KHÔPAI, 6 Khihpa, 2020 (Hriatuanoh) – Atanoh kha ta MSO General Headquarters (HQ) pachhuapanohna ry liata zâkhanoh Chhiepa liata maniah â pahâsaipa Satlia Nelson, Khôpai cha taokheina daihti hmâpa a châ.
He taokheina daihti he Puhpa T. JB.Rôna, Vice President ta chhitha ta, Kmch. Vabeikhaihmô Solo, Sr.Advisor MSO Hq ta Biehrai bie 1Thysalawnika 4:12…. bie tawhta a chyhta pakawh ta thlahchhâna ta daihti pathaopa a châ.
Daihti pipa lâ eimá ngia hlâta S.Beikhochhua, Secy I/c Social Welfare ta Gen.Hq Siaha nata Sub, Joint Hq tawhta á hlaopazy hmia pahnosana nata maluhzie pahnosana daihti hmâh ta, ano khai tawhta biereina láta angiapa a châ.
Biereina eihrâhpa ta raopa Rev.S.Vabeikhokhei, Patron MSO Hq ta Zawhana 14:27 bie tlychakapa ta Khizaw liata hmoto nata moto liata thlalôhna kipa a y leizie nata Zisu Krista lia ngâláh ta thlalôhna Hmeiseihpa nata apahniehnatláh a châzie reih ta, St.Nelson â vaw pahâna kyh liata Marapa châpa a phazie nata thlalôh á chhihzie chhao a reih hra.
Bie a rei khai tawhta Puhpa Vatlualai Khithie, Treasurer MSO Hq Siaha Chhithana ry liata MSO Gen Hq, Sub Hq zy nata Joint Hq tawhta thyupakhypa sôh nata Taokheina chá ropa hlâna daihti hmâpa châ heih ta, Ls.Elisi K.Beinôpha, Ex. Comt Mem, MSO Gen Hq Siaha tawhta nata Sub & Joint Hq, tawhzy ta Ryuchâ ama hlâ hra. MSO hleikhôta Joint VLTF Saikao mohta sôh nata Ryuchá chhao ama hlâ hra.
Hmo hlâna daihti khai tawhta St.CH.Beikhochhi, President MSO Gen. Hq Siaha ta bie reih hra ta,
St. Nelson K.Beizachhi ta Chi nata pho kyhpachâna vâta a hrona taihta a vaw pahleipa he Marapa saw nata Keima mopakha châta pahaona (Challenge) lai kawpa nata pachâna hluhpi chhao maniah a piepa ta ei pahno.
Chyhsa hluhpi thina eimá tyhpa heta hnabeidyna nata hmo pha leina lâta maniah a chhi ta, raokheina taihta maniah tlôkhei ta, keima mopakha tlai chhao thina pasazie he ei pahnopasia ngaita kaw
St.Nelson maniah â vaw pahâsaipa he chhôkha nata khihsawzy châta pasa kaw ta, râh zawpi chhao pei eima tah kaw nota MSO, MTP, Mara chi nata pho châta deikua ahrana thiehpa miah pietuhpa hleikhôta Pho hropazy hmiakô liata Chi nata pho nohâh miah taotuhpa, siatlia pasaipha a châpa chhaota ei pahno tahpa ta a reih.
Mylâ hânoh deikua Nelson thlâsu he vaw tlyh ngâthláh thei hra leip’aw sih la, eima palôhru lia deikua myna Noh chhi beih khao aw vei. tahpa ta zawpi á vypa nata Khichhôh chyhsazy hnohta pasyuna bie a reih hra.
Biereituh eihrâhpa bie ama rei khai tawhta zawpi a khohpazy châta biereina daihti pahypa châ ta, St.LD.Vabeihruasa, Advisor nata Outgoing President hleikhôta Puhpa Judson Zepatha Khithie zy ta khizaw liata chyhsa rônahpazy thatih tawhta pasyuna bie nata tanoh ta a hrohpazy pi Beizachhi hawhta hrona eima hlâ thei leipa chhaota eima thaina sonazy hmâpa ta Mara Chi nata Pho châta apasai awpa á ngiahzie ama reih hra.
Daihti chhâna láta MSO Gen Hq. Siaha vyuhpa ta St. LD.Kenny, Asst. Gen. Secy tawhta alynabie reih ta, chhôkha lâ tawh chhaota alynabie nata Beizachhi â vaw pahâna kyh liata phuh leipa palyupalihna nata taokheina ama daopa a rônahzie a reih hra.
Daihti chhâ n’awpa ta Bei Zisu thlahchhâna ta daihti khawpa châ ta, Cha khô láta thlâ tlypa ta khichhai pati pahâh kawpa eima dôh.
Tanoh taokheina liata á hlao theipazy.
1) MSO Gen HQ Siaha.
2) MSO Sub HQ Shillong
3) MSO Sub HA Bangalore
4) MSO Joint HQ Delhi
5) MSO Joint HQ Aizawl
6) MSO Sub HQ Tipa
7) MSO Sub HQ Saikao
8) MSO Sub HQ Phura
9) MSO Sub HQ Chhaolô
10) MSO Sub HQ Zyhno zy ama châ.
(Admin, MNN. Source: MSO Gen. HQ, Siaha.)
Photo thokhazy ary liata:-
