MTP Gen. HQ ta Mararâh râhri liata VLTF zy tly

SIAHA, 23 Pachawh, 2020 – Mara Thyutlia Py (MTP) General (Gen.) Headquarters (HQ) ta nôh 3 nata zâ 2 chhôh Tour Programme taopa ta Mararâh râhri liata Village Level Task Force (VLFT) zy tlyna hneipa a châ.

Târi 21-4-2020, Hriaheinoh kha ta Siaha tawhta siepapuapa châ ta, târi 23-4-2020 pa ta Siaha angia heihpa a châ; ary liata khih palâsapazy liata VLTF zy tlypa a châ:-

  1. Noh-aotlâh
  2. Lôbô
  3. Iana
  4. Chapi
  5. Zyhno
  6. Khôpai
  7. Laki
  8. Khaikhy
  9. Lômasu
  10. Lôdaw
  11. Kaochao East

He khih zy liata VLTF zy hnoh ta MTP Gen. HQ moh ta Rs.10,000/- chyu piepa a châ hra.

Siasi VLTF deikua, tly awpa liata pahlaopa a châ tarawpa ta vâsuapa vâta lâthlôh siena liata rairuna a ypa vâta tly hmâ khao leipa châ ta, Siasi VLTF zy châta Rs.10,000/- pie awpa deikua MTP Sub-HQ: Chakhei nôpawpazy ku liata sopa châ ta, âmo ta daihti ryhpaoh tua chaipa liata ama pie pachhuah aw.

He Tour Programme taona chhâpa tlâhpipazy:-

  1. Covid-19 adyuh nawpa ta veiseihpazy MTP Gen. HQ liata sôh ama vaw piepazy, râhri liata riethei kawpa ta duty tyhpa eima VLTF nahzy hnoh ta baona sôh hlâ awpa.
  2. Rairunazy pahnokhei awpa nata raihriapazy report, ama khih chyu liata nahthlie awpa.
  3. VC, MTP nata khihsaw vâtlâh ta Covid-19 adyuhna kyh liata lôraoh kawpa ta hria pazao lymâ awpa ta apasyuna nata charoh adeichaka raihrie awpa.

MTP Gen. HQ tawhta asie theipazy:-

  1. S. Vabeihasa
    Vice President
  2. Beirôkhu Beitâ
    Secy. i/c Info. & Pub.
  3. J. Ngôchyu
    Secy. i/c Art & Culture
  4. Reuben Hlychho
    Secy. i/c Games & Sports
  5. S. Chabei
    Executive Member
  6. John K. Rema
    Executive Member

He khih tlypazy liata VLTF zy ta MTP HQ nôpawpazy cha vaw pachâ peimawh kaw ei ta, amâ pahana lia maih ta Thopi/Juice nata ahmie pahâh kawpa avaw chhuanohpa lymâ ei ta, IANA, CHAPI, LAKI VLTF zy ta nodi dâhphipa ta ama y lei nawpa ta niedo amâ vaw chhuahnohpa.

He hleikhô ta MTP Sub-HQ: Chakhei zy ta Thopi & Ahmie pahâh kawpa ama vaw chhuanohpa hra.

Puhpa K. Thaichhua, President, MTP Branch: Laki nata a hrialâpazy ta Laki tawhta Khaikhy taihta zi hra ei ta, Phura tawhta Lômasu & Lôdaw taihta Puhpa C. Beirachhuady, President, MTP Sub-HQ: Phura nata a hrialâhpazy ta ama zi hra.

MTP Gen. HQ nôpawpazy he ta khih ama chapiana liata VLTF duty zy hnoh ta amâ ryhpaohna hawh ta phusâ lâta baona ama pie laih hra.

Kaochao East pahlao leipa ta he Mararâh râhri khi 11 pa zy liata Pheisaih duty so awpa ta târi 15-4-2020 pa ta Siaha DC ta Lolei CO 1st Assam Rifles hnoh ta ahawna atao tarawpa ta Noh-aotlâh, Iana, Zyhno, Khopai, Laki, Khaikhy, Lômasu, Lôdaw lia zy, he eima tly daihti liata Pheisaih so tlâ leipa châ ta, Lôbô nata Khaikhy zy lia deikua Patrol ta ama vaw sie tyhpa ta pahnopa a châ.

He khitlyna liata VLTF zy nahta dawh 1 – 2 chhôh tlai apakyhna pha kawpa hnei lymâpa châ ta, MTP Gen. HQ lâ tawhta hmahlana tlâhpipa report pie laihpa châta, VLTF lâ tawh chhao ta ama hmahlana tlâhpi viapazy report nahthlie laihpa a cha hra.

Atahmâno ta Mararâh pôhpalôhpa ta eimâ ngiarohpa cha Lockdown chhâ tawhta niebaw rairuna avaw y awpa he a châ.

MTP Gen. HQ nôpawpazy ta Mararâh khi to liata eimâ vaw tivy thei nawpa ta sawhkhâ supply ngâlâh mokhâh leipa ta – lyu, leipalie, sahdô etc. zy tao achhuah chyu awpa ta pasyuna bie reih ei ta, chakâhna avaw tlô hapa chhao ta eim khi chheipâh zy nata sawhkhâ tawh zy ngâlâh baona ahnabeiseih thlâh leipa ta eima khi chheipâh liata khih zy abôchhâh tlâh châ awpa ta hriapapuapa hnei cheingei chyu awpa ta pasyuna nata ahawna taopa a châ.

MTP Gen. HQ he ta, eima nôpaw chhituh hmiatuapazy hriapasana nata tiamana zawhzi ta Mararâh châta a theina rakha ta keih chakâ lymâ ta, atanoh Covid-19 adyuhna kyh lia chhao ta sawhkhâ nata Mararâh zawpi mokana zie ta y achhuah leipa ta a theina hawh ta keih avaw chakâ lymâ. Mara zawpizy apahniehna tlâh châ awpa ta eima Branch nata eima Sub-HQ zy chhao ta eima theina chyu hawhta la pazi ta, abyuhna nata ângiahna hawh ta Mararâh châta hmah a la pazi lymâ aw.

Covid-19 tawhta eima râh eimâ vaw boh chyu thei nawpa ta sawhkhâ bie zyh ta, VLTF duty zy rei angiah chyu awpa ta Mararâh zawpizy eimâ haw chanei hmeiseih.

(PRESS RELEASE No.8/2020)

Issued by:-
Mara Thyutlia Py
General Headquarters
Siaha

Leave a Reply

Your email address will not be published. Required fields are marked *