SIAHA, 15 Thlazoh, 2020 – Atanoh my dawh 10:00 Am liata Puhpa N. Zakhai, CEM, MADC ta a ei kha nawpa ta MADC tlyhmia liata Indian Independence Day alyna châta Indian National Flag a parai.
Puhpa N. Zakhai chata Indian flag a parai khai tawhta biereina chyupa hnei pazi ta, Marasaw, chi nata pho ta miah padua tuhpa Khazohpa hnoh ta alynabie a reih.
Puhpa N. Zakhai bierei tlâhpi viapazy:-
- MADC ta anoeihta 74th Indian Independence Day ahmâ thei awpa a châpa he aly hmeiseih na ta, India khotalaina noh zana nata anaohna Samaw ei cha hlâ ei.
- Atanoh India khotalaina eima hmôna noh eima hmâ theina chhâpa he khotalaina eima hmô thei nawpa ta a vaw hriapasa tuhpazy vâta a châ; British ryureina tawhta ryureina eihrâhpa eima hnei thei nawpa ta MK. Gandhi zy ta thisaih palo leipa ta ama vaw tei. Atanoh liata ama hriapasana nata tiama theilâpazy eima padi noh liata âmo athei pi ta, zana eima hlâ hmeiseih.
- Atahmâhlâ Covid-19 Pandemic vâta eima râh duahmo apha lei awpa chipa ta Covid-19 adyuhna liata zawpi hriaparaohna nata District & Local Level Task Force zy hriapasa kyh vâta alynabie reih na ta, NGO zy hriaparaohna arônah hmeiseih; ama zydua chô liata alynabie ei reih.
- Marasawzy ta Covid-19 tawhta eimâ vaw boh thei nawpa ta a duty pa Nelson K. Beizachhi, Khopai deikua a duty na tawhta pasana alapa ta miah apahâsai ha ta, atanoh liata athei pi ta, zana chhao eima hlâ hra.
- Khazohpa ngiachhiena nata Mararâh zawpi khokheina vâta MADC 11th Term (2017-2020) he atahmâ kô 3 hlei vaw siekhei ha pi ta, eima budget nata taotheina ta â phana rakha liata eima theina hawhta Mararâh châta rai eima vaw hria lymâ. MADC Officers & Staff zy chhao ta phahnai ngiah kawpa ta Mararâh châta tiama papua via lymâ awpa ta eimâ pasyu hmeiseih.
- Chi nata pho pabohsana kyh liata Mararâh zawpizy hriaparaohna apeimawh ngaita.
- Chipho lai viapazy ta chipho chynawh viapazy tlybai ta disao miah achhuah ngâ hra ei sa la, MADC ta eima Mara chi nata pho pabohsa awpa ta a theina zydua papua lymâ aw ta, biehneina sâh viapa chhao hmô awpa ta â chadai pazi lymâ aw.
MADC ta he hawh ta anoeihta eimâ hmâna chhâpa cha Mizoram sawhkhâ ta Warrant/Order of Precedence a taopa liata CEM, EM nata MDC zy duahmo ahnai kawpa liata ama sopa pasâh via awpa ta hiapa hlaotlohna a y mâh vei vâta a châ.
Covid-19 vâta Independence Day alyna liata chyhsa hluhpi hrua thai’pa châ lei ta, Official thokhazy, Ex-MLAs, Ex-MDCs, Presidents, All Political Parties, Siaha District, ECM HQ tawhta Sr. Exe. Secretary, Exe. Secretary i/c Edu. & Mission, Moderator zy hruapa châ ei ta, MTP, MSO, MCHP General Headquarters President & General Secretary, MJA Siaha zy dei hruapa ama châ. Seat arrangement liata Social distancing taopa châ ta, avaw hlaopa zydua hnoh ta mask rai khaipa a châ hra.
PRESS RELEASE No.122/2020
ISSUED BY:-
Information & Public Relations Department
Mara Autonomous District Council
Siaha