SIAHA, 19th March, 2020 – Siaha District liata Airtel & BSNL signal chhiepa avaw zie y via thei nawpa ta, MSO Gen. HQ : Siaha ta Siaha liata Airtel & BSNL mohôtuhpa zy ama kaw dao. BSNL Office liata SDE charge la tuhpa hnota eima rairuna aty ngâpazy tlôkheipa châ ta, SDE heta Bandwidth tha patlô awpa ta hmala ngâpa a châzie avaw chho ei. Airtel Office liata eima hmôkhopa chysa a y leipa vâta Siaha Incharge Pihnô Chhantei cha phone tawta bie achho pata Siaha liata Airtel Tower he sâ 3 bô ngâhpa châ ta(New Colony, New Siaha nata Siahatlah) a chatlie viapa ta hma ama la thei nawpa ta MSO Gen. HQ ta pressure eima pie awpa a peimaw zie a reih hra. BSNL nata Airtel zy hmalana he abyuna nata angiana hawta MSO Gen. HQ:Siaha ta a mokhei lymâ aw.
Atano pyly heta Don Bosco Student nôpaw zy ta Admission Fee mâ chôchâ liata MSO Gen HQ Siaha hnota complain ama vaw pangiapa hawta MADC Education Department hnota hmo yzie eima laichadai khai tawta DBS Principal cha a Office liata ahmôpa châ ta, 2020 Academic KG Student zy admission fee amâ ru na chhâpa cha admission fee hleikhô ta terminal exam fee,celebration fee nata sport fee zy pahly pakhy khaipa a châ vàta admission fee amount apôh viapa a châna zie a rei taraw ta, MSO Gen. HQ ta nô nata paw hlupi zy pachâ na chôta admission fee nata fee hropazy(terminal exam ,sport nata celebration fee) pachhaih awpa ta ahawna tao ta, KG Student zy châta admission fee he Rs 2800 châ khao leipa ta, Rs 1500 ta âla thei bâ aw tahpa zawpi zy eima pahnosa. He hlâ heta Transfer Certificate liata Rs. 200 ama la tyhpa chhao MSO Gen. HQ ahawna hawta Rs. 50 ta la bâ awpa ta Principal heta avaw parysa ha hra.
Siaha District chhô liata School hneituhpa zy sôdaohna palôru ngâlâ phao leipa ta, nô nata paw rairuna zy pahnokhei awpa ta MSO Gen. HQ ta ahaw pita, MADC ta apasaina nahta Zawpi zy châta phaohri a tlôkhei theipa hmo ataopa School zy cha MSO Gen. HQ ta ama chô liata abyuna hawta hma ala lymâ aw.
Atanohta hmalana liah heta S. Beikhochhua, Secy i/c Social Welfare nata N. Ferdinand, Secy i/c Education , H. Sahlo nata L. Johnson Executive Member MSO Gen. HQ:Siaha zy ama pua.
(Source: MSO Vyphao Info.)