SIAHA, 2 Khihpa, 2020 – Atanoh dawh 11:30 Am liata Puhpa Robert B. Syuhlô châbu, PHURIE (A Historical fiction) cha Puhpa K. Vanlalliana, Sr. EO & Secretary, BML ta ano chhôhpadâhpa liata zawpi rei thei awpa ta a palâhâh.
He palâhâhna programme he Pihnô Patricia T. Azyu, member, BML ta pahnie kawpa ta chhihtha ta, Puhpa Z. Siachô, Editorial board member, BML ta Programme Khazohpa lâ apavaosana thlahchhâna a hnei.
Puhpa Vanlalliana chata biereina chyupa hnei ta, palâhâhna daihti phapa apie tuhpa Khazohpa hnoh ta alynabie a reih. Châbu author Puhpa Robert B. Syuhlô hnoh ta chhao alynabie reih ta, thyutlia châthaipazy ta ano hâ alapa ta châbu hluhpi vaw roh chyu awpa ta pahaona chhao a tao.
Puhpa Vanlalliana chata he châbu PHURIE he Marasawzy châta Mara reih tlai ta ropa a châna hawh ta Marasaw zydua ta rei awpa ta ahawna tao ta, Mara reih nata Mara reih laiseihna kyh liata athôkheina hnei chyu awpa ta Reader zydua khokheina a hlâ hra.
Daihti chhâna lâ liata Puhpa Robert B. Syuhlô, Author ta châbu buakheina thâtih chyupa reina hnei ta, châbu avaw pua thei nawpa ta sôh a finance tuhpa Art & Culture Department, MADC lâta alynabie reih ta, hrua eihpa Programme avaw hlao theipazy nata palâhâhna liata tovyuh raopa apabie theipa zydua hnoh ta alynabie a reih.
He châbu he COVID-19 vâta noh hro lâ hawhta Programme lai viapa taopa ta palâhâh theipa a châ leipa vâta he hawh ta ryhraona taopa a châ.
He châbu he tho 112 ahneipa châta, bo 13 lâta pachhaih pachhuahpa a châ. Zuana mâ ₹ 100/- châ aw ta, achalei khohpazy châta BML Office nata Art & Culture Department, MADC lia zy ta hiahri pasia theipa a châ aw.
(PRESS RELEASE No.92/2020)
Issued by:-
Informations & Public Relations Department
Mara Autonomous District Council
Siaha.