SIAHA, 12 Pamih, 2020, Pobienoh – Atanoh kha Marasawzy ta cha-ypi rônah chaipa eima hneipa tah thei awpa “Lyuva Khutla” Programme cha Siaha liata Siaha Tlytliah liata nata Tipâ lâ liata ahmâ tyhpa cha atakô châta Typical Village (Chemo Lâmahthu), Zyhno liata apalâ kawpa ta ahmâ raihriepa a châ.
Lyuva Khutla 2020 Programme he Siaha liata Puhpa P. Sama, Executive Secretary, MADC ta chhihtha ta, Rev. Dr. FC. Beicho, Moderator, ECM ta Devotion hnei ta, azipa châta Dr. K. Robin, Professor, MZU, Aizawl hmâpa a châ.
Zyhno liata Puhpa K. Lalnuntluanga, President, MTP Sub-HQ: Tipa ta chhihtha ta, Rev. Beipisa Miehlo, ECM Zyhno biatuhpa ta Devotion hnei ta, azipa châta Puhpa F. Lawmkima, EM i/c E & F, MADC hmâpa châ ta, Ku Nôpaw châta Puhpa L. Prisila, EM i/c Soil etc. MADC, hruapa a châ hra.
He noh he Programme chhaih no (2) lâta ahmâ raihriepa châ ta, Programme hmiatuapa liata Azipa Reception ta ahmâpa châ ta, chhaih 2-na liata Entertaiment Programme ta siekheipa a châ.
Siaha liata pahyna hla sa awpa raopa Mara Hlasa Py(MHP) General Headquarters Hlapy ta pahnie kawpa ta sa ei ta, Zyhno lâ liata Joint MTP Branches: Tipa Town zy ta pahyna hla ama sa hra.
Zyhno lâ liata hlasa thaipa laihsa Jessica B. Khuhly nata Pihnô Vasty Azyu hruapa châ ei ta, Tipâ khih puapa, Shillong liata pahrâpa Pihnô S. Ngodei chhao hruapa a châna hawhta â hlao thei hra.
Siaha liata ahmâna liata Mara Artiste, amâ thei awpa ta moh apangiapa zydua hruapa ama châna hawh ta ahlao thei khai ei ta, he hleikhô ta David Lai, Eain Met Sone Ya Winner (Myanmar râh pôpalôh hlasa atao pasuana-Idol hawhpa) chhao hruapa a châna hawh ta, Yangon, Myanmar tawh ta za siepa ta a zâ hlao thei hra.
Siaha liata MADC liata nôpaw chaipa Puhpa N. Zakhai, CEM nata Puhpa H. Sahlô, Chairman zy ahlao thei ei ta, chahleikhô ta MADC ry liata Executive Members, MDC nôpaw hropazy nata MADC ry liata Officer & staff zy nata Mizoram sawhkhâ ry liata DC hleikhô ta Officer & staff hluhpi chhao amâ hlao hrapa ta pahnopa a châ.
He cha-ypi rônahpa ahmâna noh liata, kô hro lâ ta tao tyhpa hawh ta Mara Culture Item chi nano nanopazy pamosana hnei heihpa châ ta, Costume Parade chhao taopa a châ hra; Siaha Town chhôh liata MTP nata MCHP Branch zy, tovyuh piepa chyu pabie thei khai ei ta, Solo, Hlapy, Culture items nano nanopa ataotuhpa nata tovyuh hropa zydua, apha kawpa ta avaw taotuhpa zydua chô liata Lyuva Khutla Organising Committee zy ta alynabie ama reih.
Puhpa Munish Singh, Regional Director, M.E.A, Gov’t of India, Shillong chhao, hruapa a châna hawhta atakô Lyuva Khutla, Siaha liata akaw hlao thei hra ta, biereina chyupa chhao piepa a châ hra.
Siaha liata azipa Dr. K. Robin chata biereina chyupa hnei ta, atakô Lyuva Khutla, Siaha liata ahmâna liata tovyuh pha kawpa a hnei thei vâta, khokheina apatosa tuhpa Lyuva Khutla Organising Committee lâta alynabie a reih.
Dr. Robin chata reih ta, “Marasawzy pi he eimâ tobina ngâlâh he ta Marapa eima châna (identity) ngiana châta adaih khao leipa ta, chi hro phohropazy ta eimâ tobina he amâ tao hôlô hra; chavâta eimâ tobina he “Mara atobina tlaina a châ” tahpa ta sawhkhâ liata registration asiahlia kawpa eima hnei awpa apeimawh tah ta, ti nata râh mahsiena châta thata hmah la pi ta, lâthlôh phapa, O nata lyu phapa nata motor phapa zy hnei awpa teipa ta eima daihti thata eima hmâpa alyu; chahawhta ti nata râh hmahsiena eima buakhei kaw no ta eima chipho chhao he buakhei awpa peimawh ta, chi hro pho hropazy ta maniah ama disao lei nawpa ta India sawhkhâ ta 6th Scheduled to the Constitution of India liata dâh sianô kawpa maniah taopa ta, chipho chynawh viapazy he maniah pabohsa â chhuahpa a châ; chavâta eima chi nata pho âboh lymâ thei nawpa ta Marasaw – mo pakha chyu liata âpahnieh tahpa my leipa ta Mara chi nata pho he eima pabohsa lymâ awpa a châ.” tahpa ta Lyuva Khutla 2020 he aly kawpa ta ahmâ chyu awpa ta zawpi zy khokheina a hlâ.
Kô hro lâ liata tao tyhpa hawh ta atakô chhao Chhivaw & Khydi nata Salia beipa & Salia beinô atlyna hneipa châ ta, ary liata palâsapazy he atlypatlohpazy ama châ:-
CHHIVAW:
Christina H. Ngoreizi
D/o Puhpa H. Vabeitha
Siaha Vaihpi
KHYDI:
Alray Hlychho
S/o Puhpa Aldrin Hlychho (L)
New Colony, Siaha
SALIA BEINÔ:-
Jocelyn
D/o Elvin B. Chozah
Siaha Vaihpi
SALIA BEIPA:
Frey Vabeiryupatha
S/o Vapawrili
New Colony, Siaha
Atakô Lyuva Khutla 2020 he Local TV liata Live ta pie papuapa châ ta, Internet siepahliepa ta Live ta pie papuapa a châhra.
(PRESS RELEASE No.13/2020)
Issued by:-
Information & Publicity Office
Mara Autonomous District Council
Siaha.