SIAHA, 4 Thlazoh, 2020 – Atanoh nohchhô dawh 12:30 Pm liata Mara Thyutliazy hry tawhta Mara Hla nata bie liata alâluah kawpa Satlia LB. Thatlô, Saikao châbu “Mara Hlaphôh Bu” nata “Tisi Chavah Raphyu lia” sâ 2 zy cha Puhpa JH. Beihnai, Sports & Youth Officer (S&YO), MADC nata Adviser, MWC, Siaha ta Sports & Youth Services Department office chhôhpadâh, MADC Complex liata zawpi rei thei awpa ta a palâhâh.
Palâhâhna Programme he Satlia FC. Chhuasa, President, MWC, Siaha ta chhihtha ta, Khazohpa lâ programme pavaosapa ta Pihnô N. Ngôtlai, Adviser, MWC ta thlahchhâna a hnei.
Puhpa JH. Beihnai chata biereina chyupa hnei ta, tahmâhlâ ta eima ziza atyh haipa vâta chyhsa hluh viapa hryta he châbu palâhâh theipa a châ leipa he pei a tah zie reih ta; cha hawhta a châ nota, Covid-19 ziza hryta Mara Literature hmahsiena châta thapiphiatuhpazy zawhzi ta châbu papuapa avaw châ heihpa he hmahsiena tah leithei’pa châ vei tahpa ta a reih.
Puhpa JH. Beihnai chata Literature liata palôh kawh viapa phaohpa ta, hmahsiena eima hnei thei lymâ n’awpa ta thapiphia via lymâ suh vy tahpa ta he Programme avaw hlaopazy a hrua chyu ei. Mararâh nata Marasaw, Mararâh khôtho lâ ta ypazy Chhôhto liata Mara reih chei hluh via lymâ awpa ta ahawna chhao a tao hra.
Puhpa JH. Beihnai he ta Satlia LB. Thatlô châbu palâhâh thiehpa he tlaw Rs.3,000/- mâ tlai a chaleipa pâ hra.
Châbu palâhâhna daihti chhâna lâ liata châbu rohtuhpa Satlia LB. Thatlô ta châbu a pachhuahpanoh laihna dâh tlâhpipazy reih ta, rairuna â tyh daihti lia maih ta Puhpa JH. Beihnai, S&YO kaw pangai tyh ta, ano ta a hlao avaw patlohpa lymâ tyh vâta a chô liata â lyzie reih ta; chadei châ leipa ta châbu avaw roh daihti liata sôh nata thih, pakah paleih, phone call nata message zy ta tha patlôna reikah ahlâ tuhpa zydua hnoh ta chhao alynabie a reih hra.
Satlia LB. Thatlô châbu zy he bu kha ta Rs.100/- zuapa a châ aw. Marareih laiseihna liata thapasana ahneipa nata Satlia LB. Thatlô saiheina apalâsapa ta a Châbu a chalei awpazy cha Mobile No. 8974772588 liata hiahri pasia theipa a châ.
Satlia LB. Thatlô he ta Mara reih ta châbu pitlohpa sâ 5 vaw papua ha ta, atahmâ liata palâhâhpa he bu 6-na nata bu 7-na a châ.
PRESS RELEASE
No.119/2020
ISSUED BY:-
Information & Public Relations Department
Mara Autonomous District Council
Siaha.