16th Mizoram Inter-District Volleyball Championship 2020 lia PP. Zalena hmâkhei

SIAHA, 31 Nawh, 2020, Chutynoh – Atanoh dawh 11:30 Pm liata New Siaha East-II Tlyliah liata 16th Mizoram Inter-District Volleyball Championship 2020 Closing Function ahmâpa cha ta, he liata Puhpa PP. Zalena, President, MTP General Headquarters cha khichhai laipa châpa ta Programme a hmâkhei ei.

Puhpa PP. Zalena ta biereina chyupa hnei ta, MTP General Headquarters: Siaha vyuhpa ta zawpi avypakhypazy nata Mizoram Volleyball Association(Aizawl) nata Siaha DVA nôpawpazy hnoh ta zana nata anaohna Samaw a hlâ.

Siaha DVA ta he hawhpa Mizoram State pôpalôhpa Tournament a pachhuahpanoh theipa he arônah a tah zie reih ta, Siaha DVA nôpawpazy hnoh ta alynabie a reih. He tho ta baona châta ₹.11,000/- hlâna a hnei pâ hra.

Puhpa Zalena chata reih ta, Volleyball hmâpa he ta eima thyutliapazy ta eima vaih/khih nata District hmah ama pasiesa via lymâ awpa hnabeiseihna hnei ta, pari theipa sei liata atâh haipazy thao papuana chhaichhi pha kawpa a châpa vâta Thyutliapazy ta Volleyball akhaih he pasôna châh ama pahno via thei nawpa ta Siaha DVA leader zy hmah la via lymâ awpa ta ahawna a tao hra.

Sports he phahnaih ngiah kawpa ta tao byuhpa châ ta, Olympic Motto “chatlie chai, asâh chai, arâ chatlie chai“ he atanoh liata player zydua chhao ta pahnopa ta final akhaihpazy ta chatlie chai, asâh chai, arâ chatlie chai achhuah chyu awpa ta khokheina sâhchaipa ei cha hlâ ei.

Siaha DVA ta phahnai ngiah kawpa ta khichhai avaw buakhei tuhpa Siaha Town MTP Branch zydua chô liata amâ lyna pamosa châta Puhpa PP. Zalena hnoh ta hmosai piepa ama hlâ hra.

Puhpa Zalena he MTP General Headquarters liata a hrialâhpa Puhpa C. Mochônô, Asst. Gen. Secretary, Puhpa J. Ngôchyu, Secy. i/c Art & Cultute, Puhpa C. Reuben, Secy. i/c Games & Sport nata St. BeiRôkhu Beitâ, Secy. i/c Information & Publicity zy ta ama kaa zi hra.

Atakô Inter-District Volleyball Championship he Siaha District Volleyball Association (DVA) ta patlô ta, akhaihna su châta New Siaha East-II Playground hmâpa a châ. Khichhai deikua Siaha Town chhôh liata MTP Branch zy ku liata sopa châ ta, vaih to liata tlôna raipa ama châ.

Chanô liata Aizawl DVA nata Kolasib DVA zy ta Final akhaih ei ta, Aizawl DVA champion ama châ.

Chapaw lâ liata Saitual DVA nata Chanphai DVA zy ta Final akhaih ei ta, Saitual ama champion.

Sd/- Secretary
i/c Information & Publicity
Mara Thyutlia Py
General Headquarters
Siaha.

Leave a Reply

Your email address will not be published. Required fields are marked *