SIAHA, 15 Khihpa, 2020 – Atanoh dawh 1:00 Pm khata, Mara Hla nata bie liata hniehnôh a pazai kawpa, Puhpa L.Beimokhai châbu 4-na, EI KUZÔ tahpa châbu cha, Puhpa K.Vanlalliana, Sr.EO nata, Secretary, BML, MADC ta zawpi rei thei awpa ta a palâhâh.
He châbu palâhâhna, Sr.EO, Edu.Deptt., MADC chhôhpadâhpa liata a hmâna daihti he, Puhpa Laicho Nôtlia, Vice Chairman, BML, MADC-ta chhihthapa ta, daihti pavaosana châta Puhpa JB Khaisia, Proof Reader, BML, MADC thlahchhâ ta; he khai tawhta EI KUZÔ tahpa châbu cha Puhpa K.Vanlalliana, Sr.EO nata Secretary, BML, MADC ta zawpi rei thei awpa ta a palâhâh.
Châbu palâhâhtuhpa, Puhpa K.Vanlalliana chata, Atahmâhlâ ta eima ziza a tyh haipa vâta chyhsa hluh viapa hryta he châbu palâhâh theipa a châ leipa he pei tah ngaita kaw na ta; cha hawhta a châ nota, Covid-19 ziza hryta Mara Literature hmahsiena châta thapi phiatuhpazy zawzi ta châbu papuapa a vaw châ heihpa he hmahsiena tah leithei’pa châ vei tahpa ta, Mara Literature liata eima nôpaw a sie hapazy, Dr.S.Hrachu zy, Padmashree A.Zakia zy nata, chyhsa nano nanopazy hriapasana zydua khata atanoh Mara Literature duasu he athata cheihchalopa ta, atahmâ duasu miah tlôkhei ta; palôh liata a thei leithei ma pi a ta.
Puhpa K.Vanlalliana chata, Literature liata palôh kawh viapa phaohpa ta, hmahsiena eima hnei thei lymâ n’awpa ta thapi phia via lymâ suh vy tahpa ta he daihti a vaw hlaopazy a hrua chyu ei.
Châbu palâhâhna daihti chhâna lâ liata, châburohtuhpa, Puhpa L.Beimokhai-ta châbu a pachhuahpanohna kyh liata alynabie reina nata, châbu a kaw pachhuahpanoh laihna dâh zy reihpa ta, daihti pachhâsapa a châ.
Atanohta EI KUZÔ châbu palâhâhna daihti, Covid-19 ziza vâta chyhsa hluhpi hrua thai awpa a châ leipa vâta BML, MADC manôh chyhta hleikhôta, MWC tawhta President, Vice President nata Secretary nata, Puhpa B.Dawphô, Editor, The Times of Maraland zy cha hrua-eihpa ama châna hawhta amâ hlao.
Puhpa L.Beimokhai châbu, EI KUZÔ liana heta Article 7 nata Phôh chyupa (Short Story) 2 y ta; Tho 249-ta a chhapa châpa ta, Bu 1-he Rs 200/-ngâlâh a châ. Zawpizy chalei chyu suh vy.
PRESS RELEASE
No.104/2020
Issued by:-
Information & Public Relations Department
Mara Autonomous District Council
Siaha.