SIAHA, 6 Pachawh, 2020 – Atanoh dawh 11:30 Am liata Puhpa N. Zakhai, CEM, MADC ta Covid-19 adyuhna liata hmia asah lymâpa nata eima râh liata NGO laichaipa MTP General (Gen.) Headquarters (HQ) & MSO Gen. HQ zy hnoh ta baona sôh phusâ, he hawh ta a pie ei.
- MTP Gen. HQ = ₹.3.00 Lakhs
- MSO Gen. HQ = ₹.1.00 Lakh
He baona sôh he MTP & MSO General Headquarters nôpawpazy hnoh ta ama Headquarters Office chyu liata hlâpa châ ei ta, MTP tawhta Puhpa PP. Zalena, President, MTP General Headquarters ta ahlâh ta, MSO tawhta Puhpa CH. Beikhochhi, President, MSO General Headquarters ta â hlâh hra.
MTP & MSO General Headquarters zy ta eima râh nôpawpa Puhpa N. Zakhai nata a hrialâhpazy hnoh ta alynabie reih ei ta, he hawh ta Marasaw zy ta Covid-19 pasana hri tawhta eimâ vaw boh thei nawpa ta edyuhna kyh liata hmia asapazy athei ei ta, reikah dei châ leipa ta sôhthih chhao ta ku tha patlôna rai ama hria vâta alynabie ama reih.
Puhp N. Zakhai ta baona sôh a piena liata biereina chyupa a hneipa tawhta lapakhypa a bierei tlâhpi viapazy:-
- Mararâh khito zydua liata sie laih ta Task Force zy, MTP nata MSO zy hnoh ta pasyupalina nata charoh tha patlô laihpa ta deichaka/tha patlôna bie rei laih awpa eima khoh kaw tarawpa ta, sawhkhâ bie hawh ta pua chakhyh thai’pa a châ lei vâta phone hmâpa ta nata O tawhta eima theina chyu hawhta eima hriapa a châ.
- Pari theipa adyuhna kyh liata MTP nata MSO zy nama chakaona arônah hmeiseih. Atahmâ lia chhao hmia asah ei chi ta, nâmo zawhzi ta eima thlalôh ta, eimâ ly hmeiseih.
- Ei hrialâhpa nâ vaw zi khohpa hluhpi ama y tarawpa ta Lockdown vâta hluhpi pua apha hlei vâta Puhpa K. Chhuabei, EM i/c PWD, I & P ta nata Official lâ tawhta Puhpa Beirôkhu Beitâ, I & PO ta eina vaw zi ei, ama hnoh ta alynabie ei reih.
- Covid-19 adyuhna kyh liata Magistrate hleikhô ta Force hmâ abyuhpa kyh liata MADC ta biehneina eima hnei lei vâta State sawhkhâ siepahliepa ta Central sawhkhâ hmahlana he eima support lymâ awpa apeimawh ngaita.
- He kyh liata keima nata ei hrialâhpazy ta khâpa ma eima tao thei hra aw tahpa ta vaw rei pahmaoh laih pi ta, eima MDC bia chyu liata bia lai viapa nata bia chyh viapa liata ₹. 80,000 & ₹.1.00 Lakh chyu rai papuapa ta niebaw liata rairuna atyhpazy pachhana awpa ta MDC zy ta VLTF zy siepahliepa ta atahmâ he eima raih papua ngâ haipa a châ. He hleikhô ta CEM’s Relief Fund liata sôh angiapazy tawhta nata Council hawhta abyuhna nata ângiahna lia maih ta eima theina rakha hawh ta mo pazina rai hria lymâ eimâ chhuah.
- Chi hropa, Covid-19 hri akia awpa pangiasapazy, eima râh liata amâ vaw ngia lei nawpa ta vaina kyh liata tiama nama papua via lymâ awpa ta ei châ haw ei.
- Marasaw zydua ta Covid-19 adyuhna kyh liata khôtho pua leipa ta O chhôh liata eimâ khôhpa he eima râh châta eima tao theipa a châ tahpa pahno chyu awpa ta MTP/MSO zy ta nama chho pachhuah awpa ei kho kaw.
- He hri chi chhihpa tawhta eimâ vaw boh chyu thei nawpa ta avaina kyh liata sawhkhâ tawhta bie puapazy zyh chyu si la, VLTF, Flying Squad nata duty pa zydua bie zyh chyu awpa ta Mara zawpi ei haw hmeiseih hra.
Puhpa K. Chhuabei, EM i/c PWD etc. chhao pasyupalina bie reina hnei awpa ta hruapa a châna hawh ta biereina chyupa hnei hra ta, MTP nata MSO zy kao nano nanopa liata Marasaw châta ama hriapasanazy reih ta, alynabie chhao a reih. Covid-19 adyuhna kyh liata Sawhkhâ vyuhpa ta zawpi châta keih ama chakânazy reih ta, Mararah zawpizy chhao ta duty rai hriapazy rei angiapa ta MTP & MSO he deichhy lymâ awpa ta ahawna tao ta, rei eimâ ngia khiah Khazohpa ta Covid-19 tawhta miah a pabohsa aw tahpa hnabeiseihna a hneipa a reih hra.
(PRESS RELEASE No. 21/2020)
Issued by:-
Information & Publicity Office
Mara Autonomous District Council
Siaha