SIAHA, 30 Nawh, 2020, Pobienoh (MNN) – Atanoh zâlâ dawh 3:00 Pm liata Siaha District vyuhpa ta Miss Mizoram 2020 apatlâh awpa Siaha Meisavaih laihsa “Jecelyn Lynanokhai”(D/o S. Chhuachhua ‘L’) cha MJA Press Club, Siaha liata phuahna hneipa a châ.
He phuahna châta Programme chyupa taopa châ ta, Puhpa V. Pawhla, President, MJA, Siaha ta Jecelyn cha Miss Mizoram contestant châta atly papuapa a châna thâtih reina hnei ta, Puhpa H. Zonunmawia, Election Officer ta Siaha District vyuhpa Miss Mizoram contestant phuahna hnei ta, Sash nata Tiara hlâna chhao a hnei pâ hra.
Jecelyn he târi 26.9.1994 noh ta Siaha District Hospital liata vaw pih ta, pilâh palalih hneipa ta saw uhthei chaipa apazipa a châ.
Kô 2016 liata Siaha Gov’t College tawhta apha kawpa ta BA vaw patlô ta, kô 2019 liata MADC ry liata Teacher rai aroh patloh ta, atahmâ he New Laty liata a hria ngâhaipa a châ.
Atakô Miss Mizoram Beauty Pageant he ZONET nata MJA (Mizoram Journalist Association) apakaohpa ta ama pachhuah awpa a châ.
Laihsa Jecelyn, hmialâ a asie lymâ nawpa liata khokheina sâh chaipa eima hlâ.
(Admin, MNN. Source: Vala Phuto.)