MTP Gen. HQ ta MADC nôpawpazy apakyh

SIAHA, 8 Khihpa, 2020 – Atanoh dawh 2:30 Pm liata Mara Thyutlia Py (MTP) General (Gen.) Headquarters (HQ) Office Bearers zy ta MADC nôpawpapazy apakyhna ama hnei.

He Meeting he CEM’s Conference Hall liata hneipa châ ta, MTP Gen. Conference ei 32-na Resolution zy chhao CEM’s zachhihpa Puhpa N. Zakhai hnoh ta pangia pâpa a châ.

He apakyhna liata MTP Gen. Conference ei 32-na Resolution zy reipahmaohna hneipa châ ta, Resolution zy liata MTP palôhrupazy chhao MTP Gen. HQ lâ tawhta reipasiana hneipa a châ.

Ary lia palâsapazy he MTP Gen. Conference ei 32-na Resolutions, atanoh ta tlôkheipazy a châ:-

No.1. MADC ta rai a lana liata Mara reih he Subject sâkha (100 mark) ta hmâpa châsala, personal interview liata Mara reih he 50% mark ta tao tyh awpa eima khoh.

No.2. Mara Autonomous District Council he Marapa eima châ vâta ahmôpa châ pi ta, chavâta MDC nata VC Election liata Candidate-zy he Marapa cheingei taopa châ mawh sy.

No.3. Ohmo, Sahdô, Leipalie etc. zy he chi hro pho hropazy hnoh ta biehneituhpazy ta pass issue khao lei awpa. Chahleikhô ta arâh leilôsawzy chhao ta chi hro pho hropazy hnoh ta Ohmo, Sahdô, Leipalie etc. eima zua thei lei nawpata transfer of ownership tao lei awpa.

No.4. Eima râh liata Hall, Thlâsu, Tikhao nata Playgound zydua he MTP Branch mohôhna ry liata a y khai awpa eima khoh.

No.5. MTP kô phuahpa châta “Chipho nata reih pabohsana” a châpa hawh ta MADC ry liata sawhkhâ rai hriapa zydua ta zyh chyu awpa ta MTP General Headquarters ta â hnaw.

MTP Gen. HQ lâ tawhta OB pa 6 nata Advisers Puhpa V. Samaon nata Puhpa H. Vabeitha zy amâ hlao thei hra.

Atanoh liata apakyhna he Mararâh châta hmopha viapa a châ awpa hnabeiseihpa ta MTP Gen. Conference ei 32-na ta a vaw pathlupazy a châna hawh ta eima râh nôpawpazy chhao ta pachâ peimawh kaw ei ta, abyuhna nata ângiahna hawh ta MTP zy nahta Mararâh châta hrialâh lymâ awpa ta amâ pahy zie ama reih.

MADC nôpawpazy tawhta Puhpa N. Zakhai, CEM, Puhpa K. Hrahmô, EM i/c Edu., Puhpa MH. Tiabi, EM i/c LADC, Puhpa K. Chhuabei, EM i/c PWD nata Puhpa F. Lawmkima, EM i/c E & F zy ta biereina chyupa ama hnei chyu hra.

Meeting he dawh 4:45 Pm pa ta Zisu thlahchhâ pachupa reiparaohpa ta pachhâsapa a châ.

(PRESS RELEASE No.66/2020)

ISSUED BY:-
Mara Thyutlia Py
General Headquarters
Siaha.

Leave a Reply

Your email address will not be published. Required fields are marked *