SIAHA, 29 Khihpa, 2020 – Atamy my dawh 11:00 Am liata Puhpa Beirahmo Syhly, Executive Member (EM) i/c Sports, Vety. Etc. MADC ta a bia (Laty MDC Bia) tawhta atakô Class-10 (HSLC) nata Class-12 (HSSLC) Examination liata hlaotlohna atopazy hry liata 1st Division tawhta a chô lâ a pass pazy, a office room liata thopi dokheipa ta alykheina a hnei.
Laty MDC Bia chhôh liata atakô Class-10 & Class-12 Exam liata 1st Division chô lâ a pass pazy he manôh 7 châ ei ta, he liata HSLC liata 3 nata HSSLC liata 4 ama châ.
Puhpa Beirahmo ta alykheina châta ama zydua hnoh ta Rs.2,000/- chyu hlâ ei ta, HSSLC, Biology subject liata Mizoram pôhpalôhpa liata Topper Angela HC. Ngohie hnoh ta Rs.3,000/- a hlâ hra.
Puhpa Beirahmo Syhly chata biereina chyupa hneipa ta, hlaotlohna atopazy hnoh ta alykheina bie reih ta, Khazohpa byhnâ a châ zie a reih. He phusâ a hlâpazy he hluh vei hra sala, palôh hmeiseihpa ta âlykhei zie pamosa châta a hlâpa a châ tahpa a reih.
Atahmâ liata hlaotlohna he âthaona hawh ta pachâpa ta, amâ chu pazao lymâ nawpa liata tiama papua via lymâ awpa apeimawh zie a reih. Châ achu daihti liata vâ-iapa hnei lei awpa ta pasyu ei ta, chanô-chapaw châna, paritheipa nata hmo pha leipazy tawhta asohsi awpa ta pasyuna bie pha kawpa reih ta, hmialâ daihti liata Mararâh châta chyhsa hmâtlâh châ achhuah chyu awpa ta ahawna a tao hra. Achuhaipa châ no tawhta Khazohpa pahno awpa a apeimawh zie reih ta, ato liata Khazohpa hmia pasah lymâ awpa ta pasyu ei ta, hmialâ ama sie lymâ nawpa liata khokheina bie a hlâ ei.
He programme liata Puhpa L. Siatha, VCP, Laty chhao ahlaopa ta pasyuna bie pha kawpa a reih. Pihnô Patricia T. Azyu, Social Welfare Officer, MADC ta alykheina (lymâ) rai ta, Official lâ tawhta Puhpa J.H. Beihnai, Sports & Youth Officer nata Dr. Beizakaw Vytuchho, VO zy chhao programme he ahlaopa ta pasyupalina bie ama reih chyu hra.
PRESS RELEASE
No.114/2020
ISSUED BY:-
Information & Public Relations Department
Mara Autonomous District Council
Siaha