SIAHA, 8 Thlazoh, 2020 – Atanoh zâlâ dawh 2:00 PM liata Puhpa N. Zakhai, CEM (MADC) zachhihpa nata a viasanô Pihnô Napaw Hlychho zy ta CEM’s Bungalow, Siaha liata hrua eihpazy chhao ta Siaha DC achâ ngâhaipa Puhpa Bhupesh Chaudhury, IAS thopi dokheina ama hnei.
He thopi dokheina liata Programme chyupa taopa châ ta, Puhpa N. Zakhai chata Mararâh zawpi vyuhpa ta Puhpa Bhupesh Chaudhury hnoh ta alynabie reih ta, Siaha liata a ypa kô 2 chhao atloh leipa, daihti chyuta a y chhôh ta Mararâh châta hmo hluhpi a tao hleikhô ta chyhsa hluhpi ta nietluana pha kawpazy vaw hnei ei ta, eima râh liata hniehnô hluhpi a pathlapazy vâta Mara zawpizy ta alynabie eima reih tah ta, a hmopha taopa nata ano cheingeipa chhao palô liata khâ eimâ thei aw tahpa ta reih ta, hmialâ a sie lymâ nawpa liata chhao khokhei sâh chaipa a hlâ hra.
Puhpa Jeffrey Khara , Editor, Moonlight Newspaper, Puhpa V. Vanhupa, EM i/c LR & S, MADC, Rev. Dr. FC. Beicho, Moderator, ECM Assembly, Puhpa M. Laikaw, MDC & President, BJP, Siaha District, Pihnô P. Chaki, President, MCHP General Headquarters nata Puhpa N. Pachhunga, Sr. RO, MADC zy ta alynabie nata biereina chyupa ama hnei chyu hra.
Puhpa Bhupesh Chaudhary, IAS chhao ta Mararâh zawpi hnohta alynabie reih ta, Aizawl nata Delhi liata a y hapa chhao ta Mararâh châta â pahyzie reih ta, atanoh apathliena daihti pha kawpa achhuanoh tuhpa Puhpa N. Zakhai, CEM zachhihpa nata a viasanô Pihno Napaw Hlychho hnoh ta alybie a reih.
Puhpa N. Zakhai, CEM zachhihpa ta Mararâh zawpi vyuhpa ta athei thlâhna nata alynabie reina châta Puhpa Bhupesh Chaudhury hnoh ta Pihnô S. Lalmuanpuii, Dy. Secretary (Fin.) siepahliepa ta Certificate of Appreciation, frame taopa ta hlâ ta, Pihnô Napaw Hlychho ta Mara poh – Shawl(Hnokaw) a hlâ hra.
Puhpa Bhupesh Chaudhury, IAS chhao ta Puhpa N. Zakhai hnoh ta hmosai piepa a hlâ hra.
Daihti chhâna lâ liata Rev. VL. Ngaia Hlychho, Sr. Executive Secretary, ECM Assembly ta thlahchhâna hneipa ta Programme he khawpa a châ.
COVID-19 Pandemic daihti a châ vâta he Thopi dolâhna liata chyhsa hluhpi hrua thai’pa a châ leipa ta, MTP, MSO, MCHP General Headquarters: Siaha President nata General Secretary zy hruapa châ ei ta, MADC liata Executive Member zy nata Officer thokhazy ngâlâh hruapa châ ei ta, MJA Siaha vyuhpa ta Puhpa B. Dawpho, Editor, The Times of Maraland nata Puhpa Jeffrey Khara, Editor, Moonlight zy amâ hlao thei hra.
Siaha DC achâ ngâhaipa Puhpa Bhupesh Chaudhury, IAS he Febuary 2019 liata Siaha liata DC rai a kaw pazao ta, kô 1 nata khophie chhôh eima District liata a y tawhta atahmâ he Aizawl lâta pasiepa châ ta, mylâ târi 9 Thlazoh, 2020, Khazoh noh he ta Siaha puasai awpa ta â patoh patiapa vâta MADC CEM zachhihpa Puhpa N. Zakhai nata a viasanô ta atanoh he ryhpaohna chaleipa ta pathliena nata alynabie reina châta Thopi dolâhna ama hneipa a châ.
PRESS RELEASE
No.120/2020
ISSUED BY:-
Information & Public Relations Department
Mara Autonomous District Council
Siaha