pho eimâ bohna awpa thokhy peimawh kawpa a châ; achuhaipazy ta tiama eima papua via rili awpa apeimawh kaw.
  7. Primary/Middle/High School lia zy ta eimâ chu daihti liata nohto daihti eima hmâna zie rei ta hmialâ daihti eima hro/achuna a kaw chhopasia kaw aw; chavâta Pyhrawhna ry lâta achu haipazy ta tiama nama papua via awpa ta ei châ haw ei.
  8. Aizawl liata Technical Entrance Exam awpa Marasaw thokha avaw pakyh ei na ta, ama rairu chaina eina chhopa ei cha Middle nata High School liata aphathipa ta châ amâ vaw chu leipa kyh a châ; kha daihti liata apha kawpa ta avaw chu ei sala cha atahmâ College kia daihti liata thata abao awpa ei a châ tahpa ama reih. Chavâta siku hawtizy ta achuna kyh liata tiama papua byuh ta, Nô nata Paw zy chhao ta eima sawnah châ achuna kyh liata tôhpi eima phiakhei via awpa apeimawh hmeiseih.
  9. Atanoh Coaching Center eima pahypa he, ahneituhpa nata ahriatuhpazy châta athôhna a y lei ngyu thei; anodeikua la eima chi nata râh châta byhnâ avaw châ awpa a châ vâta ahriatuhpazy ta tiama papua lymâ awpa ta ei haw ei.
  10. He MECS he ta Mathematics nata Science nama pachâ peimawh tahpa vaw pahno na ta, aly’pa a châ hmeiseih. SSA nata RMSA pakaohpa Samagra chhao ta Mathematics nata Science Subject he pachâ peimawh kaw ta, he subject alapazy deichhyna lymâ awpa he â chhuah hrapa a châ. Chavâta Marasawzy ta Mathematics nata Science Subject la hluh via lymâ awpa ta eimâ pasyu.
  11. MBBS, Engineering etc. achu awpa ta amâ ru kaw ta, anodeikua athai patluapazy châta cha amâ nao kawpa ta Admission â tao thei lymâ; ei sawchanônô châta Delhi liata MBBS Admission eima la no ta Rs.550/- ngâlâh Admission mâ liata eima pie – ano he State Quota to thei awpa ta State Entrance Exam liata a tloh vâta, he hawh ta amâ nao kawpa ta Admission eima la theipa a châ.
  12. Puhpa Laima Chozah, IAS cha Chakhei khih puapa châ ta, ano chhao keimozy hawh ta châ thai thei kawpa a châ lei zie reih tyh ta, a hlaotloh chhâna deikua TIAMANA vâ dei a châ tahpa ta a reih. Chavâta achuhaipazy ta eimâ chuhaipa Course thai lymâ achhuahpa ta, tiama eima papua khiah hlaotlohna a y tahpa eima pahno chyu awpa ta eimâ pasyu.

MECS, Siaha he Centre sawhkhâ nata State sawhkhâ ta a pahnokheipa châ ta, Technical Entrance arohkhohpazy châta cha Aizawl, Guwahati nata Delhi pangai byuh khao leipa ta he MECS, New Colony, Siaha liana he ta Coaching akiah thei ta, Entrance chhhao â roh thei. Eima District châta byhnâ avaw tlôkheituhpa a châ nahta hnabeiseihpa a châ.

Puhpa Herbertson Syuhlô, AEO, Puhpa Beirôkhu Beitâ, I & PO nata Puhpa T. Pabua zy ta Puhpa K. Hrahmô he ama zi hra.

(PRESS RELEASE No.4/2020)

Issued by:
Information & Publicity Office
Mara Autonomous District Council
Siaha.

Leave a Reply

Your email address will not be published. Required fields are marked *