SIAHA, 21 Pamih, 2020, Pachynoh – Eima pahno chyupa hawh ta atahmâhlâ pasana hri Corona Virus Disease (COVID-19), novel virus chichhih kawpa he, Khazohpa ngiachhiena vâta eima râh liata avaw ngia mâh vei hra sala nata akia/avei hapa pahnopa châ mâh vei hra sala, atanoh taihta a patlâhna thona hmô papua hmeiseihpa a y mâh lei vâta eima theina rakha hawh ta eimâ vaw vai awpa apeimawh hmeiseih.
Chavâta sawhkhâ tawhta nata thohna lâta athaipazy ta avaina awpa châta maniah ama chho hapa zydua cha atheituhpa nata apahnotuhpa eima châpa he adaih leipa ta, eimâ boh nawpa ta eima zyh cheingei awpa a châ.
Mara Thyutlia Py (MTP) General Headquarters cha District Task Force on COVID-19 outbreak liata member a châna hawhta nata Mararâh liata NGO lai chaipa eima châna hawh ta COVID-19 avaina chôchâh pachia awpa ta District Level nano nanopa Meeting liata ahlao lymâ pi ta; chahleikhô ta sawhkhâ tawhta Order/Notification/Circular etc. apuapa tawhta eima theipa nata eima pahnopazy khaih-na tawhta ary liata eima vaw palâsapazy he MTP Sub-Headquarters, MTP Branch leader zy nata MTP member zydua ta eima pahno awpa nata eima zyh chyu awpa ta ahawpa nata pahnosapa eima châ:-
- Eima MTP Branch ôna chyu liata sawhkhâ tawhta tao awpa nata tao lei awpa pahnosana eima daopazy nata tlâh-awna tawhta eima theipazy cha zyh chyu awpa.
- Hmo peimawh kawpa, leithei leipa tah dei leipa ta cha ahy hmah ta sawhkhâ Office adaoh lei awpa.
- Bie heihpa a y hlâ via cha CEM, MADC adaoh thei khao mâh vei.
- Maluh pa 10 hlâtu hluh viapa ta apôpakhy lei awpa.
- Hri ama kiapa/veipa Râh/State (effected Country/State) tawhta avaw tlôpa zy cha ama O lâ padisa leipa ta Quarantine taopa su liata noh 14 chhôh pa-ysa awpa a châ. Mohôh byuhpazy cha Dr. C. Hnichho, CMO – 9436149663/8730976477, Dr. C. Lalrosanga, DMS – 9436151752/7085629978, Dr. K. Rakhu, DSO – 8424957605/9436149303 liata thlai pahnosa awpa a châ.
- Hri ama kiapa/veipa Râh/State tawhta avaw tlôpa zy kiana motor liata akiahpazy cha, hri ama kia tlamaw theipa vâta avai nawpa ta Quarantine su liata soh pyly awpa ama châ.
- Hri ama kiapa/veipa Râh/State (effected Country/State) tawhta avypa eima pahnopazy cha ama kiapa motor liata kiah lei awpa.
- Sumo/Bus nata Public Transport service zy ta, passenger zy apha kawpa ta Self Report Form taopa ta ama passenger zy detail ama roh chyu awpa châ ta, Covid-19 hri ama kiapa/veipa Râh/State (Effected Country/State) tawhta avypazy nata Mizoram State chhôh liata a ypazy cha motor sâ 1 liata ama pakiasa awpa châ vei.
- Eima chhôhkha/sanawh zy, phai lâ tawhta akaw tlôpazy cha ku patupa ta anaoh(chibai) tlâ lei awpa châ ta, feet 5 chhâ ahlapa ta bie achho awpa a châ. Ama hmo(bag/suitcase etc.) zy cha ahy hmah ta hria leipa ta dawh 12 chhôh chhâ so panano awpa a châ.
- Phai lâ tawhta Mararâh akaw ngiana Tipi Ferry, Kaochao East nata Siahatlâh zy liata MTP Branch zy cha Sawhkhâ lâ tawhta rao eihpazy nahta apha kawpa ta ahrialâh awpa ta ahaw pi ta, molai/mochyh, ahy hmahta pathluana hneileipa ta sawhkhâ ta tao awpa a tahpazy cha apha kawpa ta tao lymâ awpa ta eimâ haw.
- Sawhkhâ lâ tawhta COVID-19 avaina châta sôh maniah ama pie tlâ lei vâta eimâ ryhpaohna dâh hawh chyu ta eima ti nata râh, eima khih nata vaih châta tha nata zâh, hneina sôh chhao ta apasai kawpa ta hria chyu awpa ta eimâ haw.
- Hri pha leipa eima kia pathlei lei nawpa ta Motor akiahpazy check awpa kyh liata check awpa ta rao-eihpazy deileipa ta cha passenger zy ahnia chakhyh lei awpa a châ aw; a check tuh awpazy cha sawhkhâ lâ tawhta chhaichhi hmâ awpa a tahpazy (Facemask, Glove etc.) hmâ cheingei awpa a châ.
MTP zy pi he arâh leilô hnei tuhpa nata thapasana ahnei tuh chaipa eima châna hawh ta Mararâh châta phahnai ngiah kawpa ta hria chyupa awpa ta ahaw pi ta, COVID-19 pasana hri tawhta eimâ boh thei nawpa ta eima chiheihzy châta tiama papua chyu awpa ta eimâ haw chanei.
Mararâh zawpi chhao ta, COVID-19 avaina chôchâh liata arâh pôpalôhpa nata eima Branch chyu liata MTP hmahlana zydua kyh liata miah nama deichhy lymâ awpa ta eimâ haw.
A eihpachaipa ta Phai lâ tawhta akaw tlôpa eima chhôhkha/sawnawh zy, anoh-eih ta noh 14 chhôh mohôh nawpa kyh liata ahy hmahta pa-ei pachhiana hnei leipa ta miah hrialâh awpa ta eimâ haw chanei hmeiseih hra.
Eima sawnawh zy, noh 14 chhôh so pananopa ama vaw y hapa chhao ta eima râh nôpawpa (MDC/MLA/MP) zy pahnosapa ta papua patoh awpa ta ahawna zy tao tlâ lei awpa a châ aw; he he eima chhôhkha chyu pha nawpa châta taopa a châ.
“Avaina he thohna pha chaipa a châ.”
Sd/- BeiRôkhu Beitâ
i/c Secretary Information & Publicity
Mara Thyutlia Py
General Headquarters: Siaha.